जनकपुर- मुख्यमन्त्री लालबाबु राउतले खुल्ला दिसामुक्त घोषणा अभियानमा प्रदेश–२ सबैभन्दा पछि परेको सुन्दा आफूलाई लाज लाग्ने गरेको बताएका छन्। मन्त्री राउतले प्रदेशलाई खुल्ला दिसामुक्त बनाउन आफूले आर्थिक, भौतिक सहयोग गर्ने मात्र नभई आवश्यक परेमा उपस्थित हुने समेत बताए।
वीरगन्जमा शुक्रबार प्रदेशस्तरीय खानेपानी तथा सरसफाइ स्वच्छता समन्वय समितिले आयोजना गरेको अन्तरक्रिया कार्यक्रममा बोल्दै मुख्यमन्त्री राउतले प्रदेश–२ लाई खुल्ला दिसामुक्त बनाउन प्रदेश सरकार र आफू हरेक तबरले सहयोग गर्न तयार रहेको स्पष्ट पारे।
‘प्रदेश–२ का कुन–कुन घरमा चर्पी छैन्, त्यसको विवरण प्रदेश सरकारलाइ दिनुस्’, मन्त्री राउतले भने, ‘चर्पी निर्माणका लागि के–के सामाग्री चाहिन्छ, त्यसका लागि प्रदेश सरकारले बजेट दिन्छ।’ खुल्ला दिसामुक्त अभियानलाई सफल बनाउन सडकमा दिशा गर्नेलाई धपाउन र सम्झाउन आफू जान तयार रहेको उनले बताए।
मधेसका कतिपय गरिब र दलित बस्तीका स्थानीयले जग्गाको अभावका कारण चर्पी बनाउन नसकेको भन्दै मुख्यमन्त्री राउतले भने, ‘त्यस्ता घरधुरीको विवरण पनि प्रदेश सरकारलाई उपलब्ध गराउनुस्, ती गरिब दलित बस्तीमा प्रदेश सरकारले सार्वजनिक शौचालय बनाइदिन्छ।’
'मुख्यमन्त्री स्वच्छता अभियान'अन्तर्गत प्रदेश–२ का आठ जिल्लामा रहेका १ सय सामुदायिक विद्यालयमा छात्राहरूका लागि छुट्टै चर्पी निर्माणको काम भइरहेको जानकारी मुख्यमन्त्री राउतले दिए।
कार्यक्रममा प्रदेश नम्बर–२ लाई आगामी असार मसान्तभित्र खुल्ला दिसामुक्त प्रदेश घोषणा गरिने जनाइएको छ। प्रदेश–२ का आठ जिल्लामध्ये सिरहा, सप्तरी र रौतहट खुल्ला दिसामुक्त जिल्ला घोषणा भइसकेका छन्। पर्सा, बारा, धनुषा, महोत्तरी र सर्लाही गरी पाँच जिल्ला मात्र अब खुल्ला दिसामुक्त क्षेत्र घोषणा हुन बाँकी छन्।
प्रदेश स्तरीय खानेपानी तथा सरसफाइ स्वच्छता समन्वय समितिका अनुसार यी पाँच जिल्लामा कुल ५ लाख ८६ हजार ९ सय ३५ घरधुरी छन्। तीमध्ये ५ लाख ६१ हजार ३ सय २८ घरधुरीमा चर्पी निर्माण भइसकेको छ भने २५ हजार ६ सय ७ घरधुरीमा भने अहिलेसम्म चर्पी नै छैन्।
अब चर्पी बनाउन बाँकी रहेका २५ हजार ६ सय ७ घरधुरीमा असार मसान्त भित्रै चर्पी निर्माण गरी प्रदेश–२ लाइ खुल्ला दिसामुक्त प्रदेश घोषणा गरिने राष्ट्रिय सरसफाइ तथा स्वच्छता समन्वय समिति नेपालका सदस्य सचिव इन्जिनियर देवेन्द्र झाले बताए। त्यसैगरी बारामा ७ हजार घरमा अहिले पनि शौचालय निर्माण हुन सकेको छैन।
पर्सामा ४ हजार ३ सय १६ घरमा शौचालय निर्माण गर्न बाँकी रहेको छ। पर्सामा १ सय १२ घर वडा रहेका छन्। जसमध्ये ९४ वटा वडामा खुल्ला दिसामुक्त क्षेत्र घोषणा भइसकेको छ भने १८ वटा वडालाई खुल्ला दिसामुक्त क्षेत्र घोषणा गर्न बाँकी रहेको सार्वजनिक गरिएको तथ्यांकमा उल्लेख गरिएको छ।
चर्पी नभएका घरधुरीमा चर्पी निर्माणको विषयलाई पहिलो प्राथमिकतामा राखेर काम गर्न सम्बन्धित स्थानीय तहलाई प्रदेश स्तरीय खानेपानी तथा सरसफाई स्वच्छता समन्वय समितिले आग्रह गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
