तस्बिर-सिन्ह्वा
नयाँ दिल्ली- भारतीय लोकसभा चुनावकाे पाचाैं चरणकाे मतदान सुरु भएकाे छ। साेमबार बिहन ७ बजेबाट भारतका ७ राज्यमा मतदान सुरु भएकाे हाे। साँझ ५ बजेसम्म चल्ने मतदानमा कूल ५१ लाेकसभा सिटकाे टुंगाे लाग्नेछ।
आज बिहार, झारखन्ड, उत्तर प्रदेश, पश्चिम बंगाल, जम्मु-काश्मीर, राजस्थान र मध्य प्रदेशमा निर्वाचन हुँदैछ।
यस चरणमा कांग्रेस अध्यक्ष राहुल गान्धी, युपिए प्रमुख सोनिया गान्धी, गृहमन्त्री राजनाथ सिंह, केन्द्रीय मन्त्रीहरु स्मृति इरानी, राज्यवर्धन सिंह राठौड र महबुबा मुफ्तीजस्ता दिग्गज राजनीतिकर्मीकाे चुनावी भाग्यकाे फैसला हुनेछ।
पाँचौं चरणको यस चुनावमा खासगरी उत्तर प्रदेशका रायबरेली र अमेठीको भिडन्त निकै रोचक मानिएको छ। यी दुवै स्थानमा सोनिया गान्धी र राहुल गान्धीलाई सत्तारुढ भारतीय जनता पार्टी (भाजपा)ले कडा टक्कर दिने अपेक्षा गरिएको छ। तर उत्तर प्रदेशको राजनीतिमा निकै प्रभावशाली समाजवादी पार्टी र बहुजन समाजवादी पार्टीको गठबन्धनले रायबरेली र अमेठीमा उम्मेदवारी नदिएकाले यी दुबै स्थानमा कांग्रेस नै विजयी हुने अड्कलबाजी गरिएका छन्।
यसअघि सन् २०१४ को चुनावमा यी क्षेत्रका कूल ५१ स्थानमध्ये भाजपाले ४० स्थान जितेको थियो भने कांग्रेसले २ स्थानमा मात्र जित हात पारेको थियो। कांग्रेसले रायबरेली र अमेठीमा मात्र विजय हासिल गरेको थियो।
भारतीय चुनाव आयोगले पाँचौं चरणको चुनावका लागि ९४ हजार मतदान केन्द्र स्थापना गरेको छ। साथै चुनावी हिंसालाई ध्यानमा राखेर सुरक्षा व्यवस्था निकै कडा बनाएको छ।
.jpg)
५१ सिटका लागि कुल ६ सय ७४ उम्मेदवार चुनावी मैदानमा छन्। याे चरण समाप्त भएसँगै लाेकसभा चुनाव अन्तर्गत ४ सय २५ सिटकाे कतदान पूरा हुनेछ। पाचाैं चरणकाे मतदानमा करिब ८ कराेड ७५ लाख मतदाताले आफ्नाे मताधिकारकाे प्रयाेग गर्नेछन्। जसमध्ये करिब ४ कराेड ६३ लाख पुरुष तथा ४ कराेड १२ लाख महिला छन्।
कहाँ-कहाँ हुँदैछ चुनाव:
बिहारः सीतामढी, मधुबनी, मुजफ्फरपुर, सारण र हाजीपुर
जम्मु-काश्मीरः अनन्तनाग र लद्दाख
झारखन्डः कोडरमा, राँची, खुँटी र हजारीबाग
पश्चिम बंगालः बनगाउँ, बैरकपुर, हावडा, उलुबेरिया, श्रीरामपुर, हुगली र आरामबाग
उत्तर प्रदेशः अमेठी, रायबरेली, बान्दा, लखनउ, धौरहरा, गोडा, सीतापुर, मोहनलालगन्ज, फतेहपुर, कौशाम्बी, बाराबन्की, फैजाबाद, बहराइच र कैसरगन्ज
राजस्थानः श्रीगंगानगर, बिकानेर, चुरू, झुन्झुनु, सिकर, जयपुर (ग्रामीण), जयपुर (सहर), अलवर, भरतपुर, करौली-धौलपुर, दौसा र नागौर
