काठमाडौं– काठमाडौंको सोल्टी होटल नेपालको महंगो होटलमध्येमा मानिन्छ। त्यही होटलमा ‘छ माया छपक्कै’ निर्माण युनिटले फिल्मको औपचारिक निर्माण घोषण गर्यो।
भेन्यू थियो– प्राइभ नेपाल।
नाइट क्ल्बका लागि चिरिच्याँट्ट हल, वरिपरि भित्ता, सिलिङमा फिल्मको एनिमेटेट टाइटल र आकर्षक ढंगमा स्क्रिनिङ।
हलको मध्यभागमा वरिपरि राखिएका कुर्सी र एक–डेढ सय क्यामेरासँग खटिएका सञ्चारकर्मी।
माहोल निकै गर्माएको थियो।
गत सोमबार दिउँसो २ः३० को औपचारिक कार्यक्रम भनी सञ्चारकर्मीहरू बोलाइए।
तर, निर्धारित समय नाघिसकेको थियो। कार्यक्रमको पर्खाइमा थिए आगन्तुक।
नेपाली फिल्म सम्बन्धी आयोजित प्रायः कार्यक्रम निर्धारित समय भन्दा एक–डेढ घण्टा ढिला हुने प्रवृत्ति छ।
उही प्रवृत्तिलाई ‘टपक्कै’ टिप्यो ‘छ माया छपक्कै’ टिमले। निकैबेरपछि कलाकार तथा निर्देशक दीपा श्री नीरौलाको आवाज हलभरि गुञ्जियो। उनी ठूलो स्वरमा भन्दै थिइन्, ‘लाइट अफ... लाइट अफ...’।
हलका प्राविधिकहरूले सबै बन्द गरिदिए। नाइटक्लबका लागि सजिएको हल अँध्यारो भएसँगै सुनसान बन्यो।
ठूलो स्क्रिनमा मधुर संगीतका साथ सुरु भयो फिल्म निर्माण टिमले छुट्याएको कार्यविभाजनको वृतान्त।
स्क्रिनमा देखियो, फिल्मको निर्देशक दीपेन्द्र लामाको नाम। त्यसैगरी फिल्मले फिल्म क्षेत्रमै नयाँ पद सिर्जना गरेको रहेछ ‘सल्लाहकार निर्देशक’। जुन, पद सम्हाल्नेको नाम थियो दीपा श्री निरौला।
हलमा दुई पटक कार्यविभाजनको फुटेज प्रस्तुत गरियो। सञ्चारकर्मी आपसमा मुखामुख गर्न थालेका थिए। किनकि, नेपाली फिल्म बजारमै नौलो थियो ‘सल्लाहकार निर्देशक’।
स्क्रिन बन्द भयो, हलमा पुनः दीपश्रीको निर्देशनात्मक आवाज सुनियो ‘लाइट अन...’।
एक्सन कटमा अल्झिए निर्देशक
एक अधबैंसे, सोझो युवक, अनुहारमा चुस्स सेता दारी, झुस्स कपाल अनि बायाँ पाखुरामा सेतो झोला र दायाँ पाखुरामा एक युवती च्यापेर हस्याङ फस्याङ गर्दै एक जोडी हल प्रवेश गर्यो।
उनीहरू थिए कलाकार दीपकराज गिरी र केकी अधिकारी। जो फिल्मको मुख्य भूमिकामा समेत देखिने छन्।
संवादमा आधुनिक शैलिमा ठाँटिएकी युवती एक ‘अधबैंसे युवक’सँग विवाह गर्न आतुर छिन्। उनी हलमा नभएर सिडिओ समक्ष पुगेकी छन्। तर, त्यहाँ सिडिओ थिएनन्।
यतिकैमा चोटिला व्यंग्य गर्दै भित्रिए कलाकार ‘माग्ने बुढा’ उर्फ केदार घिमिरे। उनी भन्दै थिए, ‘आज सिडिओ हुनुहुन्न, म छु अनि वरिपरि भिडियो खिच्ने छन्। बरु भन विहे गर्ने भन्दै छौ केटो खै?’
