पशुपतिदयाल मिश्रा नेपालगञ्जका नाम चलेका नेता हुन्। हिरमुनिया गाविसको अध्यक्ष हुँदै राजनीति सुरु गरेका ५८ वर्षीय मिश्राले गाविस महासंघ बाँकेको अध्यक्ष, जिविस बाँकेको सभापति, सुकुम्बासी समस्या समाधान आयोग बाँके-बर्दियाको संयोजकको जिम्मेवारी पूरा गरिसकेका छन्। नेपाली कांग्रेस, राष्ट्रिय प्रजातन्त्र पार्टी, तराई मधेस लोकतान्त्रिक पार्टी हुँदै राजपाको केन्द्रीय सहमहामन्त्रीको जिम्मेवारीसम्म पुगेका मिश्रा राजपासँग असन्तुष्ट हृदयेश त्रिपात्री समूहका प्रभावशाली नेता हुन्। हालको २ नम्बर क्षेत्रमा ३ पटक चुनाव लडिसकेको उनीसँग अनुभव छ।
राप्रपा, स्वतन्त्र तमलोपाबाट चुनाव लडिसकेका उनी यस पटक एमालेको सूर्य चिह्न लिएर वाम गठन्धनबाट चुनावी मैदानमा छन्।
अर्थशास्त्रमा स्नातकोत्तर मिश्रा नेपालगञ्ज विश्वविद्यालय, नेपालगञ्जमा विशेष आर्थिक क्षेत्र निर्माण अभियानका अगुवा हुन्। मधेस आन्दोलनका अगुवासमेत रहेका उनीसँग निर्वाचनको सेरोफेरोमा नेपाल लाइभका कृष्ण अधिकारीले गरेको कुराकानी:
तपाईं मधेसी दलको नेता, मधेस विरोधी पार्टीको आरोप लागेको एमालेको सूर्य चुनाव चिह्न लिएर मतदाताको घरदैलोमा पुग्दा कस्तो प्रतिक्रिया आइरहेको छ?
मधेसका जनता विकास र समृद्धि चाहन्छन्। देशका अन्य क्षेत्रमा भन्दा मधेसमा विकास गर्न धेरै सहज छ। तर मधेसी जनताले अहिले पनि राज्यले उपलब्ध गराउने आधारभूत सुविधा सहज रुपमा पाउन सकेका छैनन्। पहाड र हिमालका दुर्गम बस्तीमा जस्तै गरिबी र बेरोजगारीको मारमा छन् उनीहरु। यहाँका जनता आफ्नो घरमा विद्युत र आँगनमा पक्की सडक होस् भन्ने चाहन्छन्। त्यसका लागि स्थायी सरकार आवश्यक छ।
स्थायी सरकार भएपछि मात्रै विकास र समृद्धि सम्भव छ। मधेसी जनताको हकअधिकार वाम गठबन्धनबाट मात्रै सम्भव छ भन्ने निष्कर्षका साथ म र मेरा साथीहरुको टिम वाम गठबन्धनसँग सहकार्य गरेर चुनावी मैदानमा आएका छौं। एमालेलाई निषेध गरेर मधेसका समस्या समाधान नहुने भएकाले एमालेसँग सहकार्य भएको हो।
मधेशी जनताको हकअधिकारका लागि संविधान संशोधनको कुरा गर्ने, पटक पटक सरकारमा पनि बस्ने तर सत्तारुढ दलकै दुई तिहाइ बहुमत हुँदा संशोधन नगर्ने मधेसी दल, कांग्रेस र राप्रपाको असली चरित्र जनताले राम्रोसँग बुझेका छन्। त्यसैले वाम गठबन्धनको संसदमा प्रस्ट बहुमत कायम गराएर मात्रै मधेसी जनताको हकअधिकार कायम हुने विश्वास बढ्दै गएको छ। नेपालगञ्जवासीको समृद्ध सहरको चहना पूरा वाम गठबन्धनबाट मात्रै सम्भव छ। मधेसी नेताहरु सहितको वाम गठबन्धनप्रति जनताको उत्साह बढेको छ।
तपाईं के-कस्ता एजेन्डा लिएर घरदैलोमा जानुभएको छ?
