काठमाडौं- काठमाडौं महानगरपालिकाले काठमाडौं भित्रका विभिन्न डिभिजनमा फुटबल क्लबहरुलाई सहयाेग गरेको छ।
सोमबार राष्ट्रिय सभा गृहमा आयोजना गरिएको कार्यक्रममा महानगरका प्रमुख विद्यासुन्दर शाक्यले ए डिभिजनका ६ वटा, बी डिभिजनका ५ वटा र सी डिभिजनका ७ वटा क्लबहरुलाई नगद सहयाेग प्रदान गरेका हुन्।
महानगरले ए डिभिजन खेल्ने मनाङ मर्स्याङ्ग्दी, शंकटा क्लब, हिमालयन शेर्पा, सरस्वती युवा, मछिन्द्र युथ र एनआरटी क्लबलाई सहयाेग गरेको हाे। महानगरले बी डिभिजन खेल्ने क्लबलाई प्रति क्लब ३ लाख रुपैयाँ तथा काठमाडौंका सी डिभिजन फुटबल क्लबलाई प्रतिक्लब २ लाख रुपैयाँ नगद सहयोग गरेको हो।
काठमाडौंका ब्वाइज युनियन, अन्नपूर्ण (आरसिटी), टुसाल युवा, बाँसबारी र श्री कुमारी गरी ५ वटा फुटबल क्लबहरुले बी डिभिजनमा खेल्दै आएका छन्। यस्तै काठमाडौंका ७ वटा क्लबहरु सानो गौचरण युवा, समाज कल्याण खेलकुद केन्द्र, प्लानिङ ब्वाइज युनाइटेड, स्वयम्भु, सामाजिक युवा, महावीर र मनोहरा एकीकृत युवा क्लबले सी डिभिजन खेल्दै आएका छन्।
काठमाडौं महानगरले ए डिभिजनमा फुटबल खेल्ने क्लबको विकासका लागि प्रतिक्लब ९ लाख ३० हजार रुपैयाँका दरले सहयोग गर्दै आएको छ। महानगरले फुटबल खेल्ने क्लबहरुलाई यसै वर्षदेखि सहयोग गर्न थालेको हो। महानगरले खेलकुदको विकासका र खेलकुदलाई सहरी जीवन पद्धति बनाउन भन्दै खेलाडीको दैनिकी, व्यायाम र खेलकुदको विकासका लागि सहयोग गर्दै आएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
