विश्वनाथ रिजाल (त्रिलोचन) ०३५ सालदेखि नेपाली कांग्रेसको राजनीतिमा सक्रिय छन्। उनलाई कांग्रेसले मोरङ क्षेत्र नम्बर– ४ को प्रदेश सभा ‘ख’ को उम्मेदवार बनाएको छ।
रिजालले वाम–गठबन्धनको तर्फबाट नेकपा एमालेका जीवन घिमिरेसँग प्रतिस्पर्धा गर्दै छन्। मोरङ ४ मा प्रतिनिधिसभामा कांग्रेसको तर्फबाट पूर्व अर्थमन्त्री महेश आचार्य र वाम गठबन्धनका तर्फबाट माओवादी केन्द्रका अमनलाल मोदी चुनावी मैदानमा रहेकाले त्यस क्षेत्रको प्रतिस्पर्धा रोचक बनेको छ। रिजालसँग नेपाल लाइभका नवीन अर्यालले विराटनगरमा गरेको कुराकानीः
निर्वाचनको माहौल कस्तो छ?
संघीय संरचना अनुसार पहिलो पल्ट हुन लागेको निर्वाचनको विषयमा आम मतदातालाई ठूलो चासो छ। मानिसहरू आफ्नो विवेकपूर्ण मत जाहेर गर्न तयार भएर बसेका छन्। विभिन्न सभामा मतदाताको उपस्थिति पनि राम्रो पाएको छु। उहाँहरूलाई नयाँ संविधान अनुसार संघीयताको कार्यान्वयन कसरी हुन्छ भन्ने कुरामा व्यग्र प्रतीक्षा छ।
तपाईंको चुनावी अभियान चाहिँ कस्तो चलिरहेको छ?
निकै राम्रो भइरहेको छ। करिब ४० वर्ष अनवरत नेपाली कांग्रेसमा काम गरेको हुनाले मप्रति सबै जना विश्वस्त छन्। ०४९ देखि ०५४ सम्म वडा नम्बर–१ को निर्वाचित अध्यक्ष भएर मैले इमानदारीपूर्वक गरेको कामको सबैले मूल्यांकन गरेका छन्। गणतन्त्र स्थापना गर्दा ५० दिन विराटनगरको कारागारमा थुनिएको घटना पनि कसैले बिर्सिएका छैनन्।
जितप्रति कत्तिको विश्वस्त हुनुहुन्छ?
चुनावमा उठ्ने भनेकै जित्नका लागि हो। मेरो हकमा यो क्षेत्रमा लामो समयदेखि काम गरेको हुनाले मप्रति सबैको स्नेह छ। त्यसैले म जितप्रति विश्वस्त छु। विजय गच्छदार नेपाली कांग्रेसमा प्रवेश गरेपछि हाम्रो अवस्था मोरङ र सुनसरीमा बलियो भएको छ।
जनताको चाहना के पाउनुभएको छ?
यसपाली राजनीतिक मुद्दाभन्दा पनि जनताले विकास चाहेका छन्। उनीहरू आफ्नो क्षेत्रमा बाटो, स्वास्थ्य, शिक्षा क्षेत्रमा विकास गर्ने र बाढी कटानको प्रभाव रोक्न सक्ने उम्मेदवार खोजिरहेका छन्। उनीहरू आफ्नो उम्मेदवार इमानदार होस् र रोजगारी सिर्जनाका लागि पनि काम गरोस् भन्ने चाहना राखिरहेका छन्।
मतदातामाझ के–कस्ता एजेन्डा लिएर जानुभएको छ?
हाम्रो पहिले नै पार्टीको घोषित एजेन्डा छँदैछ। यसमा पनि स्थानीय स्तरमा लामो समयदेखि काम गरेको र आफ्नो निर्वाचन क्षेत्रलाई बुझेको भएर मैले थप समस्या समाधानका लागि एजेन्डा बनाएको छु। सिघियाँ खोला कटानले सधैं यो क्षेत्रका जनतालाई दुःख दिइरहेको छ। यसको स्थायी समाधानको एजेन्डा हामीसँग छ। यो क्षेत्रबाट शिक्षा, स्वास्थ्यको नाममा ठूलो मात्रामा पुँजी पलायन भइरहेको छ। रोजगारीको अभावमा धेरै जना विदेश पलायन भएका छन्। यी सबैको न्यायपूर्ण सम्बोधनका लागि संघीय सोचमा काम गर्न हामी तयार छौं।
यही क्षेत्रमा अन्तर्राष्ट्रिय रंगशालाका लागि जग्गा किनेर काम सुरु भएको छ। हामी त्यसलाई नमुना बनाउन चाहन्छौं र अन्तर्राष्ट्रिय प्रतिभा जन्माउन चाहन्छौं। सुरक्षाको अभावमा व्यापारीहरू पलायन भएका छन्। हामी उनीहरूलाई सुरक्षा दिएर पुनः यो क्षेत्रमा फर्काउन चाहन्छौं।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
