नेपालगञ्ज- ‘शान्ति सद्भाव र एकता, राष्ट्र निर्माणमा हाम्रो प्रतिबद्धता’ भन्ने नाराका साथ नेपालगञ्जमा आगामी मंसिर ५ गते ‘नेपालगञ्ज म्याराथन–२०१७’ आयोजना हुने भएको छ।
क्रिएटिभ ह्यान्ड्सले विभिन्न सामाजिक संघसंस्थाको साझेदारीमा ‘नेपालगञ्ज पिस म्याराथन तथा बहुभाषिक शान्ति सद्भाव उत्सव’ आयोजना गर्न लागेको हो।
खुल्ला प्रतिस्पर्धात्मक म्याराथन नेपालगञ्ज रंगशालाबाट सुरु भई कोहलपुर पुगेर फर्कनेछ। म्याराथनमा शीर्ष धावकसहित करिब ६ सय सहभागी हुने आयोजक क्रिएटिभ ह्यान्ड्सका अध्यक्ष टीएस ठकुरीले जानकारी दिए। ‘नेपाली सेना, नेपाल प्रहरी र सशस्त्र प्रहरीबाट नै धेरै धावकहरु सहभागी हुनेछन्,' उनले भने।
म्याराथन, हाफ म्याराथन लगायत ५ किलोमिटर विद्यालयस्तरीय छात्र छात्रा दौड तथा व्हिलचेयर दौड समेत समावेश गरिएको आयोजकले जनाएको छ। उत्सवमा गीत, संगीत र गजल, कविता एवं नृत्यसमेत प्रस्तुत गरिनेछ।
२०६३ मंसिर ५ गते भएको विस्तृत शान्ति सम्झौतासँगै एक दशक लामो सशस्त्र द्वन्द्वको अन्त्य भएको थियो। द्वन्द्वका क्रममा सबैभन्दा बढी प्रभावित मध्यपश्चिम क्षेत्रको केन्द नेपालगञ्जबाट दिगो शान्ति र सद्भावका लागि पहल गर्नु कार्यक्रमको उद्देश्य रहेको आयोजकले जनाएको छ। ०७२ देखि नै हरेक मंसिर ५ गते यस्ता कार्यक्रम हुँदै आएको छ।
नेपालगञ्ज म्याराथनमा पुरुष खुल्लातर्फ विजेताले ५५ हजार नगद पुरस्कार पाउनेछन्। त्यसैगरी, दोस्रोले २५ हजार, तेस्रोले १५ हजार नगद प्राप्त गर्नेछन् भने खुल्ला म्याराथनतर्फ शीर्ष ८ जनालाई पुरस्कृत गरिनेछ। चौथो स्थान हासिल गर्नेले १० हजार, पाँचौंले ८ हजार, छैटौंले ७ हजार, सातौंले ६ हजार र आठौंले ५ हजार नगद पुरस्कार पाउने आयोजकको भनाइ छ। त्यसैगरी महिला खुल्ला हाफ म्याराथनमा विजेतालाई ३० हजार, द्वितीयले १५ हजार र तृतीयले १० हजार पाउनेछन्। हाफ म्याराथनमा शीर्ष ६ जना नगदबाट पुरस्कृत हुनेछन्।
आउँदो वर्ष आयोजना हुने आठौं राष्ट्रिय खेलकुद प्रतियोगिताको तयारीमा रहेको मध्यपश्चिम क्षेत्रीय खेलकुद विकास समितिले सम्पूर्ण प्राविधिक व्यवस्थापनको संयोजन गरेको छ। नेपालगञ्ज म्याराथन तथा हाफ म्याराथनलाई पनि आठौं खेलकुद मिसनसँग जोडिएको क्षेत्रीय खेलकुद विकास समितिका अध्यक्ष भीम बलीले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
