कोलकाता– अर्जेन्टिनाका फुटबल खेलाडी डिएगो म्याराडोनाले आफूलाई ‘फुटबलको भगवान्’ नभन्न फ्यानहरूलाई आग्रह गरेका छन्।
भारतको कोलकातामा आफूलाई भव्य स्वागत गरिएपछि उनले आफू साधारण खेलाडी मात्र भएको र आफूलाई भगवानको पदवी नदिन आग्रह गरे।
उनले दोभाषेको माध्यमबाट भने, ‘म फुटबलको भगवान् होइन। सामान्य फुटबल खेलाडी मात्र हुँ। एकपल्ट फेरि कोलकाता आउन पाउँदा खुसी लागेको छ।’
पछिल्लो ९ वर्षको अन्तरालमा म्याराडोना दोस्रोपल्ट भारत आएका हुन्। उनी २००८ मा पहिलोपल्ट कोलकाता आउँदा पनि भव्य स्वागत गरिएको थियो। मंगलबार उत्तर कोलकाता क्लबको च्यारिटी कार्यक्रममा उनी उपस्थित हुँदा करिब एक हजार मान्छे उनलाई हेर्न आएका थिए।
सन् १९८६ को विश्वकप आफ्नो नेतृत्वमा एक्लैले जिताएपछि उनी चर्चित भएका थिए। गत आइतबार कोलकाताको तीन दिने यात्रामा आइपुगेका म्याराडोनाले ११ जना क्यान्सरपीडितलाई १०–१० हजार रुपैयाँको चेक र वातानुकूलित एम्बुलेन्स हस्तान्तरण गरेका थिए।
यतिबेला उनलाई हेर्न मानिसहरू नजिकको घरको छतमाथि चढेका थिए। उनले आफ्नो नाममा बनेको पार्कको १२ फिट लामो प्रतिमाको अनावरणसमेत गरेका थिए। जसको हातमा १९८६ को ट्रफी पनि रहेको छ। म्याराडोनाले पार्कमा आफ्नो प्रतिमा स्थापित गर्ने घोषणाले आफू नतमस्तक भएको बताए।
म्याराडोना १९ सेप्टेम्बरमै भारत आउने निश्चित थियो तर उनले बीचमा यात्रा स्थगित गरेका थिए। म्याराडोना मंगलबार फुटबल खेलाडीको सहयोगार्थ ‘डिएगोविरुद्ध दादा’ नामक खेलमा पनि सहभागी हुँदैछन्। उनी भारतीय क्रिकेटका पूर्वकप्तान सौरभ गांगुलीविरुद्ध खेल्नेछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
