काठमाडौं– निर्वाचन आयोगले निर्वाचनको प्रचारप्रसारमा शहीदसँग सम्बन्धित अडियो, भिडियो र तस्बिर जस्ता सामग्री इन्टरनेट र सामाजिक सञ्जालबाट तत्काल हटाउन निर्देशन दिएको छ। मंसिर २१ मा हुने प्रदेश र प्रतिनिधिसभा निर्वाचनको प्रचारप्रसारमा शहीदलाई प्रयोग गरेर मत माग्ने काम भइरहेको बताउँदै आयोगले गम्भीर ध्यानाकर्षण भएको जनाएको छ।
विशेषगरी प्रदेश नम्बर–२ सहितका विभिन्न जिल्लामा आन्दोलनका अडियो, भिडियो र फोटो तथा शहीदको तस्बिरलाई सामाजिक सञ्जालमा राखेको पाइएको उल्लेख गर्दै सो कार्य निर्वाचन आचारसंहिता विपरीत रहेको आयोगले जनाएको छ। त्यस्ता सामग्रीले शहीदको सम्मानमा आघात पुग्ने भएकाले निर्वाचन आचारसंहिता विपरीतका त्यस्ता सामग्री तत्काल हटाउन आयोगले सम्बद्ध सबै प्रयोगकर्तालाई निर्देशन दिएको हो।
निर्वाचन आयोगका सहसचिव समेत रहेका प्रवक्ता नवराज ढकालद्वारा जारी विज्ञप्तिमा भनिएको छ, ‘ती सामग्री अविलम्ब हटाउनका लागि आवश्यक सहयोग गर्न सबै राजनीतिक दल, उम्मेदवार, नागरिक समाज, सञ्चारकर्मी तथा स्थानीय तहमा निर्वाचित जनप्रतिनिधिसँग आयोग हार्दिक अपिल गर्छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
