बुटवल- भौतिक पूर्वाधार तथा विकास मन्त्रालय अन्तर्गतको भौतिक पूर्वाधार विकास कार्यालयको आयोजनामा रुपन्देहीको दक्षिणी क्षेत्र मर्चवारमा सडक स्तरोन्नतिका लागि शिलान्यास गर्ने औपचारिक कार्यक्रम सुरु भइसकेको थियो। मंगलबार दिउँसो कार्यक्रम सम्पन्न भएको थियो।
नेकपा नेताले नै कार्यक्रम सञ्चालन गर्ने र मर्यादाक्रम मिचेर अतिथिहरूको आसन ग्रहणसम्मका काम गरी नेकपा नेताले प्रदेश सरकारको कार्यक्रममा रजाईं गरेको आरोप लागेको छ। प्रतिपक्षी दल र सत्ताधारी दलकै केही सांसद् तथा नेता पनि आक्रोशित बनेका छन्।
मन्त्रालयको कार्यक्रम भएपनि कार्यक्रमको सञ्चालन गर्न नेकपाका प्रदेश कमिटी सदस्य बाबुलाल यादव पुगे। उनले कार्यक्रममा आसन ग्रहण हुँदै कार्यक्रम अघि बढाए।
सुरुमा कार्यक्रममा अध्यक्षको रुपमा मर्चवारी गाँउपालिकाका अध्यक्ष केशवनन्द बनियाँलाई बोलाए। त्यसपछि प्रमुख अतिथिको रूपमा प्रदेश ५ का मुख्यमन्त्री शकंर पोखरेललाई आसन ग्रहण गराए। मुख्यमन्त्री पोखरेलले आसन ग्रहण गरेपछि पालो आयो विशिष्ट अतिथिको आसन ग्रहण गराउने।
प्रदेश पर्यटन मन्त्री लीला गिरीलाई कार्यक्रमको विशिष्ट अतिथिका रुपमा मञ्चमा बोलाइयो। सो कार्यक्रममा रुपन्देही-४ बाट निर्वाचित संघीय सांसद प्रमोद यादव पनि कार्यक्रममा सहभागी थिए।
मर्यादाक्रमअनुसार प्रदेशमन्त्रीभन्दा संघीय सांसद् माथि हुने प्रावधान छ। मर्यादाक्रम विपरीत प्रदेशमन्त्री गिरीलाई विशिष्ट अतिथि बनाइएपनि मन्त्री गिरी भने कार्यक्रममा सहभागी नै नभई तत्काल फर्किए।
आसन ग्रहण गराउने क्रममा सञ्चालक यादवले प्रदेशमन्त्री र प्रदेश सासंदपछि संघीय सांसदलाई बोलाए। संघीय सांसद सुजिता शाक्यलाई पनि प्रदेश सांसदभन्दा पछाडि मञ्चमा बोलाइएपछि नेकपाकै नेता ओमप्रकास यादव गुल्जारी तत्काल रुष्ट भए। तर, पनि कार्यक्रम सञ्चालकले मर्यादाक्रम सुधार गर्न चाहेनन्।
०००
कार्यक्रममा बोल्नेको लिस्ट लामै थियो। शुरुमै संघीय सांसद प्रमोदकुमार यादवलाई कार्यक्रममा बोल्न बोलाइयो। सांसद यादव नेपाली कांग्रेसबाट निर्वाचित हुन्। उनी कार्यक्रम भएको क्षेत्रबाटै निर्वाचित सांसद पनि हुन्।
सांसद यादव बोलेर गएपछि कार्यक्रम संचालक बाबुलाल यादवले गाउँपालिका अध्यक्षलाई कार्यक्रममा सम्बोधन गर्न बोलाए। कोटहीमाई गाउँपालिका अध्यक्ष चन्द्रभुषण यादवले भाषण गरेपछि पुनः प्रदेश सांसद अष्टभुजा पाठकलाई कार्यक्रममा भाषण गर्ने निम्तो दिइयो।
संघीय सांसदलाई गाउँपालिका अध्यक्ष अगाडि र आफूलाई पछाडि बोलाएपछि प्रदेशसभा सदस्य अष्टभुजा पाठक रुष्ट भए। उनले भाषण गर्ने क्रममा मर्यादाक्रममा गम्भीर त्रुटी भएको र प्रदेश सरकारको कार्यक्रममा नेकपाको रजाई भएको भन्दै आक्रोशित बने।
पाठक पनि सोही क्षेत्रबाट प्रदेशसभामा निर्वाचित सांसद हुन्। उनी कांग्रेसबाट निर्वाचित भएका थिए।
त्यत्तिमात्रै होइन मञ्चमा बोल्ने क्रममा पनि नेता यादवले नेकपाको कार्यक्रमजस्तै गरी सञ्चालन गरिरहे। नेकपाको कार्यक्रमको छनक दिने गरी मर्चवारको विकास नेकपाले मात्र गर्न सक्ने भन्दै भाषण गरे।
