काठमाडाैं- प्रतिपक्षका सांसदले आगामी आर्थिक वर्ष २०७६/०७७ का लागि सरकारले प्रस्तुत गरेको नीति तथा कार्यक्रममा आश्वासनको नारा मात्र रहेकाे टिप्पणी गरेका छन्। सत्तापक्षका सांसदहरुले भने नीति तथा कार्यक्रमकाे सर्मथन गरे।
राष्ट्रपति विद्यादेवी भण्डारीले संघीय संसदमा प्रस्तुत गरेको नीति तथा कार्यक्रमपछि प्रतिक्रिया दिँदै दुबै पक्षले आफू अनुकुल व्याख्या गरेका हुन्। प्रतिपक्षका सांसदहरुले सरकारले निरास बनाएको टिप्पणी गरेका छन्।
कसले के भने?
शेरबहादुर देउवा, सभापति, नेपाली कांग्रेस
थाेत्रो आश्वासन बाहेक केही पनि छैन। विगतकै निरन्तरता मात्र छ। सरकारले जनतालाई आश्वासन मात्र बाँडको छ। अघिल्लो पटक पनि यही कुरा उहाँहरुले भन्नुभएकाे थियाे। राष्ट्रपतिले मेरो सरकार किन भन्नुभयो? हाम्राे सरकार भनेको भए हुन्थ्यो।
उपेन्द्र यादव, उपप्रधान एवम् स्वाथ्य तथा जनसंख्या मन्त्री
राष्ट्रपतिज्यूले वाचन गर्नुभयो, राम्रो छ। यो लागू भएपछि सबै नेपाली सुखी हुन्छन् र नेपाल समृद्ध हुन्छ।
लक्ष्मणलाल कर्ण, नेता, राजपा
यो सरकारको नीति तथा कार्यक्रम हो। झिना मसिना कुरा गरिएकाे छ। तीन पटक पानीजहाज चलाएको र अफिस बनाएको बताइएकाे छ, केहीले चल्ला? रेलको कुरा उस्तै छ। जनकपुर-जयनगर चलाउन सकेको छैन। पूर्वपश्चिम रेल चलाउने बकवास कुरा छ।
'मेरो सरकार' भनेर राष्ट्रपतिले विचित्रको भाषा बोल्नु भयो। मेरो सरकार भन्नुभयो, तर यो सार्वभौम संसदको सरकार हो। राष्ट्रपतिको होइन। यसले फेरि राजा बन्न खोजेको देखिन्छ। जनताको सरकारलाई मेरो भनेर भन्नु गलत छ। अब बजेट कस्तो आउँछ हामी हेरिराखेका छौं। हामी त्यसको प्रतिक्षामा छौं।
सुरेन्द्र पाण्डे, नेता, नेकपा
सरकारले सोचेका कुरा राम्रा छन्। तर, लक्ष कसरी पुरा गर्छ भन्ने हो।
पूर्वपश्चिम रेलदेखि दुई लेनको सडकजस्ता राम्रा योजना समेटिएका छन्। त्यस्तै सामाजिक सुरक्षा भत्ता वृद्धिदेखि अन्य काम गर्ने भनिएको छ। सरकारले ल्याएको समग्र नीति राम्रो भएको र अब बजेटमा त्यसलाई उचित व्यवस्था गर्न जरुरी रहेको छ।
'मेरो सरकार' किन भन्नुभयो यसमा म बोल्न चाहन्न। यो उचित शब्द नहोला। पहिला श्री ५ को सरकार हुन्थ्यो। नेपाल सरकार ठिक हुन्थ्यो भन्ने मलाई लाग्दछ।
गगन थापा, नेता, नेपाली कांग्रेस
संसदमा प्रस्तुत भएको यो कार्यक्रम निजी वा नेपाल सरकारको हो? प्रश्न यहींबाट सुरु हुन्छ। यो सरकारको हो भने राष्ट्रपतिलाई थप विवादमा हुनेगरी यत्रो गम्भीर त्रुटी किन गर्यो?
