भर्जिनिया- अमेरिकाको भर्जिनिया राज्यको एक सरकारी कार्यालयमा एक बन्दुकधारी अन्धाधुन्ध गोली प्रहार गरी ११ जनाको हत्या गरेका छन्। भर्जिनिया बिच सिटीमा लामो समयदेखि काम गर्दै आएका बन्दुकधारीले शुक्रबार सरकारी कार्यालयमा प्रवेश गरी अन्धाधुन्ध गोली प्रहार गरेका थिए।
घटनामा अन्य ६ जना घाइते भएका प्रहरीले जनाएको छ। घाइते हुनेमा एक प्रहरीका अधिकारी समेत रहेको बताइएको छ। हालसम्म कुनै परिचय सार्वजनिक नगरिएका बन्दुकधारीको प्रहरी कारबाहीमा मृत्यु समेत भएको छ।
भर्जिनिया बिच म्युनिसिपल सेन्टरमा शुक्रबार अपरान्ह ४ बजेतिर सो घटना भएको प्रहरीले बताएको छ। सो क्षेत्र धेरै सरकारी कार्यालय हुने तथा सेवाग्राहीको बाक्लो उपस्थिति रहने क्षेत्र हो।
आक्रमण म्युनिसिपल सेन्टरको दोस्रो भवनमा भएको हो। भर्जिनिया प्रहरी प्रमुख जेम्स कर्भेराले प्रहरीमाथि नै गोली प्रहार गरेकाले जवाफी कारबाहीमा उनी मारिएको पुष्टि गरे। उनका अनुसार बन्दुकधारी एक्लै कार्यालय हाताभित्र प्रवेश गरेका थिए।
हालसम्म मृतकको सनाखत हुन सकेको छेन। घाइते भएका ६ जनाको भने पहिचान खुलेको कर्भेराले बताए।
ह्वाइट हाउसका प्रवक्ताका अनुसार घटनाप्रति राष्ट्रपति डोनाल्ड ट्रम्पले दुःख व्यक्त गरेका छन्।
भर्जिनिया बिच ४ लाख ४० हजार जनताको बसोबास रहेको राज्यको एक घना बस्ती भएको सहर हो।
गोली प्रहारका घटनाको आँकडा राख्दै आएको एक अमेरिकी वेबसाइट 'गन भायोलेन्स अर्काइभ'का अनुसार सन् २०१९ मा मात्रै सार्वजनिक स्थलमा १ सय ५० भन्दा बढी गोली प्रहारका घटना भइसकेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