भौतिक पूर्वाधार मन्त्रालयको कार्यक्रममा सिनियर डिभिजन इन्जिनियर ललित न्यौपानेबाहेक अरुको उपस्थिति देखिएन। चार वटा गाउँपालिका पर्ने मर्चवारमा २ वटा गाउँपालिकाका अध्यक्ष अनुपस्थित थिए।
प्रदेश सरकारको कार्यक्रमलाई नेकपाको जस्तै कार्यक्रम बनाएकोमा थुप्रै असन्तुष्ट थिए। मञ्चमा बसेका नेकपाका अन्य सांसद्लाई पनि उक्त कुरा चिक्त बुझेको थिएन। पटकपटक मर्यादाक्रम बिगारेपछि नेकपाका प्रमुख सचेतक भुमिश्वर ढकालले कार्यक्रम संचालकलाई सच्याउन आग्रह गरेका थिए।
यता संघीय सांसद प्रमोद यादवले प्रदेशको कार्यक्रममा नेकपाको रजाईं हुनु प्रदेश सरकारको कमजोरी भएको बताए। उनले यस्तो गल्ती अर्को पटक नदोहोर्याउन आग्रह पनि गरे।
सडक स्तरोन्नतिको शिलान्यास
रुपन्देहीको मर्चवार प्रवेश गर्ने सडकको स्तरोन्नतिको मुख्यमन्त्री शंकर पोखरेलले शिलान्यास गरेका छन्। भौतिक पूर्वाधार तथा विकास मन्त्रालय अन्तर्गतको भौतिक पुर्वाधार विकास कार्यालयले सडक स्तरोन्नति गर्न लागेको हो।
प्रदेश ५ सरकारले छुट्टाएको ५ करोड रकम अन्तर्गत भैरहवा लुम्बिनी सडकखण्डको हाटिवनगाईंदेखि समेरा खईराघाटसम्मको १९ किलोमिटर मध्ये पहिलो चरणमा ६ किलोमिटर सडकको स्तरोन्नति गर्न लागिएको हो। कार्यालयका सिनियर डिभिजन ईन्जीनियर ललित न्यौपानेले मायादेवि गाँउपालिकाको गरगट्टी चोकदेखि तुनिहवासम्म सडकको स्तरोन्नति गर्न थालिएको बताए। सडक डिबिएसटी प्रविधिमा निर्माण हुनेछ।
सडक स्तरोन्नतिका लागि टेन्डर आह्वान गरिएको छ। ३ करोड ६१ लाख २५ हजारमा टेन्डर परेको छ। सडक निर्माणको जिम्मा बाबुल निर्माण सेवाले पाएको छ। सडक साढे ६ मिटर चौडाईको हुने सडक ५ मिटरमा पिच र डेढ मिटरमा सव बेस हालिने कार्यालयका इन्जिनियर न्यौपानेले जानकारी दिए।
मुख्यमन्त्री शंकर पोखरेलले सडकको बीचमा नरिवल फोडेर सडकको शिलन्यास गरेका हुन्। दशकौं वर्ष पुरानो सडकको स्तरोन्नति भएपछि मर्चवारका जनताले सुख पाउने मुख्यमन्त्री पाखरेलले जानकारी दिए।
उनले सडकलाई गुणस्तरीय र समयमै सम्पन्न गर्नका लागि स्थानीय सरकार र मर्चवारवासीले सहयोग गर्नु पर्नेमा जोड दिएका थिए। मुख्य मन्त्री पोखरेलले प्रदेश सरकार मर्चवारको विकासका लागि मुख्यमन्त्री ग्रामीण विकास कार्यक्रमसहित सडक, यातायात, स्वास्थ्य, शिक्षा र नमूना कृषियोजनालगायतका पूर्वाधार निर्माणमा निरन्तर लागिरहने बताए।
कार्यक्रममा प्रतिनिधिसभा सांसद प्रमोद यादवले पछाडि पारिएको मर्चवारको समग्र विकासप्रति संघीय सरकार, प्रदेश र स्थानीय सरकारको समनवयमा आयोजनाहरु अघि बढाउनुपर्ने बताएका थिए।
कार्यक्रममा पूर्वमन्त्री ओमप्रकाश यादव (गुल्जारी) प्रदेशसभा सदस्य अष्ठभुजा पाठक, कोटहीमाई गाँउपालिका अध्यक्ष चन्द्रभूषण यादव, मर्चवारीदेबी गाँउपालिका अध्यक्ष केशवनन्द बनियालगायतले बोल्दै मर्चवारको विकासमा जोड दिएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
-1763559424.jpg)
-1764080971.png)