सरकारले गरेको संविधान दिगो विकासको लक्ष्य र विगतका काम हो। विगतम जे-जे गर्छु भन्यो, यो वर्ष के भयो, समिक्षामा कत्ति पनि आत्मआलोचना छैन। प्रशंसा नै प्रशंसा छ। जनता निरास भएको भन्ने छैन। आत्मसमीक्षा छैन। जनताले रामराज्य देखिसकेका छन्। आगामी वर्ष रामले पनि नदेखेको राज्य हुने आश्वासन बाँडेको छ।
भ्रम छ, भय छैन- सरकारको दाबी हो याे। यस वर्ष यो काम भयो, यसमा सकिन भनेर एक ठाउँमा बाहेक अन्यमा भनिएन। राष्ट्रिय गौरवको आयोजना र बजेट खर्चबाहेक अन्यमा आत्मसमिक्षा नै छैन। मेरो सरकारले काम गरेको भनी दाबी गरेको छ। तर, विगतका वर्षमा गरेका कामको मूल्यांकन भएकाे छैन।
संघियता कार्यान्वयन यो वर्ष फितलो भयो। अघिल्लो वर्ष गरेका र अब यो नयाँ हुनेछ भनेर किन योजना अएन? सामाजिक सुरक्षा भत्ता बढाउँछु भनेर जनतालाई लोभ देखाएर फकाउन खोजिँदैछ।
नयाँ नारा छ तर आधार छैन। आर्थिक वृद्धि र राजश्व संकलन खुम्चिएकोप्रति कुनै सम्बाेधन छैन। अहंकार र झुटको पुलिन्दा हाे याे कार्यक्रम। गत वर्ष निरास बनाएको सरकारले यो वर्ष आसाको सञ्चार गराउन सकेन। यो सरकारले देश सही ढंगले अगाडि लाने संकेत देखाएन।
विजयकुमार गच्छदार, नेता, नेपाली कांग्रेस
नयाँ कुरा केही छन् तर त्यो पुरा हुन्छ वा हुँदैन हेर्नुपर्छ। यो पुरा हुने देखिँदैन। सरकारले नीति तथा कार्यक्रममा ल्याएका याेजनाहरुमध्ये पुलको कुरा हेर्दा असम्भव छ।
'मेरो सरकार' भन्नु भन्दा 'हाम्रो सरकार' भनिदिएको भए हुन्थ्यो। राजा कालमा मेरो सरकार भन्ने हुन्थ्यो। जनताको भावना समेट्न सकेन। हाम्रो सरकार भन्देको भए के हुथ्यो? आखि सबैको सरकार भन्ने बुझिन्थ्यो होला। समग्र सरकारको कुरा आएन।
योगेश भट्टराई, नेता, नेकपा
सरकारको नीति तथा कार्यक्रम राम्रो छ। यसले केही गर्ने योजना बनाएकाे छ। बजेटमा यसलाई समावेस गरेर पुरा गर्नुपर्दछ।
यो प्रतिपक्षका साथीहरुले भनेझैं विगतको निरन्तरता नै हो। यो आधार वर्षको रुपमा आएको कार्यक्रम हो। आगामी वर्षमा यसले जग बसाल्ने छ। नयाँ पूर्वाधार निर्माणको लागि र पुरानालाई निरन्तरता दिएर राम्रो काम गर्न खोजेको छ। लोककल्याणकारी समाजवाद उन्मुख नीति तथा कार्यक्रम छ। याे समय सापेक्ष पनि छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
![Nepal Live Samachar नेपाल लाइभ समाचार, जेठ २९ [भिडियाे]](https://nepallive.net/uploads/posts/500X300/samachar++-299-1718118150.jpg)
![Nepal Live Samachar नेपाल लाइभ समाचार, जेठ २७ [भिडियाे]](https://nepallive.net/uploads/posts/500X300/samachar++-1717941479.jpg)