नेपालगञ्जलाई प्रदेश नं ५ को राजधानी र नेपालको बृहत् आधुनिक सहर बनाउनुपर्छ भन्ने आम नेपालगञ्जवासीको चाहना छ। त्यो चाहना पूरा गराउनु नै मेरो मुख्य एजेन्डा हो। त्यसैगरी ढल निकास, बाढी तथा डुबानको समस्या समाधान गर्ने, राप्ती नदीमा स्थायी तटबन्धको व्यवस्था गर्ने, नेपालगञ्ज विमानस्थललाई अन्तर्राष्ट्रिय स्तरको बनाउने, अन्तर्राष्ट्रिय स्तरको सभागृह निर्माण गर्ने, सबै सडकहरुको स्तरोन्नति गरी कालोपत्रे गर्ने मेरा योजना छन्। नेपालगञ्जलाई औद्योगिक केन्द्र बनाउने, विश्वविद्यालय निर्माण गर्ने, भेरी अञ्चल अस्पताललाई स्तरोन्नति गरी सरकारी मेडिकल कलेज बनाउने, सुक्खा बन्दरगाह, चक्रपथ निर्माण लगायतका हाम्रा एजेन्डाहरु छन्। यसका जनताको भरोसा छ, त्यसकारण पनि हामीले उनीहरुको साथ पाइरहेका छौं।
तपाईंलाई नै जनताले किन भोट दिने?
स्थायी सरकार, विकास र समृद्धिको चाहना पूरा गर्न जनताले मलाई भोट दिने हो। संविधान कार्यान्वयन, ऐन, कानुनहरुको निर्माण गरी त्यसको कार्यान्वयन गर्नुछ। मेरो निर्वाचन क्षेत्रका समस्याहरुको समाधान, पछाडि पारिएका वर्ग समुदायको उत्थान गर्न आवश्यक छ। जिल्लाको साना ठूला समस्या र योजनाबारे मैले प्रस्ट बुझेको छु। गर्न सक्ने ठाउँमा पुग्नेबित्तिकै मैले तत्काल र दीर्घकालीन समस्या र योजना अगाडि बढाउँछु।
मधेसका मुद्दाहरु त बाँकी नै छन् नि। कसरी सम्बोधन गर्नुहुन्छ?
मधेसको आन्दोलन आवश्यकता थियो, हामीले त्यसबेला त्यो मुद्दालाई उठायौं। अहिले मधेसको मुद्दा देशको मुद्दा बनेको छ। सबै पार्टीको केन्द्रविन्दु बनेको छ। मधेस आन्दोलन अब देशको आन्दोलन भएको छ। हिजो मधेसी दलको मात्रै माग थियो, अब यो साझा एजेन्डा बनिसक्यो। मधेसको एजेन्डा स्थापित गर्नु थियो, त्यो पूरा भयो। अब सम्बोधन गर्न सबै राजनीतिक दलहरुको सहयोगको आवश्यकता छ। तराई-मधेसका जनतालाई शोषण, उत्पीडन, विभेद र असमानताबाट मुक्त गरेर न्याय, समानता, समृद्धि सुनिश्चित गर्नुछ। देश र जनताको आवश्यकता अनुसार संविधान कार्यान्वयनको क्रममा परिमार्जन र विकास गर्दै तराई मधेसका साथै समग्र राष्ट्रको आर्थिक विकास र सामाजिक न्याय सुनिश्चित गर्नुका लागि मेरो प्रयास र पहल सदैव रहनेछ।
मतदातालाई के भन्नुहुन्छ?
वाम गठबन्धनलाई जिताउनुस्। धेरै वर्षदेखिको नेपालगञ्जको विकास गर्ने मेरो सपनालाई पूरा गर्ने अवसर दिनुस्। पाँच वर्षभित्र नेपालगञ्जलाई आधुनिक सहरका रुपमा विकास गर्ने मेरो प्रतिबद्धता भयो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1785910910.png)
-1764146706.png)
