काठमाडौं- एक महिनाअघि काठमाडौंको कमलादीस्थित एक डान्सबारमा गोली हान्ने दुई भारतीय नागरिक जेल चलान भएका छन्। काठमाडौं जिल्ला अदालतले बुधबार उनीहरुलाई जेल चलानको आदेश दिएको हो।
गत १५ कात्तिकमा पक्राउ परेका जसवीर सिंह र हरदेवेन्दर सिंहलाई ज्यान मार्ने उद्योग मुद्दामा पुर्पक्षका लागि जेल चलानको आदेश भएको हो। उनीहरुविरुद्ध जिल्ला प्रशासन कार्यालय काठमाडौंमा हातहतियार मुद्दा पनि दर्ता भएको महानगरीय प्रहरी परिसर काठमाडौंका डिएसपी बेलबहादुर पाण्डेले बताए। पक्राउ परेका जसवीर लुधियानाका पूर्वसरपञ्च तथा हरदेवेन्दर भारतको केन्द्रीय विद्युत् प्राधिकरणका कर्मचारी भएको अनुसन्धानमा खुलिसकेको छ।
कमलादीको हेरिटेज प्लाजामा रहेको ‘ज्याक डेनियसल्स रेस्ट्रो विथ डान्सबार’ मा बिल तिर्ने क्रममा विवाद हुँदा गोली चलाएर उनीहरु भागेका थिए। भाग्ने क्रममा पेस्तोल र ५१ राउन्ड गोलीसहित दुवैलाई प्रहरीले पक्राउ गरेको थियो।
घटनाको अघिल्लो दिन मात्र उनीहरू पिबी १० एफएस ७४४९ नम्बरको सुजुकी स्विफ्ट कार चढेर सुनौली नाका हुँदै नेपाल आएका थिए। कार प्रहरीले बरामद गरिसकेको छ।
ठमेलको एक होटेलमा बसेका उनीहरू युवती खोज्दै सो डान्सबार पुगेका थिए। डान्सबारमा २२ हजारको बिल उठेपछि उनीहरूले कर्मचारीसँग झगडा गरेका थिए। आफूहरूमाथि कुटपिट हुन लागेपछि तर्साउन गोली चलाउनुपरेको उनीहरूले बयान दिएका थिए। उनीहरु कसैलाई मार्ने उद्देश्यले आएको सुटर भएको प्रारम्भिक अनुमान गरिए पनि हालसम्मको अनुसन्धानमा त्यस्तो कुनै उद्देश्य नखुलेको प्रहरीले जनाएको छ।
सम्बन्धित समाचार-
यी हुन्, काठमाडौंको कमलादीमा गोलीकाण्ड मच्चाउने भारतीय सार्पसुटर
भारतीय गाडीमै काठमाडौं आएका थिए सार्प सुटर
कमलादी गोलीकाण्ड : पक्राउ परेका दुई सुटर भारतीय
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
