साढे २२ लाख अवैध विदेशी श्रमिक हटाएर यहीँका युवालाई रोजगार दिनु मेरो एजेन्डा : इस्तियाक राई

कर्पोरेट

नेपाल लाइभ सोमबार, मंसिर १८, २०७४ १८:०५

मधेसी जनअधिकार फोरमबाट राजनीति सुरु गरेका इस्तियाक राई नेपागञ्जका चर्चित युवा नेता हुन्। उनी २०६४ सालमै बाँके क्षेत्र नम्बर २ बाट सभासद बने। ३८ वर्षीय राईले २८ वर्षमा सभासद र ३२ वर्षमै मन्त्री बन्ने सौभाग्य पाए। झलनाथ खनाल नेतृत्वको सरकारमा ३ महिना श्रम मन्त्री पनि बने उनी। एक पटक चुनाव जितेका र एक पटक हारेका राई तेस्रो पटक बाँकेको २ बाट प्रतिनिधिसभा सदस्यको चुनावी मैदानमा छन्। उनीसँग 'नेपाली युवालाई नेपालमै रोजगार' भन्ने मुख्य नारा छ।

राजनीति शास्त्रमा एमए गरेका राईसँग आसन्न निर्वाचन, अवैध विदेशी श्रमिक लगायतका विषयमा नेपाल लाइभका कृष्ण अधिकारीले गरेको कुराकानी:

मतदाताको घरदैलोमा पुग्दा कस्तो प्रतिक्रिया कस्तो पाउनुभएको छ?
मधेसका जनता विभेदको अन्त्यका साथै विकास र समृद्धि चाहन्छन्। म लामो समयदेखि उपेन्द्र यादवले नेतृत्व गरेको मधेशी जनअधिकार फोरम (हाल संघीय समाजवादी फोरम) मै छु। म निरन्तर मधेसी जनतामाथि भइरहेको विभेदविरुद्ध लडिरहेको छु।

त्यसैगरी मधेसमा विकासका पूर्वाधारहरुको विकास गर्न र नेपाली युवालाई नेपालमै रोजगारी दिन आवश्यक छ। त्यसका साथै औद्योगिक र पर्यटकिय सहरको रुपमा नेपालगञ्जलाई विकास गर्नुपर्छ। मलाई चुनावीसभा र घरदैलोमा जँदा मतदाताले न्यानो स्वागत गरिरहेका छन्।

तपाई के–कस्ता एजेन्डाहरु लिएर मतदातासामु जानुभएको छ?
मधेसी जनतामाथि भइरहेको विभेद हटाउन संविधान संशोधन आवश्यक छ। यो मेरो मुख्य एजेन्डा हो।

नेपाली युवाहरुलाई नेपालमै रोजगारी दिने अर्को एजेन्डा हो। त्यो सम्भव पनि छ। नेपालमा रहेका करिब साढे २२ लाख विदेशी अवैध कामदार हटाएर नेपालमै नेपाली युवालाई रोजगार दिन सकिन्छ। नेपागञ्जलाई औद्योगिक र पर्यटकिय सहरको रुपमा विकास गर्नुपर्छ। ढल निकास, बाढी तथा डुबानको समस्या समाधान गर्ने, राप्ती नदीमा स्थायी तटबन्धको व्यवस्था गर्ने, नेपालगञ्ज विमानस्थललाई अन्तर्राष्ट्रिय स्तरको बनाउने, नेपालगञ्जमा विश्वविद्यालय निर्माण गर्ने, भेरी अञ्चल अस्पताललाई स्तरोन्नति गरी सरकारी मेडिकल कलेज बनाउने, सुक्खा बन्दरगाह, चक्रपथ निर्माण लगायतका हाम्रा एजेन्डाहरु छन्। हाम्रा एजेन्डा र प्रतिबद्धतामा जनताको भरोसा छ, त्यसकारण पनि हामीले जनताको साथ पाइरहेका छौं।

अवैध रुपमा नेपालमा काम गर्दै आएका विदेशीको संख्या साढे २२ लाख छ भन्नुभयो। उनीहरुलाई हटाउन सम्भव छ र?
नेपालको प्रचलित कानुन बमोजिम श्रम स्वीकृति नलिई कुनै पनि विदेशी श्रमिकले नेपालमा काम गर्न पाउँदैन। एकातर्फ नेपाली युवा काम नपाएर खाडी मुलुकमा गएर ४५ देखि ५५ डिग्री तापक्रममा काम गर्न बाध्य छन्। दैनिक हजारौं युवा श्रमको लागि विदेश पलयान भइरहेका छन्। श्रमको खोजीमा विदेशिएका नेपाली श्रमिकहरुको दैनिक नेपालमा २ देखि ३ वटा शव आउने कहालिलाग्दो अवस्था छ।

नेपालका उद्योग करकारखानामा श्रम स्वीकृत नलिई अवैध रुपमा भारतीय श्रमिकहरु काम गरिरहेका छन्। नेपालीले गर्न सक्ने सबै काममा अनिवार्य रुपमा नेपाली श्रमिकलाई प्राथमिकता दिने र यहाँ आवश्यक पर्ने दक्ष श्रमिकका लागि तालिमहरु सञ्चालन गर्न सके नेपालमै नेपालीले रोजागर पाउन सक्छन्।

म श्रममन्त्री हुँदा २०६८ सालमा विदेशीलाई श्रम स्वीकृतिका लागि सूचना जारी गर्दा ३ दिनभित्र करिब ६० हजारले निवेदन दिएका थिए। दुर्भाग्यवश त्यतिबेला सरकार परिवर्तन भयो र मैले थप काम गर्न सकिनँ। मैले अवसर पाउने हो भने यो योजनालाई सफल बनाउन सक्छु।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

जय नेपाल कप शुरु, त्रिभुवन विश्वविद्यालयको बिजयी सुरुआत

स्ववियु निर्वाचन चैत ५ गते हुने

स्वास्थ्य बीमा सुधारका लागि स्वास्थ्यमन्त्री प्रदीप पौडेलद्वारा आन्तरिक थालनी, कार्ययोजना बनाउने प्रक्रिया सुरु