मदनकुमारी शाह (गरिमा) कैलाली-१ बाट चुनावी प्रतिस्पर्धामा छिन्। उनी ०६४ सालको निर्वाचनमा यही क्षेत्रबाट पराजित र ०७० सालमा समानुपातिक तर्फबाट सभासद बनेकी थिइन्। यसपटक उनी पुनः वाम गठबन्धनबाट प्रत्यक्षतर्फकै उम्मेदवार बनेकी हुन्। उनका चुनावी एजेन्डा र भावी योजनालाई लिएर नेपाल लाइभका किशोर दहालले गरेको कुराकानीः
२०६४ सालको चुनावमा पराजित हुनुभयो। तर ०७० मा समानुपातिक तर्फबाट सभासद हुनुभयो। यसपटक पुनः प्रत्यक्षतर्फ नै प्रतिस्पर्धामा उत्रिनुभएको छ। किन?
०७० सालको संविधानसभामा समानुपातिकबाटै भए पनि मैले प्रतिनिधित्व गर्ने अवसर पाएको थिएँ। संविधान निर्माण प्रक्रियामा मैले पनि सक्रिय भूमिका निर्वाह गरेँ। त्यो संविधानमा उल्लेख भएका राजनीतिक अधिकारहरुलाई व्यावहारिक रुपमा लागू गर्नका लागि धेरै कानुन निर्माण गर्नुपर्नेछ। म त्यो अभियानमा सामेल हुन चाहन्छु। त्यस्तै, यसअघि सांसदको भूमिकामा रहँदा मैले केही कामहरुको सुरुवात गरेको थिएँ, तीमध्ये केही अधुरा र केही प्रक्रियामा छन्। त्यसलाई पूरा गर्न चाहन्छु। स्थिर सरकार बनाएर मुलुकलाई विकासको गतिमा लैजाने वाम गठबन्धनको लक्ष्य छ। त्यसमा पनि सहभागी बन्नुछ। न्याय, समानता र समाज परिवर्तनको लागि मैले हिजोदेखि नै आन्दोलन गरेको हुँ र आज पनि आन्दोलनरत नै छु। अहिले आन्दोलनका स्वरुप परिवर्तन भएका छन्। त्यसलाई जारी राख्ने मेरो इच्छा छ।
प्रक्रियामा रहेका कामहरु पूरा गर्नुपर्नेछ भन्नुभयो। ती कामहरु केके हुन्?
म नेपालको संस्कृति झल्कने खालको नेपाल जातीय संग्रहालय बनाउन लागेको छु। त्यो निर्माणाधीन छ। मलाई लाग्छ, सबैभन्दा छिटो आर्थिक गतिविधि ल्याउन सक्ने क्षेत्र भनेको पर्यटन हो। ७ नम्बर प्रदेशमा पर्यटनको गुरुयोजना बनाउन चाहन्छु। यो क्षेत्रलाई पर्यटकीय क्षेत्रको रुपमा प्रचारप्रसार र प्रवर्द्धन गर्न चाहन्छु। त्यसका लागि मैले काम पनि प्रारम्भ गरिसकेको छु। आर्थिक गतिविधि बढाउनका लागि ठूल्ठूला सडक आवश्यक पर्छ। त्यसका लागि पनि बहस र छलफललाई अगाडि बढाइरहेको छु।
निकै कम महिलाहरुले मात्रै प्रत्यक्षतर्फको टिकट पाएको बेलामा तपाईंले टिकट पाउन कसरी सम्भव भयो?
०७० सालमा म सांसद भएपछि संविधान र विकास निर्माण अनि पार्टीको संगठन विस्तारमा मैले खेलेको नेतृत्वदायी भूमिकालाई ख्याल गरेर पार्टीले प्रत्यक्षतर्फको उम्मेदवारका लागि सक्षम र योग्य छ भनेर चयन गरेको हो। यसका लागि म मानसिक रुपले पनि तयार थिएँ। मैले यो अवसर दिनुपर्छ भनेर पनि माग गरेको थिएँ। र, अन्ततः पार्टीले मलाई यो अवसर पनि प्रदान गर्यो।
यसपटक तपाईंको चुनावी एजेन्डाहरु केके छन्?
मुख्यत: यो क्षेत्रमा आर्थिक विकास गर्ने र आर्थिक गतिविधिको केन्द्र बनाउने नै हो। यहाँ व्यापारिक नाका बनाउने हो। त्यसका लागि छोटी भन्सारको स्तरोन्तति गर्ने, खक्रौला–टीकापुर–लम्कीको सडकलाई चार लेनको बनाउने लगायतका सडक निर्माणका कामहरु छन्। तल्लो कर्णालीमा १० हजार मेगावाटको आयोजना निर्माण गर्ने भन्ने छलफल र प्रारम्भिक कार्यक्रम भएका छन्। यसैलाई तीव्रता दिन पहल गर्ने भन्ने योजना छ। यी लगायत केही ठूला योजनाहरु पनि छन्।
त्यस्तै, दैनिक आधारभूत आवश्यकता छन्। जस्तै, कृषि, बाटोघाटो, पुल निर्माण, स्वास्थ्य केन्द्र, विद्यालयको स्तरोन्नतति, महिलाहरुलाई आयआर्जन र स्वआर्जनका लागि तालिम दिने, युवाहरुलाई खेलकुदको माध्यमबाट अनुशासन बनाउने, राष्ट्रप्रति प्रतिबद्ध बनाउने, राष्ट्रिय भावना जगाउने र त्यसका लागि प्रत्येक वडामा एउटा खेल मैदान बनाउने योजना छ। र, मैले यी काम गर्छु भनेर प्रतिबद्धता व्यक्त गरेको छु।
कैलालीका महिलाहरुको जीवनस्तर उकास्नका लागि केके गर्नुहुन्छ?
सांसद हुँदा मैले यहाँ धेरै तालिमहरु सञ्चालन गरेको थिएँ। हाम्रा जुन परम्परागत सिपहरु छन्, त्यसलाई ‘प्रमोशन’ गर्नुपर्छ भन्ने मेरो मान्यता छ। मैले भनेको छु, म निर्वाचित भएर गएँ भने मेरा दिदीबहिनीले बुनेका ढकियाहरु बेचेर पैसा कमाउने वातावरण निर्माण गर्छु। कुचोहरु बेचेर, बारीमा फलाएका तरकारीहरु बिक्री गरेर पैसा कमाउने वातावरण निर्माण गर्छु। यस्तै कृषि क्षेत्रमा रोजगार र स्वरोजगार बनाएर पैसा कमाउने वातावरण बनाउनारे पनि मसँग योजनाहरु छन्।
मतदातालाई केही भन्न चाहनुहुन्छ?
यो समाजमा हामीले साँच्चिकै आर्थिक र सामाजिक विकास गर्ने हो भने हामीले सामाजिक सद्भाव र एकता निर्माण गर्दै यो राष्ट्र निर्माण गर्नुपर्छ। त्यसका लागि आर्थिक समृद्धि आवश्यक छ। त्यो काम बलियो र स्थिर सरकारले मात्रै गर्न सक्छ। त्यो वाम गठबन्धनले मात्रै दिन सक्छ। त्यसका लागि वाम गठबन्धनका उम्मेदवारहरुलाई विजयी गराइदिन अनुरोध छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1785910910.png)
-1764146706.png)
