पहिलो संविधानसभामा ललितपुर ३ बाट विजयी पम्फा भुसालले संविधानसभाको दोस्रो चुनावमा भाग लिइनन्। त्यतिबेला उनी तत्कालीन एनेकपा माओवादी फुटाएका मोहन वैद्य नेतृत्वको दलमा थिइन्। माओवादीमा पुनरागमनसँगै नेतृ भुसाल १० वर्षअघि आफैंले जितेको ललितपुर क्षेत्र नम्बर ३ को उम्मेदवार बनेकी छिन्।
भुसालसँग नेपाल लाइभका किशोर दहालले कुराकानी गरेका छन्ः
मतदाता रिझाउने अन्तिम दिन कस्तो हुँदै छ?
घरदैलो, अन्तर्क्रिया, टोले मिटिङ, कोठे मिटिङ, साना सभा, ठूला सभा चलिरहेको छ। आज अन्तिममा खोकनामा जनसभा गरेर मेरो प्रचारप्रसार अभियान समाप्त हुँदै छ।
०७० सालमा ललिलपुरका ३ वटै क्षेत्र नेपाली कांग्रेसले जितेको थियो। यस पटक कांग्रेसबाट त्यो क्षेत्र खोस्न कत्तिको चुनौतीपूर्ण छ?
हामी यस पटक ललितपुरका प्रतिनिधि र प्रदेशसभाका गरी ९ वटै निर्वाचन क्षेत्र जित्नेछौं।
त्यसको आधार के हो?
मुख्य त जनआधार नै हो। यहाँ वामपन्थीको संगठन बलियो छ। वामपन्थी उम्मेदवारहरुले स्थानीय तहमा पाएको मतले पनि हाम्रो जितलाई संकेत गर्छ। त्यसो त यस पटक दुई वटा ठूला वामपन्थी पार्टीहरुको तालमेल पनि भएको छ। यसले पनि हाम्रो जितलाई सुनिश्चित गर्छ।
संगठनलाई छाडेर तपाईंको व्यक्तित्वलाई मात्रै विचार गर्दा जनताले तपाईंलाई किन मत दिने?
मेरो राजनीतिक जीवनका धेरै वर्षहरु मैले यो देशको राजनीतिक परिवर्तनका लागि आफूलाई समर्पित गरेँ। ३८ वर्षदेखि म ललितपुरलाई आधार मानेर राजनीति गरिरहेको छु। निर्वाचनपछि मेरो मुख्य भूमिका देशको आर्थिक विकास र समृद्धिका लागि हुनेछ। मैले राजनीतिक परिवर्तनका लागि जुन भूमिका खेलेँ, देशको आर्थिक विकास र समृद्धिमा पनि भूमिका खेल्न चाहन्छु। त्यसैले जनताले मलाई चुन्नेछन्।
तपाईं विजयी हुनुभयो भने संसदमा कस्तो कार्यकाल बिताउने योजना छ?
विशेषगरी म पार्टीको घोषणापत्रको मातहतमा बसेर काम गर्नेछु। मैले व्यक्तिगत रुपमा पनि प्रतिबद्धतापत्र बनाएको छु। त्यसलाई पनि ख्याल गर्नेछु। म यहाँ पर्यटन व्यवसायलाई नै आर्थिक विकासको आधार बनाउन चाहन्छु। कला, संस्कृति र सम्पदाको केन्द्र बनाउन चाहन्छु। म ललितपुरलाई सांस्कृतिक राजधानी बनाउन चाहन्छु। भौतिक पूर्वाधार र उद्योग कलकारखानाको विकास, सफा र स्वच्छ ललितपुर बनाउने मेरो परिकल्पना छ। ज्येष्ठ नागरिक, महिला, बालबालिका र युवा सबैको हितमा काम गर्छु।
महिलाको आर्थिक, सामाजिक र निर्णय क्षमता विकास लगायतका लागि पनि केही विशेष योजना छ कि?
संविधान र कानुनले दिएका अधिकारको पूर्णरुपले कार्यान्वयन गर्ने मुख्य कुरा हो। खास गरेर महिला समूह, दिदीबहिनी समूह, आमा समूह, महिलाले चलाएका सहकारी सबैलाई सुदृढ र व्यवस्थित गर्न तालिम सञ्चालन गर्ने तथा रोजगारीको अवसर सिर्जना गर्ने र व्यवसायको निम्ति मद्दत गर्ने योजना छ। यसले आर्थिक रुपमा सक्षम महिला निर्माण गर्नका लागि यी कुरा महत्त्वपूर्ण आधार हुनेछन्।
तपाईंलाई पहिलो महिला प्रधानमन्त्री बनूँ भन्ने लागेको छैन?
म केही हुन्छु भनेर राजनीतिमा लागेको त होइन। तर, केही पनि नहुन पनि राजनीतिमा लागेको होइन र निर्वाचन लडेको होइन।
रहर र दाबीको कुरा पनि होला कि?
अवसर पाए मैले गर्न सक्छु। तर, यस पटक यो अवसर मैले पाउने स्थिति मैले देख्दिनँ। मभन्दा शीर्ष नेताहरु हुनुहुन्छ। आफूलाई प्रधानमन्त्रीको रुपमा घोषणा गरिसक्नुभएको छ। म उहाँहरुलाई नै सहयोग गर्छु। अवसर पाउँदा म आफूले पनि यो पदको जिम्मेवारी लिन सक्छु।
अन्तिममा तपाईंको क्षेत्रका मतदाताहरुलाई केही भन्न चाहनुहुन्छ?
यो मत राजनीतिक परिवर्तनलाई संस्थागत गर्नका लागि हो। यो मत ५ वर्ष स्थायी सरकार निर्माण गर्नका लागिहो। यो मत आफ्नो सन्तानको आर्थिक विकास र समृद्धिका लागि हो। त्यसैले वाम गठबन्धनका सबै उम्मेदवारहरुलाई मत दिनुहुन अनुरोध गर्छु। त्यसमा म पनि पर्छु।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
