पर्वत- जब आकाशमा कालो बादल मडारिन थाल्छ, अनि मेघगर्जन सुरु हुन्छ, तब यहाँको एक गाउँका बासिन्दा ज्यान जोगाउनका लागि हतारहतार घरभित्र पस्न थाल्छन्।
वर्षेनी चट्याङका कारण मानवीय र पशु चौपायाको क्षति हुन थालेपछि पर्वतको महाशीला गाउँपालिका–६, फलामखानीका बासिन्दा त्रसित हुने गरेका छन्। बिहान, दिउँसो र साँझ जुनसुकै बेला पनि आकासमा गड्यङगुडुङ गर्न सुरु गरेपछि घरभित्र छिर्नुपर्ने बाध्यता रहेको स्थानीयवासीको भनाइ छ।
उक्त गाउँमा वर्षेनी चट्याङका कारण एक जनादेखि तीन जनासम्मको ज्यान गएकाे छ भने वर्षेनी धेरै पशुचाैपायाको समेत मृत्यु हुने गरेको स्थानीयवासी ठाकुर रसाइलीले जानकारी दिए। उनले भने, 'मानवीय क्षति नभएको वर्ष नै हुँदैन।' उक्त गाउँ पर्वतको सबैभन्दा बढी चट्याङ पर्ने गाउँको रुपमा परिचितसमेत रहेको छ। विशेषगरी फागुनदेखि जेठसम्म बढी घटना घट्ने गरेका छन्। अहिलेसम्म झण्डै २० जनाको चट्याङका कारण मृत्यु भइसकेको छ भने घाइतेको सङ्ख्या त्यति नै छ।
स्थानीय जीतबहादुर विकका अनुसार आकासमा मेघगर्जन सुरु भएपछि घर वरिपरि मदिरा छर्केर भित्र बस्ने चलनसमेत रहेको छ। मदिरा छर्केपछि चट्याङ नपर्ने परम्परागत मान्यताका आधारमा साे कार्य गर्ने गरेकाे उनले बताए। उनले भने, 'मदिरा छर्केको दिन चट्याङ नपरेकाले विश्वास लिने गरेका छाैं।'
दलित समुदायको बाहुल्यता रहेको उक्त गाउँमा भूतप्रेत र दैवीशक्तिको पूजामा मदिरा चढाउने प्रचलन रहेको छ। 'उक्त मदिरा घर वरिपरि छर्केपछि दैवीप्रकोप हट्ने विश्वासले मदिरा छर्कने गरिएको हो', उनले भने, 'बाबुबाजेको पालादेखि नै यस्तै गर्ने प्रचलन भएर हामीले पनि मेघगर्जन सुरु भएपछि मदिरा चढाउने गरेका छाैं।'
अर्का वृद्ध धनबहादुर विश्वकर्माले चट्याङका कारण गाउँमा ठूलो समस्या भएको गुनासाे गरे। एउटै गाउँमा वर्षेनी चट्याङ पर्नुको कारण पत्ता नलागेको बताउँदै उनले फलामको धाऊ भएर हो वा अन्य कारणले हो भन्ने पत्ता लगाउन सके सुरक्षित हुन सकिने बताए। झण्डै ८० वर्ष अघिसम्म उक्त स्थानमा रहेको फलामखानीबाट फलाम निकाल्ने गरिन्थ्यो। अहिले भने उक्त खानी बन्द रहेको छ।
समुद्री सतहदेखि दुई हजार फिटभन्दा माथिकाे उचाइमा रहेको उक्त गाउँ जिल्लाकै सबैभन्दा विकट गाउँसमेत हो। पछिल्लो समय नेपाल टेलिकम र एनसेलको टावरसमेत निर्माण भएको उक्त गाउँमा चट्याङका घटना झनै बढ्न थालेको स्थानीयवासीले बताएका छन्। 'दिउँसोको समयमा मेघगर्जन भएमा विद्यालय नै बन्द गर्नुपर्ने अवस्था छ', स्थानीय बलबहादुर क्षेत्रीले भने, 'वर्षायामभन्दा हिउँदमा चट्याङ बढी पर्ने भएकाले स्थानीयवासी समस्यामा पर्ने गरेका छन्।'
वर्षेनी चट्याङबाट हुने क्षति न्यूनीकरण गर्नका लागि कुनै सचेतनामूलक कार्यक्रम पनि सञ्चालन हुन नसकेको स्थानीयवासीको गुनासो छ। यस्तो प्राकृतिक विपत्तिमा पर्नेलाई राज्यले क्षतिपूर्तिसमेत निकै न्यून दिने गरेको पीडितको गुनासो छ।
वर्षेनी चट्याङको पीडा खेप्न नसकेको भन्दै गाउँका झण्डै एक दर्जन परिवार बसाइँसराइसमेत गरेका छन्। उनीहरु बसाइँ सरेर स्याङ्जा, पोखरा र नजिकै रहेको स्याङ्जाको घण्टेदेउराली बजारमा गएको स्थानीय रनबहादुर परियारले बताए। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
