काठमाडौं– निर्वाचन नजिकिएसँगै प्रतिनिति र प्रदेशसभाका उम्मेदवारहरुले चुनावी प्रचार-प्रसारलाई तीव्र पारेका छन्। कतै आमसभा, कतै घरदैलो कार्यक्रमले देश नै चुनावी माहौलमा होमिएको छ। यस्तै, सामाजिक सञ्जालमार्फत पनि आफूले मन पराएका उम्मदवारका लागि भोट माग्ने र पक्षमा लबिङ गर्ने क्रम बढेको छ। यसैबीच, काठमाडौं क्षेत्र नम्बर–४ मा नेपाली कांग्रेसका तर्फबाट प्रतिनिधिसभाका प्रत्यक्ष उम्मेदवार गगन थापाका लागि विभिन्न पेशाका प्रतिष्ठित व्यक्तित्वले भोट मागिरहेका छन्।
उनका पक्षमा चिकित्सा शिक्षा सुधारका अभियन्ता डा गोविन्द केसी, चेलिबेटी बेचविखन विरुद्ध सक्रिय माइती नेपालकी अध्यक्ष अनुराधा कोइराला, क्रिकेटर शरद भेषावकर र आँखा रोगका लागि विश्वमै नाम कहलिएका डा सन्दुक रुइतसम्मले खुलेरै भोट मागेका छन्।
डा केसी, कोइराला र भेषावकरले भिडियो सन्देश नै रेकर्ड गरेर थापालाई जिताउन अपिल गरेका छन्। डा रुइतले भने टिभी अन्तर्वार्तामार्फत गगनलाई जिताउन आह्वान गरेका हुन्।
डा केसीले चिकित्सा शिक्षा सुधारमा थापाले खेलेको भूमिका सह्रानीय रहेको भन्दै उनीजस्ता व्यक्ति सांसद चुनिएर आउन जरुरी रहेको बताएका छन्। उनले भनेका छन्, ‘चिकित्सा शिक्षाका लागि हामीले गरेको तेस्रो सत्याग्रहदेखि नै उहाँ सक्रिय हुनुहुन्छ। सुधारको काम जहाँसम्म पुगेको छ, त्यसमा उहाँको पनि योगदान छ।’
डा गोविन्द केसी
यसैगरी, डा केसीले थापालाई अख्तियार दुरुपयोग अनुसन्धान आयोगका तत्कालीन प्रमुख लोकमानसिंह कार्कीविरुद्ध उभिने एक मात्र सांसद भनेका छन्। ‘लोकमानले समानान्तर सरकार चलाएर प्रजातन्त्र खतरामा पारेका बेला महाअभियोगका लागि ६०१ मा ३ जना सांसद जुटाउन मुस्किल भयो। तर, गगन थापाले आफैं अघि सरेर जुटाउनुभयो,’ डा केसीले भनेका छन्, ‘संसदमा जनताका हकहितका लागि बोल्न नहिचकिचाउने थापाका लागि मतदान गर्न आह्वान गर्छु।’
यसैगरी, काठमाडौं क्षेत्र नम्बर ४ मै बसोबास गर्दै आएका राष्ट्रिय क्रिकेट टिमका खेलाडी शरद भेषावकरले पनि थापाको पक्षमा भोट मागेका छन्। देश परिवर्तनका लागि युवा नेतृत्व जरुरी रहेको भन्दै उनले गगनबाट आफूले त्यो अपेक्षा गरेको बताएका छन्।
शरद भेषवाकर
सिएनएसन हिरोसमेत रहेकी कोइरालाले संविधान निर्माणमा थापाले सक्रिय भूमिका निर्वाह गरेको र छोटो समय स्वास्थ्य मन्त्री हुँदा स्वास्थ्य क्षेत्रमा प्रणाली बसाएको भन्दै उनका पक्षमा भोट मागेकी छिन्। उनी भन्छिन्, ‘उहाँको परीक्षा पनि भएको छ र पास पनि हुनुभएको छ। उहाँ जस्ता व्यक्ति फेरि पनि चुनिएर आउँदा सबैका लागि राम्रो हुन्छ।’
अनुराधा कोइराला
यसैगरी, डा सन्दुक रुइतले पनि एक टिभी अन्तर्वार्तामा थापा स्वास्थ्य मन्त्री भएपछि आफूले मन्त्रालयको वातावरणमै परिवर्तन पाएको बताएका छन्। उनले थापाजस्तो व्यक्ति निर्वाचित हुनुपर्ने उल्लेख गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
