शान्ति प्रक्रिया टुंगोमा पुर्याउन, गणतन्त्र कार्यान्वयन गर्न र संविधान निर्माणका लागि सक्रिय र संयोजनकारी भूमिका कृष्णप्रसाद सिटौला यसपटक पनि झापाबाट चुनावी प्रतिस्पर्धामा छन्। संविधान कार्यान्वयनको महत्त्वपूर्ण चरणको रुपमा रहेको यसपटकको चुनावमा उनीसँग वामगठबन्धनका पनि साझा उम्मेदवार रहेका राप्रपाका राजेन्द्र लिङ्देनले मुख्य प्रतिस्पर्धा गर्दैछन्। अहिले निर्वाचनको सिलसिलामा झापाको विभिन्न ठाउँमा व्यस्त रहेका सिटौलासँग उनकै निवास चन्द्रगढीमा नेपाल लाइभका लागि नवीन अर्यालले गरेको कुराकानीः
तपाईंलाई चौतर्फी घेराबन्दीमा पार्न खोजिएको हो?
नेपाली राजनीतिमा झापा जिल्लाको विशिष्ट योगदान छ। यहाँ १३ दिन आन्दोलनले चर्को रुप लिएपछि २०४६ सालमा प्रजातन्त्र आयो। ७ दिन आन्दोलन चर्केपछि गणतन्त्र स्थापना भयो। २०४६ सालमा व्यवस्था परिवर्तनका लागि आन्दोलन हुँदा जनताको छोरा मार्नेहरु, २०६२–६३ मा शाही शासन उखेल्दा जनताको छोराको रगतमा फोहोरी खेल खेल्नेहरु अहिले मलाई विभिन्न आवरणमा घेर्न खोजिरहेका छन्।
तपाईं सबै धर्मलाई समान रुपले हेरिनुपर्छ भन्दै आइरहनुभएको छ तर अहिले हिन्दु धर्म नष्ट गर्यो भनेर मुद्दा बनाइरहेका छन् नि?
म राजनीतिक दृष्टिकोणले हिजो पनि स्पष्ट थिए, आज पनि छु। राज्यको कुनै धर्म हुँदैन। यसले सबैलाई समान दृष्टिकोणले हेर्न सक्नुपर्छ। प्रश्न हार जितको हुँदै होइन। विकृत विचार र भिजन नभएका मानिसहरुले मात्र यस्तो बोल्छन् र काम गर्छन्। उहाँहरु एकातिर गएर वाम गठबन्धनलाई गाली गर्नुहुन्छ। यहाँ भने मलाई गाली गरिरहनु भएको छ।
राप्रपाका नेता तथा पूर्वप्रतिस्पर्धी विरुद्ध फेरि लड्दै हुनुहुन्छ, यो प्रतिस्पर्धालाई कसरी हेर्नुभएको छ?
निर्वाचनमा उठेपछि प्रतिस्पर्धा त भइहाल्छ। तर, यति ठूलो परिवर्तनपछि जनताको संघीय लोकतान्त्रिक संविधान कार्यान्वयन गराउन भइरहको पहिलो निर्वाचनमा मेरो कामको मूल्याङ्कन अन्य राजनीतिक दलका नेताहरुले नगरे पनि यहाँका जनताले गर्छन् भन्ने लागेको छ। मैले प्रतिकूल अवस्थामा गणतन्त्र संस्थागत गर्न मोलेको जोखिम सबैमाझ जगजाहेर छ।
चन्द्रगढीमै बन्न लागेको जेपी स्मृति सभागृहको शिलान्यास गर्न तत्कालीन प्रधानमन्त्री सुशील कोइराला, केपी ओली र प्रचण्ड यहाँ आउँदा मैले नै जनताले चाहेको संविधान लेख्न सबै नेतासँग आग्रह गरेको थिए। यहीँबाट एउटा माहोल बन्यो। अहिले संविधान बनेर कार्यान्वयन हुँदैछ। उहाँहरु सबैले त्यतिबेला सहिदको रगतको अपमान हुन दिन्नौं, मिलेर देश बनाउँछौं भन्ने संकल्प लिनुभएको थियो। तर, अहिले मेरा विरुद्ध राम थापा, राजेन्द्र गिरी, सुरज विश्वासलाई सहिद बनाउने राप्रपाका यिनै मानिसहरुलाई वाम गठबन्धनको नाममा सघाइरहनु भएको छ।
भनेपछि वाम गठबन्धन पूरै तपाईप्रति लक्षित छ?
राप्रपालाई एमालेले सघाइरहेको छ। यसमा कुनै दुबिधा छैन। तर, राप्रपा आफैं ३ पटक टुक्रिसकेको पार्टी हो। यो खिइसकेको छ। यस पार्टीमा आवद्ध मानिसहरु नेपाली कांग्रेस प्रवेश गरिसकेका छन्। राष्ट्रिय रुपमा पनि पार्टीको हैसियत कमजोर छ। यस्तो अवस्थामा जनताको मतको अपमान गर्ने काम नहोस् भन्ने मेरो आग्रह हो। देशमा यति ठूलो परिवर्तनका लागि क्रान्ति भयो। त्यतिबेला उहाँहरु कहाँ हुनुहुन्थ्यो? सहिदको रगतको सम्मान हुनुप¥यो भन्ने मेरो भनाइ हो।
तपाईले आफ्नो ठाउँको विकासमा ध्यान दिनुभएन भन्ने आरोप छ नि?
मलाई आरोप लगाउनेहरुले आफ्नो गाउँको अनुहार राम्रोसँग हेर्दा हुन्छ। मेरो क्षेत्रमा अहिले विकास निर्माणको लागि ५ अर्बको काम भइरहेको छ। देशका अन्य ठाउँमा यति धेरै बजेटको काम सञ्चालनमा छैनन् होला। जेपी स्मृति सभागृह बनिरहेको सबैले देखेका छन्। चारआली र भद्रपुरमा बाटो निमार्णको काम भइरहेको छ। अर्को वर्षसम्म भद्रपुरमा सडक निमार्णको कार्य पूरा भइसक्ने छ। ग्रामीण क्षेत्रमा खानेपानी आयोजना सञ्चालनमा छन्। एयरपोर्टको स्तरोन्नतिका लागि १ अर्बको आयोजना पनि कार्यान्वयनमा छ। यो मैले गफ गर्नलाई भनेको होइन। सबै जना यहाँ आएर हेर्न सक्छन्। झापा क्षेत्र नम्बर ३ को विकास निमार्णका लागि बजेट विनियोजन भएको छ कि छैन, त्यो बुझ्दा पनि हुन्छ।
जितप्रति कत्तिको सुनिश्चित हुनुहुन्छ?
निर्वाचन उठ्ने भनेको जित्नका लागि हो। मलाई लाग्छ, गणतन्त्र स्थापनाका लागि मैले खेलेको भूमिकाप्रति यस क्षेत्रका जनताले न्याय गर्नेछन्। सहिदको रगतको अपमान हुने छैन भन्ने मेरो बुझाई छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
-1724654184.jpg)
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
