काठमाडौं– विश्व क्रिकेट लिग (डब्लुसिएल) च्याम्पियनसिप अन्तर्गत सातौं चरणको दोस्रो खेलमा पनि नेपाल पराजित भएको छ।
शुक्रबार भएको खेलमा नेपाललाई युएईले ६३ रनले पराजित गरेको हो। युएईले दिएको १ सय ९६ रनको लक्ष्य पछ्याएको नेपाल ४२.२ ओभरमा १ सय ३२ रनमा अलआउट भयो।
नेपालका लागि ओपनर ज्ञानेन्द्र मल्लले सर्वाधिक ४२ रनले योगदान गरे। आउट हुनुअघि उनले ९० बल खेलेपनि कुनै बाउन्ड्री पार गर्न सकेनन्। विनोद भन्डारीले २५ रन जोडे। उनले ३० बलमा १ चौका र १ छक्का प्रहार गरे। अन्य ब्याट्सम्यानले उल्लेख्य रन जोड्न सकेनन्। नेपालका पाँच ब्याट्सम्यान शून्य रनमा आउट भए।
नेपालको इनिङ ध्वस्त पार्ने क्रममा युएईका अमजाद जाभेदले ३ विकेट लिए। मोहमद नाभीद, रोहान मुस्ताफा र इमरान हइदरले २–२ विकेट लिए।
त्यसअघि नेपालले टस जितेर पहिले बलिङ गर्ने निर्णय गरेपछि पहिले ब्याटिङ युएई ४ बल खेल्न बाँकी छदा १ सय ९५ रनमा अलआउट भयो।
युएईका लागि सातौं नम्बरमा ब्याटिङमा आएका अडनान मुफ्तीले शतक प्रहार गरे। सोमपालबाट बोल्ड हुनुअघि उनले १ सय ४ रन जोडे। उनले ८९ बलमा ८ चौका र ३ छक्का प्रहार गरे। कुनै समय खराब स्थितिमा रहेको युएईका लागि अडनालले उत्कृष्ट ब्याटिङ गरेका हुन्। मोहमद बोटाले ३७ रनको योगदान गरे।
त्यसअघि खराब ब्याटिङ गरेको युएईले १९ ओभर भित्र ५ विकेट गुमाउँदा केवल ३९ रन जोडेको थियो। सुरुवाती पाँच ब्याट्सम्यान दोहोरो अंकमा रन जोड्न नपाइ नेपाली बलरको सिकार बनेका थिए।
युएईका सुरुवाती ब्याट्सम्यानमाथि नेपालका तीब्र गतिका बलर सोमपाल कामी हाबी भएका थिए। सोमपालले सुरुवातका ४ ब्याट्सम्यानलाई सिकार बनाउदा एक विकेट कप्तान पारस खड्काले लिएका थिए।
बलिङतर्फ नेपालका सोमपालले ५ विकेट लिए। ललितसिंह भन्डारी, पारस खड्का, सागर पुन र सन्दीप लामिछानेले १–१ विकेट लिए।
यसअघि बुधबार भएको पहिलो खेलमा नेपाललाई युएईले ७ विकेटले पराजित गरेको थियो।
योसँगै २ वर्षसम्म चलेको च्याम्पियनसिप सकिएको छ। नेपाल आठ टिम मध्ये सातौं स्थानमा सीमित बन्यो। नेपालले १४ मध्ये ४ खेलमा मात्र जित निकाल्न सफल भयो ।
डब्लुसिएलको अन्तिम चरणअघि शीर्ष ४ मा पर्न सम्भव नभएपछि नेपाल र युएई दुवै डिभिजन–२ मा झरिसकेका थिए। डिभिजन–२ प्रतियोगिता आगामी फेब्रुअरीमा नामिबियामा हुनेछ। डिभिजन–२ मा ६ टिमबीच प्रतिस्पर्धा हुनेछ। डिभिजन–२ मा नेपाल, युएई, नामिबिया, केन्या, क्यानडा र ओमानले खेल्नेछन्। डिभिजन–२ मा शीर्ष २ टिम विश्वकप छनोट प्रतियोगिताका लागि छनोट हुनेछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749200817.png)