केटा र केटीको उमेरमा आकाश–पातालको फरक देखिन्थ्यो। समाजमा हुने अनमेल विवाहमाथिको एउटा उदाहरण थियो यो दृश्य। केदार यही विषयलाई व्यंग्य गर्दै थिए।
माहोल छिचोल्दै भित्रिए अर्का कलाकार जितु नेपाल। उनले प्रक्रिया पुग्नुपर्ने भन्दै विवाह रोक्न दबाब दिन थाले। जवाफमा ‘माग्ने बुढा’ले प्रहसन प्रहार गरे, ‘बालुवाटारको जग्गा किनबेचमा त प्रक्रिया पुग्नु परेन विवाहमा के को प्रक्रिया?’
उता दीपक र केकी एकअर्काको अंकमालमा रमाउन पुगे। केदारले प्रश्न तेर्स्याए,‘ सिडिओ कार्यालयमै लपक्कै?’ ‘लपक्कै हैन, ‘छ माया छपक्कै,’ हाँस्दै ती जोडीले जवाफ दिए।
अनुमान लगाउन सकिन्थ्यो की फिल्म निर्माण घोषणाको शुभमुहूर्त ‘सट’ सकिएको थियो।
निर्देशकले ‘कट’ भन्नुपर्ने अवस्था थियो। तर, निर्देशक लामा केही परबाट ४ कलाकारहरूको अभिनय हेर्नमै व्यस्त थिए। हतार हतार जितु र केदारले लामालाई बोलाएपछि मात्र देखियो लामाको ‘एक्सन कट’ सक्रियता।
यसपछि बल्ल सुरु भयो सञ्चारकर्मीसँगको प्रश्नोत्तर। स्टेजमा थिए फिल्मका तर्फबाट दीपकराज, केदार, केकी, दीपाश्री र निर्माता रोहित अधिकारी सहितको टिम।
छक्का पञ्जा ब्यानरसँगको टिमअप
नेपाली फिल्म बजारमा सर्वाधिक व्यापार गर्न सफल फिल्म छक्का पञ्जा निर्माण टिमसँग ‘टिमअप’ गरेर आएका रोहित यस फिल्मका एक्ला लगानीकर्ता हुन्।
फिल्मले लगानी सुरक्षित गरेपश्चात ५० प्रतिशन नाफामा जोडिएका छन् दीपक–दीपा अर्थात निर्देशक कलाकार।
लामो समयसम्म टेलिभिजनमा प्रसारण भएको टेलिसिरियल ‘तीतो सत्य’को घट्दो क्रेजलाई बुझेर फिल्म निर्माणमा हुमिएका थिए कलाकार दीपक–दीपा।
फिल्म ‘छ एकान छ’, ‘वडा नं. छ’ हुँदै उनीहरूले छक्का पञ्जाको ३ वटा सिक्वेल समेत निर्माण गरिसकेका छन्।
त्यसमध्ये छक्का पञ्जाका सिक्वेललाई दीपाश्री आफंैले निर्देशन समेत गरिन्। तर, ‘छ माया छपक्कै’मा दीपा हुँदाहुँदै किन दीपेन्द्र नै चाहियो भन्ने जिज्ञासा धेरैमा छ।
निर्देशक लामा जो आफैंमा सञ्चारकर्मी तथा फिल्म समीक्षक हुन्। उनले धेरै फिल्महरूलाई निर्मम ढंगमा समीक्षा समेत गरे। तर, उनी अन्ततः फिल्म निर्देशनमा जुटेका छन्।
उनले यसअघि २ वटा फिल्म ‘घामपानी’ र ‘गोपी’ निर्देशन गरिसकेका छन्। जसमा घामपानीबाट दर्शकको मन राख्न सफल भए। तर, फिल्म ‘गोपी’ व्यावसायिक हिसाबमा सफल भएन।
‘यस्तो अवस्थामा छक्का पञ्जा टिमले निर्देशनमा लामालाई नै किन छनोट गर्यो?’ यो पनि आम दर्शक र सञ्चारकर्मीका लागि जिज्ञासाको पाटो हो।
शंका, प्रश्न र जवाफ
माथिको पृष्ठभूमि र ‘छक्का पञ्जा’ ताका बनेका गसिपलाई आधार मान्ने हो भने शंकाका आधार प्रचुर भेटिए। निर्देशनमा निर्देशकमाथि कलाकार नै हाबी हुने तथा हस्तक्षेप हुने गसिपले सिने बजार गर्माउँँथ्यो।
यिनै विषयका आडमा सञ्चारकमीले दर्जन बढी प्रश्न तेर्स्याए। अधिकांश प्रश्नको सार थियो, ‘निर्देशक लामाले टिममा रहेर स्वविवेकले उक्त फिल्म निर्देशन गर्ने माहोल तयार हुन सक्छ?’
