२० लाख पर्यटक लुम्बिनी ल्याउन यसरी गरियो भ्रमण वर्ष उद्घाटन [फोटो फिचर]

फिचर

दीपक घिमिरे शनिबार, जेठ ४, २०७६ १७:०५

लुम्बिनी- २० लाख पर्यटकलाई लुम्बिनी पर्यटक भित्र्याउन प्रदेश ५ सरकारले लुम्बिनी भ्रमण वर्ष मनाउँदै छ। २५६३औं बुद्धपूर्णिमाको अवसर पारेर शनिबार भ्रमण वर्षको औपचारिक सुरुवात समेत गरिएको छ। राष्ट्रपति विद्या भण्डारीले लुम्बिनी भ्रमण वर्ष-२०७६ को लुम्बिनी पुगेर उद्घाटन गरेकी छन्।

कार्यक्रममा प्रधानमन्त्रीसहित संघीय सरकारका मन्त्रीहरु, प्रदेश ५ का मुख्यमन्त्रीसहित विभिन्न मन्त्री तथा उच्च ओहोदाका कर्मचारीको समेत सहभागिता रहेको थियो।

प्रधानमन्त्री केपी शर्मा ओलीले बुद्ध जन्मस्थल लुम्बिनीलाई विश्वशान्तिको प्रेरणास्थलको रुपमा विकास गर्ने प्रतिबद्धता जनाए।

लुम्बिनीस्थित थाई विहारमा आयोजित भिक्षुभिक्षुणीहरुलाई संघ दान गर्ने कार्यक्रममा बोल्दै प्रधानमन्त्री ओलीले बुद्धसमुदायसँगको सहकार्यमा लुम्बिनीको पुनर्जीवन दिने गरी काम अघि बढाउने प्रतिबद्धता गरे।

‘विगतका वर्षमा लुम्बिनीका लागि धेरै प्रयासहरुले सार्थक रुप लिदैँ गएका छन्,' उनले भने, 'यो वर्षदेखि योजनाबद्ध ढंगले सरकार अघि बढेको छ, लुम्बिनीबाट विश्वसमुदायलाई बुद्धका सन्देशहरु फैलाउनका लागि लुम्बिनीलाई पवित्र भूमिको रुपमा थप विकास गरिनेछ।’

लुम्बिनी विकास कोषका उपाध्यक्ष भिक्षु मेत्तेयले लुम्बिनीमा धार्मिक तथा पर्यटकीय गतिविधिहरु बढाउँदै लैजाने प्रतिबद्धता जनाए।

तर आवश्यको पूर्वाधारको समुचित विकास गर्न नसक्दा संघीय सरकारको समेत उतिकै चासो रहेको लुम्बिनीमा २० लाख पर्यटक पुर्याउने प्रदेश सरकारको लक्ष्य भने सहज देखिँदैन। जे होस् भ्रमण वर्षको उद्घाटन भव्यताका साथ सम्पन्न भएको छ।