मध्य प्रदेशः टिकमगढ, दमोह, खजुराहो, सतना, रिवा, होसंगाबाद र बैतुल
.jpg)
६ सय ७४ उम्मेदवार चुनावी मैदानमा
एसोसिएसन फर डेमोक्रेटिक रिफर्म्सका अनुसार लोकसभा चुनावकाे पाचाैं चरणमा कूल ६ सय ७४ उम्मेदवारकाे भाग्यकाे फैसला हुँदैछ। जसमा १ सय ४९ जना राष्ट्रिय दलका, ३१ जना क्षेत्रीय दलका, २ सय ३६ जना गैह्रमान्यता प्राप्त दलका तथा २ सय ५२ जना स्वतन्त्र उम्मेदवार छन्।
यस चरणमा कूल ७९ महिला उम्मेदवारकाे रुपमा भाग लिँदैछन्।
१९ प्रतिशत उम्मेदवारमाथि आपराधिक मुद्दा
रिपोर्टका अनुसार चुनावी मैदानमा रहेका ६ सय ६८ उम्मेदवारमध्ये १९ प्रतिशत उम्मेदवार अर्थात १ सय २६ माथि आपराधिक मुद्दा दर्ता गरिएकाे छ। ९५ जना अर्थात १४ प्रतिशतमाथि भने गम्भीर आपराधिक मुद्दा नै दर्ता भएकाे छ।
२८ प्रतिशत अर्थात १ सय ८४ जना उम्मेदवार कराेडपति रहेकाे रिफर्म्सले जनाएकाे छ। पाचाैं चरणमा भाग लिएका उम्मेदवरकाे औसत सम्पत्ति करिब २.५७ कराेड भारतीय रुपैयाँ छ।
दलका अनुसार विश्लेषण गर्ने हाे भने सत्तारुढ भारतीय जनता पार्टी (भाजपा) का ४८ उम्मेदवारकाे औसत सम्पत्ति ६.९१ करोड तथा भारतीय कांग्रेसका ४५ उम्मेदवारकाे औसत सम्पत्ति ८.७४ कराेड भारतीय रुपैयाँ रहेकाे छ।
बहुजन समाजवादी पार्टी (बसपा) का ३३ उम्मेदवारकाे औसत सम्पत्ति ३.३२ करोड भारतीय रुपयाँ र समाजवादी पार्टी (सपा)का ९ जना उम्मेदवारकाे औसत सम्पत्ति ३१.५७ कराेड भारु रहेकाे रिफर्म्सकाे अध्ययनले जनाएकाे छ।
पुनम सिन्हा सबैभन्दा धनी उम्मेदवार
पाचाैं चरणकाे चुनावमा सबैभन्दा धनी उम्मेदवारकाे सूचीकाे पहिलाे स्थानमा पुनम सिन्हा रहेकी छिन्। उनकाे सम्पत्ति १ सय ९३ कराेड भारु भन्दा बढी छ। सिन्हा समाजवादी पार्टीकाे उम्मेदवारकाे रुपमा लखनउ लोकसभा क्षेत्रबाट चुनाव लड्दैछिन्। उनले केन्द्रीय मन्त्री तथा भाजपा वरिष्ठ नेता राजनाथ सिंहकाे विरुद्धमा उत्रिएकी छिन्।
प्रगतिशील समाजवादी पार्टी (लोहिया)का विजय कुमार मिश्रा धनी उम्मेदवारकाे सूचीमा दाेस्राे स्थानमा छन्। उत्तर प्रदेशकाे सीतापुरबाट उठेका मिश्रासँग १ सय ७७ कराेड भारुभन्दा बढी सम्पत्ति रहेकाे खुलेकाे छ।
त्यस्तै तेस्राे नम्बरमा पूर्व केन्द्र मन्त्री यशवन्त सिन्हाका छाेरा जयन्त सिन्हा छन्। उनी भाजपाकाे उम्मेदवारकाे रुपमा झारखन्डकाे हजारीबाग क्षेत्रबाट चुनावी मैदानमा छन्। उनीसँग ७७ करेाड भारु भन्दा बढी रकम रहेकाे खुलेकाे छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791869951.jpg)
-1786602170.png)
