माओवादी सेनाका लडाकुको रेखदेख, पुनर्स्थापना र समायोजन विशेष समितिको सचिवालय सदस्य थिए, दीपकप्रकाश भट्ट। भारतको जवाहरलाल नेहरु विश्वविद्यालयबाट विद्यावारिधि गरेका भट्ट यतिखेर कन्चनपुर-३ मा एमालेबाट प्रतिनिधिसभाको प्रत्यक्ष उम्मेदवार छन्। सुरक्षाविद्का रुपमा ख्याति कमाएका भट्टको यो पहिलो चुनावी प्रतिस्पर्धा हो। उनी नेपाली कांग्रेसका परिचित नेता रमेश लेखकसँग प्रतिस्पर्धा गर्दैछन्।
चुनावी सेरोफेरोमै रहेर उनीसँग किशोर दहालले गरेको सम्वाद:
पहिलो पटक चुनावी प्रतिस्पर्धामा हुनुहुन्छ। कस्तो महसुस भइरहेको छ?
मैले ०५१ यताका सबै चुनावमा पार्टीका लागि भोट मागेको थिएँ। यस पटक आफ्नै लागि मागिरहेको छु। त्यसैले अरुलाई मागेको भोट र आफूलाई मागेको भोटमा खासै फरक छैन। मुख्य कुरा जनताको बीचमा जाने र उनीहरुलाई सचेत गराउने हो। खासगरी मुलुक कता जाँदैछ, यो वाम गठबन्धन किन बन्यो, देशमा बनेको संविधान कार्यान्वयनका लागि कुन दल वा गठबन्धन आवश्यक छ, राष्ट्रियता, जनजीविका, आर्थिक समृद्धिसँग जोडिएका एजेन्डाहरुमा जनतालाई विश्वस्त पार्न अरु बेलाको भन्दा थप जिम्मेवारी छ। म त्यो जिम्मेवारी बहन गरिरहेको छु।
अरुलाई भोट माग्ने अवस्थाबाट आफैंलाई भोट माग्ने अवस्थासम्म कसरी पुग्नुभयो?
राजनीतिक क्रियाशीलता, पार्टी जीवनको निरन्तरता र विभिन्न क्षेत्रसँग पार्टी जीवनमा जोडिएर मैले गरेको कामको मूल्यांकनले नै यहाँका कार्यकर्ताले उम्मेदवार हुन सबैभन्दा उपयुक्त व्यक्ति मलाई ठाने र सिफारिस गरे। पार्टी केन्द्रले पनि मेरो योग्यता, क्षमता र पार्टीले दिएको जिम्मेवारीमा मैले विगतमा देखाएको सिप, कौशल र विज्ञता सबैलाई जोडेर मूल्यांकन गरेकाले म अगाडि आएको हुँ।
यसमा तपाईंको रहर बढी छ कि पार्टीले तपाईंलाई आवश्यक ठान्यो?
पार्टी जीवनमा रहर भन्ने कुरै हुँदैन। पार्टीले दिएको जिम्मेवारी पूरा गर्दै यहाँसम्म आउँदा आफ्नो रहरभन्दा पनि पार्टीले दिएको जिम्मेवारी र कामलाई नै प्राथमिकता मान्दै आएको छु। समाज र देशको लागि अगाडि बढ्ने कुरा नै सबैभन्दा प्रमुख कुरा हो। मुल कुरा मुलुकको समृद्धि, विकास र सामाजिक रुपान्तरण हो। म सामाजिक न्यायको पक्षमा सदैव लडिरहेको छु, त्यो लडाइँलाई थप उचाइ दिन मूलधारको राजनीतिमा सक्रिय हुनुपर्छ भन्ने ठानेर आएको हुँ।
तपाईंका चुनावी एजेन्डा केके छन्?
