जनकपुर- जनकपुरसहित मिथिलाञ्चल क्षेत्रमा आज सोमबार जगत जननी माता जानकीको जन्मोत्सव ‘जानकी नवमी’ धुमधामका साथ मनाइँदैछ।
यस वर्ष जनकपुरलाई विकासको दिशामा अघि बढाउन एवम् मिथिलाको धार्मिक सम्पदा, कला, संस्कृति र भेषभूषालाई उजागर गर्न जानकी जन्माेत्सव धुमधामसँग आयोजना गरिएको छ।
बैसाख २२ बाट सुरु जन्मोत्सव जेठ ४ मा समापन हुनेछ। जन्माेत्सवमा धार्मिक प्रवचन, सांस्कृतिक प्रदर्शनी, रामायण मेला, मंगलधुन, रामायणमा आधारित हाजिरीजवाफ प्रतियोगितालगायतका कार्यक्रम आयोजना गरिँदैछ। मुख्य आयोजनाको दिन दूधमती नदीमा शाही स्नानको कार्यक्रमसमेत रहेको महन्थ रामरोशन दासले बताए।
त्रेतायुगमा जानकीले दूधमती नदीमा स्नान गरेको किंबदन्ती रहेकाे पाइन्छ। दासले जानकी जन्माेत्सवको दिन राष्ट्रिय बिदा दिनुपर्ने माग गरे। उनले भने, ‘सीता राष्ट्रिय विभूति हुन। तर, उहाँको जन्मदिवसमा राष्ट्रिय बिदा नदिनु विडम्बना हो।’ यद्यपी प्रदेश २ सरकारले आज जानकी नवमीको बिदा दिएको छ।
यसका साथै १५ दिने जानकी नवमीको अवसरमा आज राष्ट्रपति विद्यादेवी भण्डारी सहभागी हुने आयोजकले जनाएको छ।
जानकी मन्दिरले राष्ट्रपति, प्रधानमन्त्रीलगायत मुलुकका विशिष्ट व्यक्तिलाई औपचारिक निम्ता दिएपनि राष्ट्रपति भवनबाट मात्र सहभागिताको सहमतिपत्र प्राप्त भएको महन्थ दासले बताए।
अहिले सीताको जन्मोत्सव मनाउन जानकी मन्दिरलाई नवदुलहीझैं सिंगारिएको छ। मन्दिरको बाहिरी र भित्री परिसरमा पन्डालको निर्माण गरिएको छ। जहाँ धार्मिक प्रवचन र पूजापाठको काम भइरहेको छ। साथै ‘जानकी नवमी’का अवसरमा मिथिलाञ्चलमा दीपावली समेत गरिँदैछ।
मैथिली भाषा अनुयायीहरु यस दिनलाई मैथिली दिवसको रुपमा समेत मनाउने गर्दछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1771566457.png)
-1764146706.png)