‘फिल्म बजारमा हुँदै नभएको शब्द ‘निर्देशक सल्लाहकार’ किन आवश्यक पर्यो?’ ‘निर्देशक स्वयंले तयार पारेको फिल्मको स्क्रिप्टका लागि पटकथा र संवादमा फिल्मका कलाकार हाबी छन्। यसले निर्देशकलाई आफ्नो कन्सेप्टअनुसार काम गर्ने वातावरण मिल्ला?’
‘के दिपेन्द्र लामा सेरेमोनियल निर्देशक हुन् जसलाई दीपाश्रीले चलाउने छिन्?’
प्रश्नको जवाफका लागि दीपकाराज नै हाबी देखिन्थे। संक्षेपमा दीपकको जवाफ थियो, ‘फिल्म एउटा टिमवर्क हो। यसमा टिमले मिलेर लागिपर्ने हो। तर, अन्तिम डिसिजन निर्देशककै हुन्छ,’ उनले थपे, ‘अनुभव सेयरिङका हिसाबमा दीपालाई सल्लाहकार राखिएको हो। जसरी अन्य कार्यदलमा विभिन्न पोष्ट हुन्छन् उसैगरी। जे गरे पनि चाहना ‘छक्का पन्जा’ले गरेको व्यापारलाई बढाउने उदेश्य हो।’
बोल्ने क्रममा दीपकले केही डिमान्डेड र महंगा कलाकारलाई समेत सन्देश दिँदै भने, ‘हामीले रोहित जी सँग लगानी सुरक्षित पछिको सेयरीङमा काम गरेका छौं। यो एउटा रिक्स पनि हो बिना पारिश्रमिक सफलतासँग जोडिएका छौं।’
उनले थपे, ‘दिपेन्द्र र मेरो स्कुलिङ फरक होला तर समझदारीमा हामी अघि बढेका छौं, हाम्रो टिममा सबै सेरेमोनियल, कार्यकारि नै हुन्। यस टिममा मैले एउटा इँटा थप्न सके भने पनि हाम्रो सफलता हुनेछ। त्यसैले फिल्ममा अभिनय गर्ने कलाकारदेखि निर्माता सबै निर्देशक हुन्।’
दीपक केही रोमान्टिक हुँदै भने, ‘यो फिल्म खासमा ‘एभेन्जर’ जस्तो हो।’
यता निर्देशक लामा जवाफमा केही हड्बडाए झैं देखिन्थे। सञ्चारकर्र्मी, समीक्षक र यस अघिको निर्देशनलाई एक सिकाइको चरणका रुपमा व्याख्या गर्दै उनले ‘छ माया छपक्कै’को यात्रा पनि सिकाइको अर्को चरण भएको बताए।
नेपाली फिल्म उद्योगमा दीपाद्वारा निर्देशित छक्का पञ्जा सिरिजले पाएको व्यावसायिक सफलताबाट आफूले पनि केही सिक्नुपर्ने निर्देशक लामाको तर्क थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
