काठमाडौँ- सरकारले अन्तर्राष्ट्रिय जगत्मा नेपालको गरिमा र सम्मान बढेको दाबी गरेको छ। राष्ट्रपतिले प्रस्तुत गरेको सरकारको नीति तथा कार्यक्रममा द्विपक्षीय, क्षेत्रीय र अन्तर्राष्ट्रिय मञ्चहरूमा नेपालको प्रभावशाली प्रस्तुतिले अन्तर्राष्ट्रिय जगत्मा नेपालप्रतिको विश्वास र आकर्षण बढेको दाबी गरिएको छ।
‘अन्तर्राष्ट्रिय मञ्चहरूमा राष्ट्रप्रमुख तथा सरकार प्रमुखको तहबाट सम्पन्न भएका उच्चस्तरीय भ्रमण र सम्बोधनले अन्तर्राष्ट्रिय जगत्मा राष्ट्रको गरिमा र सम्मान अभिवृद्धि भएको छ,’ आर्थिक वर्ष २०७६/७७ को नीति तथा कार्यक्रममा भनिएको छ।
छिमेकी मित्रराष्ट्रहरूबाट नेपालका प्राथमिकताहरूमा समर्थन र सहयोग बढेको र नेपालको विकासमा मित्रराष्ट्रहरूको साथ र सद्भाव वृद्धि भएको बताइएको छ।
भारत र चीनसँगको उच्चस्तरीय भ्रमणको आदानप्रदानबाट छिमेकीहरूसँगको सम्बन्ध थप सुदृढ बनेको समेत सरकारले बताएको छ।
सरकारको नीति तथा कार्यक्रममा राष्ट्रपतिको चीन भ्रमणलाई पनि निकै महत्वका साथ उल्लेख गरिएको छ। राष्ट्रपतिको राजकीय भ्रमणबाट दुई देशबीचको बहुआयामिक सम्बन्ध नयाँ उचाइमा पुगेको छ।
नीति तथा कार्यक्रममा भनिएको छ, ‘मित्रराष्ट्र चीनका महामहिम राष्ट्रपतिको निमन्त्रणामा गणतन्त्र नेपालको राष्ट्रपतिको हैसियतमा पहिलोपटक हालै मैले गरेको चीनको राजकीय भ्रमणबाट दुई देशबीचकोबहुआयामिक सम्बन्ध नयाँ उचाइमा पुगेको छ।’
महिला र विकाससम्बन्धी संयुक्त राष्ट्रसङ्घीय सम्मेलन, पोल्याण्डमा सम्पन्न भएको दिगो विकास र जलवायु परिवर्तनसम्बन्धी अन्तर्राष्ट्रिय सम्मेलन, कतारको भ्रमण तथा संयुक्त राष्ट्रसंघको महासभा, स्वीट्जरल्याण्डको डाभोसमा भएको विश्व आर्थिक मञ्च एवम् कोष्टारिकामा सम्पन्न भएको कार्यक्रमहरूमा नेपालले शान्ति प्रक्रिया, हिमाली पर्यावरण, दिगो विकास, महिला सशक्तीकरण र नेपालको विकासको बारेमा स्पष्ट धारणा राखेको बताइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
