जिल्ला नेतृत्व चयनसँगै गरिएकाे नेकपा एकता घाेषणा कार्यक्रम।
भैरहवा- नेपाल कम्युनिष्ट पार्टी (नेकपा)को जिल्ला नेतृत्व चयनबारे तीव्र असन्तुष्टि बाहिर आएको छ। एउटै व्यक्तिलाई दुई पद तथा कतिपयको पद घटुवा गरेको भन्दै केन्द्रीय नेतृत्वप्रति तीव्र आलोचना तथा असन्तुष्टि पोखिएकाे हाे।
केन्द्रीय नेतृत्वले लामो समयदेखि निचाेडमा पुग्न नसकेकाे जिल्लास्थित अध्यक्ष र सचिवको टुङगो लगाएको थियो। प्रदेश ५ मा मनोनित अध्यक्ष र सचिव अधिकांश प्रदेश र स्थानीय तहमा जिम्मेवार पदमा रहेका व्यक्ति छन्।
नेकपाभित्र 'एक व्यक्ति एक पद'को चर्चा चलेपनि उक्त चर्चालाई लत्याउँदै प्रदेशसभा सदस्य, स्थानीय तहका प्रमुख, उपप्रमुख, अध्यक्ष/उपाध्यक्षलाई दोहोरो जिम्मेवारी दिइएको छ। साविकको लुम्बिनी अञ्चलका जिल्लाका रुपमा रहेका रुपन्देही र अर्घाखाँचीमा स्थानीय र प्रदेशसभामा निर्वाचित व्यक्ति नै अध्यक्ष र सचिवमा मनोनित भएका छन्।
रुपन्देहीको अध्यक्षमा बुटवल उपमहानगरपालिका प्रमुख शिवराज सुवेदी र सचिवमा प्रदेश सांसद दधिराम न्यौपाने मनोनित भएका छन्। अध्यक्ष पूर्व एमाले हुन् भने सचिव पूर्व माओवादी केन्द्रका केन्द्रीय सदस्य हुन्। हाल न्यौपाने नेकपाको केन्द्रीय सदस्य तथा सुवेदी नेकपाको प्रदेश सदस्य थिए।
अर्घाखाँचीमा पूर्व एमालेबाट प्रदेश सांसद चेतनारायण आचार्य अध्यक्ष बनेका छन् भने पूर्व माओवादी केन्द्रबाट सन्धिखर्क नगरपालिका उपप्रमुख ठाकुर बिक सचिव बनेका छन्।
गुल्मीमा छत्रकोट गाउँपालिकाका अध्यक्ष मधुकृष्ण पन्त नै जिल्लाकाे पनि अध्यक्ष बनेका छन्। उनी पूर्व एमालेका जिल्ला अध्यक्षसमेत रहिसकेका व्यक्ति हुन्।
पाल्पामा पूर्व एमालेबाट नारायण आचार्य अध्यक्ष भएका छन्। उनी प्रदेश सांसद हुन्। नतृत्वले जिल्लाको अध्यक्ष र सचिवको टुंगो लगाएसँगै साविक लुम्बिनी अञ्चलमा नेतृत्वप्रति तीव्र असन्तुष्टि देखिएको हाे।
घटुवामा परेको भन्दै पदत्याग
केहीले पद तथा जिम्मेवारीमा घटुवा हुनुपरेकोमा आक्रोश व्यक्त गरेका छन् भने कोहीले सँधै एउटै व्यक्तिलाई मात्र नेतृत्व गर्ने अवसर दिइएको भन्दै असन्तुष्टि जनाएका छन्। सिफारिस गरेर पठाइएका नामभन्दा अन्य व्यक्ति नै नेतृत्वमा आएपछि जिल्लाका कतिपय नेताले अचम्ममा परेकाे समेत प्रतिक्रिया दिएका छन्।
रुपन्देहीका सचिव चयन भएका दधिराम न्यौपानेले आफूलाई सचिव पद स्वीकार्य नभएको बताए। तत्कालीन माओवादीको पोलिटब्युरो, केन्द्रीय सदस्य र रुपन्देही इन्चार्ज समेत भइसकेका व्यक्तिलाई पद घटाएर सचिव बनाएको भन्दै उनले पदत्याग गरेकाे जनाएका छन्। उनले 'एक व्यक्ति एक पद'काे अवधारणालाई मुर्त रुप दिन पनि आफू पदमा नरहेकाे जिकिर गरे। 'एक व्यक्ति धेरै पदमा रहँदा अन्यलाई जिम्मेवारी मिल्दैन, त्यसकारण पनि सचिव पदमा नरहने गरी केन्द्रीय नेतृत्वलाई पत्राचार गरेकाे हुँ', न्याैपानेले भने।
सिफारिस बाहेककालाई जिम्मेवारी
