दमौली- नेपाल विद्युत प्राधिकरण तनहुँ वितरण केन्द्रले चालू आर्थिक वर्षको ९ महीनामा १ करोड २३ लाख ३ हजार ८ सय ६१ रुपैयाँ बक्यौता रकम असुल गरेको छ। चालू आर्थिक वर्ष २०७५/७६ को साउनदेखि चैत मसान्तसम्म विद्युत बक्यौता नतिर्ने ग्राहकको लाइन काटेर केन्द्रले बक्यौता असुल गरेको हो।
७ सय ५८ ग्राहकले विद्युत बक्यौता भुक्तानी नगरेको र लाइन काटेपछि ६ सय ५६ ग्राहकले बक्यौता रकम भुक्तानी गरेको केन्द्रका प्रमुख शिवनारायण गोशलीले जानकारी दिए। उनका अनुसार बक्यौता बुझाउने ग्राहकको लाइन पुनः जडान गरिएको छ।
केन्द्रले ६०औँ दिनभन्दा बढी समयसम्म महसुल नतिर्ने ग्राहकको लाइन दैनिकरूपमा काट्दै आएकाे छ। 'विद्युत महसुल सङ्कलन विनियमावली, २०७३' को विनियम ७ को उपविनियम ३ अनुसार मिटर रिडिङ गरेको सात दिनभित्र महसुल बुझाउने ग्राहकलाई बिल रकमको दुई प्रतिशत छुट प्रदान गरिन्छ भने आठ दिनदेखि २२औँ दिनभित्र महसुल बुझाएमा बिलअनुसारको महसुल लाग्नेछ।
गोशलीका अनुसार मिटर रिडिङ गरेको २३औँ दिनदेखि ३०औँ दिनसम्म विद्युत महसुल बुझाएमा पाँच प्रतिशत थप दस्तुर र ३१औँ दिनदेखि ४०औँ दिनसम्म विद्युत महसुल बुझाएमा १० प्रतिशत थप दस्तुर लाग्नेछ। साथै ४१औँ दिनदेखि माथि थप २५ प्रतिशत दस्तुर तिर्नुपर्ने हुन्छ। विनियमावलीको विनियम १० अनुसार मिटर रिडिङ गरेको ६०औँ दिनसम्म विद्युत महसुल नबुझाएमा विनासूचना जुनसुकै समयमा पनि विद्युत लाइन काट्ने व्यवस्था रहेको केन्द्र प्रमुख गोशलीले जानकारी दिए।
विद्युत चुहावट गर्नेलाई कारबाही
केन्द्रले सोही अवधिमा अनधिकृतरूपमा विद्युत चुहावट गर्ने १ सय १७ ग्राहकलाई कारबाही गरेको छ। वितरण केन्द्रले कारबाहीबाट ५ लाख ८८ हजार ८ सय १२ असुल गरेको छ। मिटर वाइपास गर्ने, मिटरमा पूरा खपत हुन नदिने, मिटरमा अन्य वस्तु प्रयोग गर्ने, मिटरको सिल तोड्ने/बिगार्नेलाई कारबाही गरिएको केन्द्रले जनाएको छ।
विद्युत चुहावट नियन्त्रण कार्यअन्तर्गत बन्द भएका, बिग्रिएका, मिटर फेर्ने, मिटरको छड्के निरीक्षण गर्ने, मिटर रिसिलिङ गर्ने, ठूला ग्राहकको टिओडी मिटरको खपत युनिट डाउनलोड गरी डाटा एनलाइसिस गर्ने, ट्रान्सफर्मर थप्ने, नयाँ लाइन विस्तार गर्ने, नाङ्गो तारलाई नयाँ कालो तारले विस्थापित गर्ने कार्य भइरहेको गोशलीले जानकारी दिए।
उनका अनुसार चालू आर्थिक वर्षमा ३ हजार २९ बन्द/बिग्रिएका मिटर फेरिएको छ भने ७ सय ४३ ग्राहकको मिटर रिसिलिङ तथा १ हजार १ सय जना ग्राहकको मिटर छड्के निरीक्षण गरिएको छ। ग्राहकको टिओडी मिटरको खपत चेक गरी हेर्दा छुट भएको करिब ३९ लाख २० हजार ३ सय ९१ रुपैयाँ बराबरको फाइल पेस भएकामा २८ लाख ६४ हजार ५ सय ९६ रकम छुट युनिट स्वीकृत भइआएको छ। स्वीकृत भएको छुट युनिट रकमको भुक्तानी सम्बन्धित ग्राहकबाट असुलीका लागि पहल भइरहेको केन्द्रले जनाएको छ।
विद्युत चुहावट घट्यो
केन्द्रलाई चालू आर्थिक वर्षमा विद्युत चुहावट घटाउन सफलता मिलेको छ। अघिल्लो वर्ष २०७४ साउनमा भएको २४.८८ प्रतिशत विद्युत चुहावट २०७५ चैतमा आउँदा ४.६९ प्रतिशतमा कायम राख्न वितरण केन्द्र सफल भएको छ। अघिल्लो आर्थिक वर्ष २०७४/७५ को समग्र विद्युत चुहावट १६.६७ प्रतिशत रहेकामा चालू आर्थिक वर्षको चैत मसान्तसम्म समग्र चुहावट ७.८३ प्रतिशत मात्रै रहेको केन्द्रले जनाएको छ।
गोशलीले भने, 'विद्युत चुहावटमा कडाइ गरिएकै कारण चुहावट घट्न सम्भव भएको हो।' उनका अनुसार ठूला ग्राहकको मिटर नियमित निरीक्षण, डाटा डाउनलोड, डाटा एनलाइसिस गर्ने, बन्द मिटर फेर्ने, सामुदायिक थोक मिटरमा एचटी मिटर राखिएका कारण पनि विद्युत चुहावट घटाउन सहज भएको हो। रासस
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।