काठमाडौं– छैटौं सिएमएस फाल्डो सिरिज नेपाल च्याम्पियनसिपको उपाधि शुक्रबहादुर राईले जित्न सफल भएका छन्।
गोकर्ण गल्फ क्लबमा बुधबार भएको अन्तिम चरणको खेलमा ४ ओभर ७६ स्कोर गर्दै शुक्रले समग्रमा ११ ओभर २२७ स्कोरका साथ उपाधि जितेका हुन्।
उनले २ ओभर ३८ मा फ्रन्ट नाइनको खेल सकेका थिए। पहिलो र चौथो होलमा बर्डी प्रहार गरे पनि दोस्रो होलमा बोगी र सातौं होलमा ट्रिपल बोगी खेप्न वाध्य भए।
यसपछि १५औं र १७औं होलमा एक-एक सट गुमाउँदा ब्याक नाइन पनि २ ओभर ३८ मा पूरा गरे।
७ ओभर ७९ स्कोर सहित समग्रमा २३७ स्कोर जोडी विपिन तामाङ दोस्रो भए। ८१ अंकसहित समग्रमा २४९ को नतिजामा सुरेश तामाङ तेस्रो भए।
महिलातर्फ डिफेन्डिङ च्याम्पियन प्रतिमा शेर्पाले कसमिरा शाहलाई ३७ स्ट्रोकको भारी अन्तरमा हराउँदै उपाधि रक्षा गरिन्।
शेर्पाले ४ ओभर ७६ स्कोर गरी समग्रमा १४ ओभर २३० को नतिजामा ३७ स्ट्रोकको सहज जित हात पारिन्।
उनले दोस्रो, आठौं र नवौं होलमा बोगी प्रहार गर्दा चौथौ र सातौं होलमा बर्डीको सफलतासँगै फ्रन्ट नाइन १ ओभर ३७ मा पूरा गरिन्।
ब्याक नाइन भने ३ ओभर ३९ मा सक्ने क्रममा १०औं, १२औं, १४औं र १७औं होलमा बोगी खेप्दा १८औं होलमा बर्डी प्रहार गरिन्।
९१ स्कोर जोडेकी शाह समग्रमा २६७ स्कोरसहित दोस्रो र २९२ स्कोरसहित प्रतिभा राई तेस्रो भइन्।
प्रतियोगिताको १२ देखी १६ वर्ष उमेर समुहतर्फ भारतीय खेलाडी मोनिष शाहलाई १ स्ट्रोकले हराउदै सुबाष घिसिङ उपाधी जित्न सफल भए।
नेपाल गल्फ संघ र गोकर्ण फरेस्ट रिसोर्टद्वारा संयुत रूपमा आयोजित ३ दिने प्रतियोगितामा २३ खेलाडीको सहभागिता थियो।
तीन स्पर्धाका विजेता शुक्रबहादुर राई, प्रतिमा शेर्पा र सुबास घिसिङ भियतनाममा आगामी मार्चमा हुने फाल्डो सिरिज एसिया फाइनलका लागि छनौट भएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
