एजेन्सी- अमेरिकाको भर्जिनिया राज्यअन्तर्गत पर्ने भर्जिनिया सामुद्रिक तटको एक भवनमा भएको गोलीप्रहारबाट १२ जनाको मृत्यु भएको छ।
नगरपालिकाको कार्यालयमा काम गर्ने एक जना कर्मचारीले आफ्नै सहकर्मीहरुमाथि गोली प्रहार गरेका थिए।
प्रहरीले शुक्रबार अबेर पत्रकार सम्मेलन गरी आक्रमणकारीको पहिचान खुलेको जानकारी दिएको छ। उनी नगरपालिकाको सिटी इन्जिनियर रहेको समेत प्रहरीले बताएको छ। आक्रमणबाट मृत्यु हुने अधिकांश व्यक्ति उनकै कार्यालयमा काम गर्ने कर्मचारी भएको र केही अन्य रहेको प्रहरीले पुष्टि गरेको छ। आक्रमणमा परी ४ जनासमेत घाइते भएका छन्।
'आक्रमणकारी नगरपालिकाका सिटी इन्जिनियर डिबेन क्र्याडक हुन्। उनी विगत १५ वर्षदेखि सोही नगरपालिकाको युटिलिटी विभागमा काम गर्दै आएका थिए,' भर्जिनिया बिच प्रहरी प्रमुख जेम्स सेर्भेराले पत्रकार सम्मेलनमा भने।
उनले किन हत्या गरे भन्ने खुल्न नसकेको प्रहरीले जानकारी दिएको छ। यद्यपि उनी नगरपालिकाका असन्तुष्ट कर्मचारी रहेको बताइएको छ। यस सम्बन्धमा थप अनुसन्धान भइरहेको प्रहरीको भनाइ छ।
प्रहरीका अनुसार उनले प्वाइन्ट ४५ क्यालिबर हेन्डगन प्रयोग गरेका थिए। सो गनबाट साउन्ड नआउने उपकरण समेत जडान गरिएको थियो। प्रहरीले आक्रमणकारीको घरमा समेत छापा मारी खोजतलास गरेको थियो। यस क्रममा उनको घरबाट अन्य हतियारसमेत फेला परेको प्रहरीले जानकारी दिएको छ।
.png)
पहिलो पटक सुट भएको केही मिनेटमा नै प्रहरी घटनास्थल पुगेको दाबी प्रहरीको छ। तर पनि दुखद् घटना रोक्न नसकेको आरोप प्रहरीमाथि छ।
स्थानीय संचारमाध्यम अनुसार आक्रमणकारी क्र्याडक ४० वर्षीय व्यक्ति हुन्। विगतमा उनी कुनै पनि आपराधिक क्रियाकलापमा संलग्न नभएको बताइएको छ।
उनले अन्धाधुन्द गोली प्रहार गरेको प्रत्यक्षदर्शीले जनाएका छन्।
'भर्जिनिया तटको इतिहासमा यो अहिलेसम्मकै दुःखद् घटना भएको हो,' स्थानीय मेयर बोब्बी ड्योरले भने। भर्जिनिया राज्यका गभर्नर राल्फ नर्थमले पनि वक्तव्य जारी गर्दै निर्मम् घटना भएको बताएका छन्।
शुक्रबार बेलुका भएको यो घटनालाई 'विवेकहीन र अक्षम्य घटना' को संज्ञा दिएका छन्।
स्थानीय समयअनुसार शुक्रबार बेलुका चार बजेतिर घटना भएको हो। घटना भएको भर्जिनिया सामुद्रिक तट लोकप्रिय पर्यटकीय स्थल मानिन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
