जिल्ला प्रहरी प्रमुख प्रहरी उपरीक्षक कृष्णहरि शर्मा अभियानबारे जानकारी दिँदै। तस्बिर-इबागलुङ डट कम।
बलेवा- गत फागुन २५ गतेदेखि जिल्ला प्रहरी कार्यालय बागलुङले सदरमुकाममा लागुऔषध नियन्त्रणका लागि नयाँ अभियानको थालनी गर्यो। प्रहरीले थालेको यो अभियानले सदरमुकाम आसपासमा रहेका दुर्व्यसनीको पहिचान भएको जनाइएकाे छ।
प्रारम्भिक चरणमा सादा पोसाकमा खटिएको प्रहरीले दुर्व्यसनीको पहिचान गरेको हो। झण्डै एक हप्ताको प्रयासपछि दुई समूहमा आबद्ध ८ प्रहरीको समूहले ४० दुर्व्यसनी रहेको पत्ता लगाएको थियो। पहिचान भएका दुर्व्यसनीलाई प्रहरीले पक्राउ भने गरेको छैन। लागुऔषध दुर्व्यसनी कम गर्न अभियान चलाएको प्रहरीले दुर्व्यसनी र उनीहरुको परिवारलाई एकै ठाउँमा राखेर परामर्श दिएको जिल्ला प्रहरी प्रमुख प्रहरी उपरीक्षक कृष्णहरि शर्माले जानकारी दिए।
आफ्नै छोराछोरी दुर्व्यसनीमा लागेको विषयमा जानकारीसमेत नभएको परिवारमा पुगेका प्रहरीले लागुऔषध दुर्व्यसनीको असर र त्यसबाट परिवार तथा समाजमा पर्ने असरका विषयमा जानकारी गराउने गरेको छ। प्रहरीले लागुऔधष प्रयोगकर्तालाई पक्राउ गरेर कारबाही गर्ने कानुनी आधार नभएका कारण उनीहरुको पहिचान गरेर परामर्श दिने गरिएको शर्माले जानकारी दिए।
पहिचान भएका सबै दुर्व्यसनी प्रारम्भिक चरणको प्रयोगकर्ता भएकाले उनीलाई पारिवारिक वातावरणबाट सुधार गर्न थालिएको उनले बताए। अहिले पनि प्रहरीले उनीहरुको घरघरमा पुगेर परिवार र सेवनकर्ता सबैलाई राखेर परामर्श दिने गरेको छ।
लागुऔधको प्रयोग र व्यापारलाई नियन्त्रण गर्न सशक्त अभियान चलाइरहेको प्रहरीले थप २७ जनाको पहिचान गरेर पक्राउ नै गरेको छ। पक्राउ परेकामध्ये १३ जना प्रारम्भिक चरणकै प्रयोगकर्ता रहेकाले परामर्शपछि तारेखमा छोडिएकाे छ भने दुई वर्षभन्दा लामे समयदेखि निरन्तर लागुऔषध प्रयोग गर्दै आएका ६ जनालाई सुधार केन्द्र पठाइएको प्रहरी नायब उपरीक्षक झविन्द्र भट्टराईले बताए।
प्रहरीकै पैसा बोकेर फरार
जिल्लामा लागुऔषध प्रयोग भइरहेको जानकारी पाएको प्रहरीले ओसारपसारमा संलग्नलाई नियन्त्रणमा लिने प्रयास गरेको भएपनि असफल भएको जनाएको छ। सादा पोसाकमा प्रयोगकर्ताको रुपमा लागुऔषध खरिद गर्न पुगेका प्रहरीलाई नै ओसारपसारमा संलग्न एक व्यक्तिले १० हजार ५ सय ठगेर बेपत्ता भएका छन्।
पर्वतको मालढुङ्गामा लागुऔषध खरिदका लागि पुगेका प्रहरीसँग रकम लिएर लागुऔषध लिन भन्दै हिँडेका 'कुमार' भनेर चिनिने एक व्यक्ति बीचैबाट फरार भएको शर्माले जानकारी दिए। 'पहिले पैसा लिएर लागुऔषध दिने उनीहरुको तरिका हुँदोरहेछ, हामीले सोहीअनुसार रङ्गेहात पक्राउ गर्ने प्रयास गर्यौँ,' उनले भने, 'तर बिक्री गर्ने व्यक्ति पैसा लिएर फरार भयो।'
जिल्ला र आसपासका क्षेत्रमा उक्त व्यक्तिकाे खोजी भइरहेको शर्माले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778724016.jpg)
-1764146706.png)
