काठमाडौं- प्रधानमन्त्री केपी शर्मा ओलीले मुलुकभित्र राष्ट्रिय एकता कायम हुन नदिने षड्यन्त्र भइरहेको बताएका छन्।
मदन-आश्रित स्मृति दिवस र पार्टी एकताको एक वर्ष पुगेको अवसरमा मदननगर बल्खुमा शुक्रबार आयोजित विशेष कार्यक्रमलाई सम्बोधन गर्दै प्रधानमन्त्री ओलीले राष्ट्रिय एकता हुन नदिने प्रयास भइरहेको बताए। विभिन्न कोणबाट नेपाली समाजमा विद्वेष र घृणा फैलाउने, पारस्परिक द्वन्द्व मच्चाउन खोज्ने प्रयास भइरहेको उनले दाबी गरे। सरकारको विरोध गर्ने नाममा समाजलाई अनुशासनहिन, अराजक र असभ्य बनाउने प्रयास भइरहेको भन्दै उनले त्यसतर्फ सरकार सजग रहेकाले प्रतिक्रियावादीहरु सफल नहुने भनाइ राखे।
राष्ट्रपतिले विश्वभर नै 'मेरो सरकार' भनेर नै सम्बोधन गर्ने गरेको भन्दै उनले राष्ट्रपतिको सम्बोधनलाई लिएर विपक्षी दलले 'स्याल हुइयाँ' मच्चाउने काम गरेको दाबी गरे। मेरो सरकारको विषय उचालेर नेपाली कांग्रेसले राष्ट्रपतिको भन्दा पनि गणतन्त्रतात्मक प्रणाली र पद्धतिको विरोध गरेको उनको टिप्पणी थियो।
'अहिले हाम्रो पार्टी बहुमतका साथ सरकारमा छ, कतिलाई पचेको छैन,' उनले भने।
सानो चित्त नपारौं
प्रतिक्रियावादी, नेपालविरोधी, जनविरोधी शक्तिका दुराकांक्षा विपरीत पार्टी एकतालाई मजबुत बनाउँदै पूर्णता दिने काम भएको र जनवर्गीय संगठनहरुको एकीकरण गरी नेतृत्वहरुको टुंगो लगाइएको उनले बताए।
'फराकिलो ढंगले पार्टी एकताको पक्षमा हामी छौं। त्यसैले यतिबेला चित्त सानो पार्ने होइन, मन दुखाउने होइन। यतिबेला फराकिलोपन र फराकिलो मनका साथ एकता र एकीकरणको भावनालाई ध्यानमा राख्दै हामी दुई पार्टी मिलाएर, दुई वैचारिक धारहरुलाई मिलाएर एउटा ठाउँमा ल्याउँदैछौं,' उनले भने, 'एउटा पार्टी बनाएका छौं। त्यसलाई नछुटिने गरी अन्तरघुलित गर्दैछौं।'
उनले पराजित प्रतिक्रियावादी शक्तिहरुले सहजै पराजय स्वीकार्न नसक्ने र उनीहरु सधैं जनताको खुसीलाई भत्काउन लागिपर्ने गरेकाले सरकारका आगाडि धेरै चुनौती रहेको बताए।
बालुवाटारको जग्गा, सुनकाण्ड, भ्रष्टाचार लगायतमा छानबिन सुरु गरेको सरकारविरुद्ध नै हमला भइरहेको भन्दै उनले गुनासो गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