राष्ट्रिय एजेन्डाको रुपमा मुलुकको राजनीतिक स्थिरता, विकासका कुरा हुन्। यहाँचाहिँ विकासको कुरा गर्दा स्वास्थ्यको क्षेत्रमा निकै काम गर्नुपर्नेछ। यहाँको अञ्चल अस्पताल केवल सिफारिस केन्द्र बनेको छ। त्यहाँ पुगेका बिरामीले न डाक्टर भेट्न पाउँछन्, न उपचार पाउँछन्, न औषधि पाउँछन्। त्यहाँ कुनै उपकरण पनि छैन। त्यो केवल बिरामीलाई भारत वा अन्य ठाउँमा पठाउने सिफारिस केन्द्र बनेको छ। त्यसलाई मेडिकल कलेजको रुपमा डाक्टर उत्पादन गर्ने थलो र आधुनिक उपकरणसहितको सुविधासम्पन्न अस्पताल बनाएर सञ्चालन गर्ने कुरा गरेका छौं।
यहाँ २० वर्षदेखि विमानस्थल सञ्चालनमा छैन, त्यो सञ्चालन हुनुपर्छ भनेर हामीले भनिरहेका छौं। यहाँ नदीको कटान र डुबानको समस्या छ। तिनलाई व्यवस्थित र तटबन्ध गरेर बाढी र डुबानलाई सम्बोधन गर्ने कुरा गरेका छौं। त्यस्तै, हामीले ०६७ सालदेखि नै यो क्षेत्रलाई त्रिदेशीय नाका बनाउनुपर्छ भनिरहेका छौं। प्रत्येक वडामा एउटा सामुदायिक केन्द्र बनाउने भनेका छौं। त्यो भयो भने सामाजिक, सांस्कृतिक, धार्मिक गतिविधि गर्नका लागि त्यो सार्वजनिक ठाउँ हुनेछ। यहाँका दुई वटै नगरपालिकामा रिङरोड निर्माण गरेर यहाँको यातायात र पार्किङको व्यवस्था गर्ने भनेका छौं। यहाँ रहेको विश्वविद्यालयलाई बाहिरको विश्वविद्यालयसँग सहकार्य गरेर राम्रो शिक्षाको केन्द्र बनाउने र विकास गर्ने योजना छ।
तपाईंका मुख्य प्रतिस्पर्धी नेपाली कांग्रेसका रमेश लेखक नेता हुनुहुन्छ। पटक-पटक चुनाव जितेका र मन्त्री पनि भइसक्नुभएको छ। जनताले तपाईंलाई नै किन भोट दिने?
उहाँले विकास गरेको भए, जनताको काम गरेको भए अघि मैले भनेका कुरा जस्ताको तस्तै रहने थिएनन्। यो क्षेत्रको विकासको लागि हामीले ल्याएको बजेट जनताले देखेकै छन्। महाकाली पुल, महाकाली कोरिडर, सुक्खा बन्दरगाह सबै वाम गठबन्धनको सरकार भएका बेलाका छन्। यी योजनाहरुलाई कार्यान्वयन गर्न, मुलुकलाई राजनीतिक स्थायित्व दिन र संघीय लोकतान्त्रिक गणतन्त्रलाई संस्थागत गर्न र यो क्षेत्रका दुई नगरहरुलाई सुन्दर सहर बनाउने योजना हामीले अघि सारेको छौं।
म अहिले दोधारा चाँदनीमा छु। यहाँ १८० किलोमिटर लामो सडक छ। यो नगरपालिकामा जम्मा ४ किलोमिटर कालोपत्रे सडक छ। उहाँ ०५६ सालदेखि यो क्षेत्रको प्रतिनिधित्व गरिरहनुभएको छ। तीन पटक मन्त्री हुनुभएको छ। तर त्यही ४ किलोमिटर कालोपत्रे सडक नै उहाँको विकासको मापदण्ड हो भने जनताले त्यही कुरालाई मूल्यांकन गरेर उहाँलाई अस्वीकार गर्छन्।
तपाईं सुरक्षा र परराष्ट्र मामलामा पनि काम गर्दै आउनुभएको छ। सांसद हुनुभयो भने यस क्षेत्रमा कस्तो नीतिको पहल गर्नुहुन्छ?
हामीले सीमा क्षेत्र विकास योजना ल्याएका छौं। सीमा क्षेत्रमा विकासको अभाव छ। धेरै ठाउँमा सडक सुविधा छैन। धेरैजसो ठाउँमा आरक्ष छ। भारत र नेपालका दुवैतर्फ आरक्ष छ, यसबाट यहाँका जनताहरु पीडित छन्। हात्ती, गैंडा लगायतका जनावरले दुःख दिइरहेको हुन्छ, बालीनाली सखाप पारिरहेको हुन्छ। त्यसैले सीमा क्षेत्रमा बसेका नागरिकहरु नै सीमाका वास्तविक सीमा रक्षक हुन् भनेर सम्मान दिँदै त्यसलाई व्यवस्थित गर्दै जाने योजना छ। उनीहरुको सुरक्षाको लागि अहिले हामीले सशस्त्र प्रहरी खटएका छौं। त्यसको संख्या बढाउन पहल गर्ने र तिनलाई सीमामा बस्ने जनतासँग कस्तो व्यवहार गर्ने भन्ने कुरालाई पनि ध्यानमा राखेर ट्रेनिङ पनि दिन जरुरी छ।
आधुनिक र वैज्ञानिक प्रणाली अनुसार सीमा स्तम्भहरुलाई दुरुस्त पार्ने, विवाद रहेको ठाउँमा सल्टाउने र आधुनिक प्रणाली अन्तर्गत सीमाको व्यवस्थापन गर्ने र दुवै छिमेकीसँग राम्रो र सुमधुर सम्बन्ध बनाउने प्रयास गर्नेछु। स्थानीय र राष्ट्रिय स्तरमा मेरो क्षमता र विज्ञताले भ्याएसम्म काम गर्नेछु।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
