बुटवल- कपिलवस्तुबाट शङ्कास्पद ६६ मेट्रिकटन युरिया मल बरामद गरिएको छ। कपिलपस्तुको शिवराज नगरपालिका-७ मा रहेको जय अम्बे प्लाइउड इण्डस्ट्रिज रुद्रपुर र पशुपति प्लाइउड इण्डस्ट्रिज कम्पनी लोहरौलाबाट ठूलो मात्रामा युरिया मल नियन्त्रणमा लिइएकाे हाे।
जिल्ला प्रशासन कार्यालय कपिलवस्तुले सुराकीका आधारमा २ हजार ६ सय ४० बोरा मल नियन्त्रणमा लिएको हो। ४ सय ४० बोरा मल कम्पनीमै सिल गरिएको छ भने अन्य मल कन्टेनरसहित प्रशासनको नियन्त्रणमा राखिएकाे छ। चीनमा उत्पादन भएको युरिया मल प्लाइउड कम्पनीले भारतको कालकत्ता बन्दरगाह हुँदै भैरहवा भन्सार कार्यालयमार्फत नेपाल प्रवेश गराएको थियो। आज बिहान कम्पनीमा मल पुगेपछि प्रशासनले कन्टेनरसहित नियन्त्रणमा लिएको प्रमुख जिल्ला अधिकारी अर्जुनप्रसाद पोखरेलले जानकारी दिए।
युरिया मल आज कम्पनीमा पुगेपछि जिल्ला प्रशासन कार्यालय तौलिहवाको निर्देशनमा इलाका प्रशासन कार्यालय चन्द्रौटाले नियन्त्रणमा लिएको उनले बताए। युरिया मल औद्योगिक वा कृषि कुन प्रयोजनका लागि हाे भन्ने विषयमा यकिन नभएकाले नियन्त्रणमा लिइएको प्रजिअ पोखरेलकाे भनाइ छ।
समयमा मल नपाउँदा किसान चिन्तित भएका बेला उद्योगमा अधिक मात्रामा मल भेटिनुमा समेत शङ्का गरिएको छ। कपिलवस्तु किसान सङ्घका अध्यक्ष अनुपकुमार चौधरी भन्छन्, 'हामी मलका लागि भौंतारिरहेका छाैं, तर कम्पनीमा ६६ टन युरिया मल कहाँबाट आयो, यो सोचनीय विषय भएको छ।'
जय अम्बे प्लाइउड इण्डस्ट्रिजका सञ्चालक मनोज कनोडिया र पशुपति प्लाइउड इण्डस्ट्रिजका सञ्चालक अशोककुमार अग्रवाल सम्पर्कमा नरहेको बताइएकाे छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1769827973.png)
-1764146706.png)
