फाइल तस्बिर
काठमाडौं- राष्ट्रपति विद्यादेवी भण्डारीको चीन भम्रण विशेष महत्वको रहेको परराष्ट्र मन्त्री प्रदिप ज्ञवालीले बताएका छन्।
चीनको राजकीय भ्रमणमा गएकी राष्ट्रपति भण्डारीको भ्रणबारे बिहीबार सिंहदरबारस्थित परराष्ट्र मन्त्रालयमा पत्रकार सम्मेलन गरेर जानकारी गराउँदै मन्त्री ज्ञवालीले राष्ट्रपतिबाट पहिलो पटक भएको चीनको राजकीय भ्रमण विशेष महत्वको भएको बताएका हुन्।
‘गणतन्त्र नेपालको राष्ट्रपतिबाट सम्पन्न चीनको यो पहिलो राजकीय भ्रमण भएकोले यसको विशेष महत्व रहेको व्यहोरा जानकारी गराउन चाहन्छु,’ राष्ट्रपतिको भ्रमण सम्बन्धमा ज्ञवालीले जारी गरेको प्रेस नोटमा उल्लेख छ।
राष्ट्रपति भण्डारी बैसाख ११ गते चीन भ्रमणमा गएकी थिइन्। भ्रमणका क्रममा उनले अन्तर्राष्ट्रिय सहयोगका लागि दोश्रो बेल्ट एण्ड रोड फोरमको उद्घाटन समारोहमा भाग लिएकी थिइन्।
समकक्षी सी चिनफिङसँग द्विपक्षीय वार्ता गरेकी उनको भ्रमणकै क्रममा ७ वटा सम्झौता/समझदारीमा हस्ताक्षर समेत भएको थियो।
भ्रमणलाई दुबै देशका सरकारले उच्च महत्व दिएको बताउँदै मन्त्री ज्ञवालीले चीनका राष्ट्रपति सि लगायत उच्च राजनीतिक नेतृत्वसँग सारगर्भित छलफल भएको यसबाट दुई मुलुकबीच सहकार्यमा अभिवृद्धि हुने बताए।
उनले नेपाल–चीनबीच हिमालय वारपार बहुआयामिक कनेक्टिभिटी नेटवर्कको बृहत्तर फ्रेमवर्कलाई दुवै देशले ठोस र योजनाबद्ध ढंगले अगाडि बढाउन सहमत भएको समेत बताए।
स्वास्थ्यमा समस्या आएपछि राष्ट्रपति भण्डारी तोकिएको मिति भन्दा १ दिनअघि नै स्वेदश फर्किएकी थिइन्। मन्त्री ज्ञवाली भने आज स्वदेश फर्किएका थिए।
प्रधानमन्त्री ओली भियतनाम र कम्बोडिया जाने
प्रधानमन्त्री केपी शर्मा ओली दुई पूर्वी एसियाली मुलुक भियतनाम र कम्बोडियाको भ्रमणमा जाने भएका छन्।
परराष्ट्रमन्त्री प्रदीप ज्ञवालीका अनुसार प्रधानमन्त्रीले बैसाख २६ देखि दुई देशको भ्रमण गर्न लागेका हुन्।
मन्त्री ज्ञवालीले बिहीबारको पत्रकार सम्मेलनमा प्रधानमन्त्रीको भ्रमणबारे जानकारी गराएका हुन्।
ती दुवै देशबाट निम्तो आएकाले प्रधानमन्त्री ओलीले द्विपक्षीय भ्रमण गर्न लागेका हुन्। बुद्ध धर्मालम्बी बहुल यी देशमा नेपाली प्रधानमन्त्रीको औपचारिक भ्रमण बिरलै हुने गरेको छ।
प्रधानमन्त्री ओलीलाई भियतनामले बुद्ध जयन्तीका अवसरमा आयोजना गरिने समारोहमा मुख्य वक्ताको रूपमा निम्ता गरेको छ। यस वर्षको बुद्ध जयन्ती जेठ ४ गते रहेको छ।
भ्रमणका क्रममा नेपाल र भियतनामबीच द्विपक्षीय हवाई सम्झौता परिमार्जन गर्ने तयारी भइरहेको समेत बताइएको छ।
सन् २०१५ मा भियतनामसँग हवाइ सम्झौता भएको थियो। तर, त्यसको कार्यान्वयन भएको थिएन। परराष्ट्र मन्त्रालयका अनुसार भियतानमबाट भैरहवाको गौतम बुद्ध विमानस्थलमा चार्टर्ड फ्लाइट गर्न मिल्ने गरी सम्झौता परिमार्जन हुन लागेको हो।
त्यस्तै, भियतनामपछि प्रधानमन्त्री ओलीले कम्बोडियाको पनि औपचारिक भ्रमण गर्नेछन्।
नेपालले दुवै देशसँग सन् १९७५ मा कुटनीतिक सम्बन्ध स्थापना गरेको थियो।
ओली बैसाख २० गते स्वदेश फर्किने कार्यक्रम छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
