इटहरी- यसपालिको चुनावमा दोब्बर मतले पराजित हुने एक मात्रै 'हेभीवेट' नेता हुन् संघीय समाजवादी फोरमका वरिष्ठ नेता अशोक राई। र, उनलाई पराजित गर्ने उम्मेदवार हुन् जयकुमार राई। जयकुमार कुनै बेला अशोकका जुनियर कार्यकर्ता थिए।
सुनसरी क्षेत्र नम्बर १ बाट प्रतिनिधिसभा सदस्यका उम्मेदवार अशोक राई जनजाति बाहुल्य स्थानमा जित्ने आशाले धरान आएर चुनाव लडेका थिए। उनमा जितको अपेक्षा पनि थियो। लोकतान्त्रिक गठबन्धन बनेर नेपाली कांग्रेससँगको चुनावी तालमेलका कारण आफ्नो चुनावी जित हुने उनी बताउँदै आएका थिए।
तर, चुनाव जित्नु त परको कुरा सबैभन्दा धेरै मतान्तरले लज्जास्पद हार बेहोर्ने हेभीवेट नेता हुन पुगे उनी।
नेकपा एमालेको पूर्वउपाध्यक्ष समेत रहेका संघीय समाजवादी फोरमका उम्मेदवार अशोकलाई हराउन एमालेका जयकुमारले ४४ हजार ५ सय २८ मत ल्याए। अशोक भने २२ हजार १ सय २३ मत ल्याएर आधाभन्दा कम मतमै सीमित रहे।
अशोक र जयको राजनीतिक साइनो
यी दुईबीचको सांगठनिक धागो भने पुरानै हो। जब २०५४ सालमा एमाले फुटेर माले बन्दा बामदेव गौतम र सिपी मैनाली नेतृत्वको मालेको शक्तिशाली स्थायी कमिटीमा थिए अशोक। त्यसबेला जयकुमार मालेको विद्यार्थी संगठनका केन्द्रीय नेता थिए।
एमालेमा पुनः फर्केर आएपछि अशोक एमालेका वैकल्पिक पोलिटब्युरो सदस्य भएर उपाध्यक्षसम्म भए। वामदेव गौतम र अशोकसँगै एमालेमा आएका जयकुमार राई पनि सुनसरी एमालेको सचिवालय सदस्यसम्म भए।
२०६५ फागुन ५ देखि १४ सम्म बुटवलमा भएको महाधिवेशनमा अशोक केन्द्रीय उपाध्यक्ष बन्दा जयकुमार हाल मेयर रहेका तारा सुब्बा नेतृत्वको धरान नगर कमिटीका उपाध्यक्ष थिए।
यसरी माले र एमालेमा हुँदा आफूभन्दा धेरै जुनियर कार्यकतासँग दोब्बर मतले हारेका अशोक नै धरानको एमालेको संगठन निर्माण गर्न भूमिका खेलेको एमालेजनहरु स्विकार्छन्। २०६९ सालमा एमालेले ‘पहिचान’ अस्विकार गरेको आरोप लाउँदै अशोकले संघीय समाजवादी पार्टीको स्थापना गरेका थिए। त्यो बेलाबाट भने अशोक र जयकुमारको राजनीतिक पार्टी फरक भएको थियो। समाजवादी पार्टी स्थापनाको धेरै नबित्दै २०७२ जेठ ३२ गते अशोकले उपेन्द्र यादव नेतृत्वको मधेसी जनआधिकार फोरमसँग पार्टी एकीकरण गरे। मशाल चुनाव चिह्न लिएर कांग्रेसको सहयोगमा धरानबाट चुनाव लडेका उनी अन्तत: नराम्ररी पराजित बने।
को हुन् जय कुमार राई?
२०२५ भदौ १५ गते भोजपुरको आम्चोक गाँउपालिकामा जन्मिएका जयकुमार राईले पञ्चायतको समयमा २०३८ सालमा शिक्षाज्योति निमावि भोजपुरमा अनेरास्ववियुको प्रारम्भिक कमिटीमा रहेर विद्यार्थी राजनीति सुरु गरे। भोजपुरमा कक्षा आठसम्म अध्ययन गरेका जयले थप अध्ययन गर्न धरान आँउदा धरानको शिक्षा सदन माविमा २०४० सालमा प्रारम्भिक कमिटि सचिव भएका थिए। पञ्चायती व्यवस्थाको उत्तरार्द्धमा वामपन्थीको गढ धरान झरेका उनले पञ्चायतविरुद्ध विद्यार्थी आन्दोलनको मोर्चा सम्हालेका थिए।
२०४६ को आन्दोलनमा पक्राउ परेका उनी १० दिन थुनामा परे। २०५० मा अनेरास्ववियुको धरान नगर कमिटी अध्यक्ष बनेका जय २०५१ सालमा सुनसरी जिल्ला कमिटी सहसंयोजक बने। २०५२ मा उनले अनेरास्ववियु जिल्ला कमिटी उपाध्यक्ष सम्हाले।
एमाले फुटेर माले भएपछि २०५४ मा जय मालेको विद्यार्थी संगठनमा कोसी अञ्चल संयोजक, राष्ट्रिय परिषद् सदस्य हुँदै केन्द्रीय सदस्यसमेत भए। मालेमा हुँदै मालेको धरान नगर कमिटी सदस्य भएका राई २०५९ मा एमाले र माले मिलेपछिको एकीकृत पार्टीको धरान नगर कमिटी सदस्य भएका थिए। नगर सदस्यबाट नगर उपमसचिव हुँदै उपाध्यक्ष भएका उनी हाल एमालेको सुनसरी जिल्ला कमिटीको सचिवालय सदस्य तथा धरान नगर सहइन्चार्ज समेत हुन्।
२०४५ मा प्रवेशिका परीक्षा दिएका उनले कानुनमा स्नातकसम्म अध्ययन सकेका छन्। माधव नेपाल गुटका भनिए पनि जयकुमार गुटभन्दा माथि उठेका नेता रहेको एमाले कोसी अञ्चल सल्लाहकार समिति सदस्य मोतिराज सुनुवार बताउँछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
