तस्बिर : टाइम्स अफ इन्डिया
काठमाडौं- भारतको सर्वोच्च अदालतका प्रधान न्यायाधीश रञ्जन गोगोईले आफूमाथि लागेको यौन दुर्व्यवहारमा सफाई पाएका छन्।
सर्वोच्च अदालतको आन्तरिक छानबिन समितिले गोगाई विरुद्ध लागेको आरोपमा छानबिन गर्दै निर्दोष रहेको ठहर गरेको हो।
लगत्तै उक्त समितिले उनीविरुद्ध लागेको यौन उत्पीडनको आरोप खारेज हुने निष्कर्ष निकालेको छ।
आरोप निराधार पाइएको भन्दै सर्वोच्चको आन्तरिक समितिले उक्त आरोपलाई खारेज गरेको हो। समितिले आफ्नो अध्ययन प्रतिवेदनमा आरोप निराधार भएको उल्लेख गरेको छ।
गत अप्रिल १९ तारिखमा सर्वोच्चकै पूर्वमहिला कर्मचारीले गोगोईविरुद्ध यौन दुर्व्यवहारको आरोप लगाएकी थिइन्। त्यसलगत्तै सर्वोच्चले तीन न्यायाधीशको नेतृत्वमा आन्तरिक छानबिन समिति गठन गरेको थियो। उक्त छानबिन समितिमा समेत आरोपित महिला उपस्थित हुन अस्वीकार गरेपछि समितिले प्रतिवेदन बुझाउँदै गोगाईलाई सफाई दिएको हो।
गोगोईले सुरुवातदेखि आरोपको खण्डन गर्दै आएका थिए। उनले स्वतन्त्र न्यायपालिकालाई कमजोर बनाउने षडयन्त्र भएको टिप्पणी गर्दै आएका थिए।
यस्तो थियो घटना
प्रधानन्यायाधीश गोगोइले आफूमाथि जबर्जस्ती करणी गरेको आरोप ३५ वर्षीया एक महिलाले लगाएका थिइन्। सो उजुरीमा उनले गोगोईले प्रधानन्यायाधीश नियुक्त हुनेबित्तिकै गत अक्टोबरमा उनलाई दुई पटक यौन दुराचार गरेको आरोप लगाइएकी थिइन्।
उनले यौन उत्पीडन गरेको र त्यस्तो गर्न नमान्दा परिवारलाई विभिन्न किसिमले यातना दिएको गरेको बताएकी छन्।
आफूमाथि गम्भीर आरोप लागेपछि ६४ वर्षीय गोगोईले आरोपलाई पूर्ण रूपमा अस्वीकार गर्दै त्यसलाई ‘गलत र न्यायपालिकाको स्वतन्त्रता विपरीत’आरोप आएको टिप्पणी गरेका थिए।
उक्त आरोपलाई उनले न्यायपालिकाको स्वतन्त्रतामाथिको गम्भीर खतरा पुर्याउनुका साथै अदालत अस्थिर बनाउने षड्यन्त्र भएको टिप्पणी गरेका छन्। आरोप लगाउने महिलाले एउटा उजुरीपत्र सर्वोच्च अदालतका सबै २२ जना न्यायाधीशहरूलाई पठाएकी छन्।
को हुन् उजुरी हाल्ने महिला?
प्रधानन्यायाधीश विरुद्ध उजुरी हाल्ने सर्वोच्चकै एक पूर्व कर्मचारी विवाहिता महिला हुन्। भारतीय कानुनअनुसार उनको नाम सार्वजनिक गर्न नमिल्ने भएकाले गोप्य राखिएको छ। उनले आरोपपत्रमा गत अक्टोबर १० र ११ मा गोगोईको निवासमा यौन दुराचार भएको उल्लेख गरेकी छन्।
‘उनले मेरो कम्मर समाते र हातले शरीरभर सुमसुम्याए,’ महिलाको आरोपमा उल्लेख छ, ‘उनले मलाई नछोडेपछि धकेलेर उनको कब्जाबाट निस्किएँ।’
उनको उजुरीमा र गोगोईले उक्त घटना सार्वजनिक गरेमा ‘परिवारलाई धेरै दुःख हुन सक्छ’ भन्दै धम्कीसमेत दिएको उल्लेख छ। यही प्रकरणका कारण आफूलाई तीन ठाँउमा सरुवा गरिएको र गत डिसेम्बरमा जागिरबाट हटाइएको आरोप उनले लगाएकी छन्।
उनले आफ्ना पति र भाइलाई पनि निलम्बन गरिएको उजुरीमा उल्लेख गरेकी छन्।
आरोप लगाउने महिलाले नै घुस खाएको उजुरी
प्रधानन्यायाधीश गोगोईमाथि आरोप लगाउने महिला आफैं विवादमा आएकी थिइन्। गत मार्चमा हरियाणाको झज्जर सहरबासी एक जनाले ती महिलाले अदालतमा जागिर लगाइदिने आश्वासन दिएर घुस लिएको भन्दै उजुरी गरेका थिए।
तर आरोप लगाउने ती महिलाले उक्त आरोप अस्वीकार गर्दै र गत मार्चमा परिवारका सदस्यसहित प्रहरी चौकीमा उपस्थित हुँदा उनीहरूमाथि दुर्व्यवहार गरिएको जिकिर गरेकी थिइन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