रुपन्देहीमा अध्यक्षको लागि गोपाल भट्टराई र नारायण जिसीको नाम सिफारिस भएको थियो। तर, हाल रुपन्देहीको अध्यक्षको जिम्मेवारी बुटवल उपमहानगरपालिकाका प्रमुख शिवराज सुवेदीलाई दिइएको छ। अध्यक्षमा सिफारिस नेता भट्टराईले पार्टीले नीतिगत रुपमा गलत निर्णय गरेको प्रतिक्रिया दिए। उनले घुमाउरो पारामा पार्टीकाे शीर्ष नेतृत्वकाे निर्णयप्रति असन्तुष्टिसमेत जनाए।
‘पद नभएकालाई पद छैन। पदमा रहेकालाई थपेर दिइयो। पार्टीले के आधारमा छनाेट गर्यो, म त अचम्ममा परे,’ उनले भने। भट्टराई २०२५ सालदेखि पार्टीमा क्रियाशिल रहेर काम गदै आएका व्यक्ति हुन्।
नवलपरासी पश्चिममा जिल्ला अध्यक्षमा भविश्वर तिवारी र सचिवमा तुलसी पासी जिम्मेवारी दिइएको छ। तिवारी पूर्व माओवादी र पासी पूर्व एमालेका नेता हुन्। नवलपरासीमा दिइएकाे जिम्मेवारीलाइृ लिएर समेत असन्तुष्टि देखिएको छ।
पूर्व एमाले सचिव र संगठन विभाग प्रमुख भएका थानप्रसाद गैरेले पार्टीले आफूखुसी निर्णय गर्दा पार्टीमा लामो समय योगदान गरेको नेताहरूलाई पछाडि धकेलिएको जिकिर गरे। पार्टीले सच्चा नेताहरूको कदर नगरेको उनको आरोप छ।
पश्चिम नवलपरासीमा तत्कालीन माओवादी केन्द्रका अध्यक्ष घनश्याम यादव सर्वसम्मत अध्यक्ष हुनेमा अधिकांश नेकपाका कार्यकर्ता विश्वस्त थिए। यादवलाई अध्यक्ष र तत्कालीन गैरेको नाम जिल्ला सचिवमा सिफारिस गरिएको थियो।
पाल्पामा पनि सिफारिस गरिएकाभन्दा अन्य व्यक्तिहरू नै अध्यक्ष र सचिवमा नियुक्त भएका छन्। जिल्लाबाट राधाकृष्ण कँडेल र राजेन्द्र विश्वकर्माको नाम सिफारिस गरेर पठाइएको थियो। तर, अध्यक्षमा नारायण आचार्य र सचिवमा गिरबहादुर थापाको नाम सिफारिस भएर आएपछि नेता कार्यकर्ताहरु असन्तुष्ट बनेका हुन्। आचार्य प्रदेशसभा सदस्य हुन्। पूर्व उपाध्यक्ष मोहन थापाले आफू अध्यक्ष हुन पाउनुपर्ने भन्दै यस अगाडि नै विज्ञप्ति जारी समेत गरेका थिए।
३३ वर्षदेखि जनप्रतिनिधि भएका व्यक्ति नै अध्यक्ष
गुल्मीमा ३३ वर्षदेखि जनप्रतिनिधि भएका व्यक्ति नै जिल्ला अध्यक्ष नियुक्त भएका छन्। मधुकृष्ण पन्त २०४३ सालदेखि तत्कालीन एमालेको जनप्रतिनिधि रहँदै आएका व्यक्ति हुन्। उनी अहिले छात्रकोट गाउँपालिकाको प्रमुखसमेत हुुन्।
पन्तले भने, ‘सिफारिस गरेका व्यक्तिलाई भन्दा मलाई अध्यक्षको जिम्मेवारी दिइएछ। हामी पार्टी कार्यकताहरू यसमा सन्तुष्ट हुनुपर्छ।’ गुल्मीबाट अध्यक्षमा बालसिंह काउचा र सचिवमा बुद्धि जिसीलाई सिफारिस गरेर पठाएको थियो।
अर्घाखाँचीकोमा चेतनारायण आचार्यलाई अध्यक्ष बनाइएको छ। उनी पनि प्रदेशसभा सदस्य हुन्। सन्धीखर्क नगरपालिकाका उपप्रमुख ठाकुर विक सचिवमा चयन भएका छन्।
यसरी हेर्दा एउटै व्यक्तिलाई दोहोरो पद दिएको र पहिलाको पद भन्दा घटुवा गरिएकाले पनि नेता तथा कार्यकर्तामा तीव्र असन्तुष्टि उत्पन्न भएको देखिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
-1763559424.jpg)
-1764080971.png)
