लहान– सार्वजनिक स्थलमा राखिएको मोटरसाइकल आगजनी गरिएको २० दिन बितिसक्दा समेत प्रहरीले दोषीलाई पक्राउ गर्न नसकेको भन्दै पीडितले गुनासो गरेका छन्।
सिरहाको कर्जन्हा नगरपालिका–११ स्थित बस स्टेण्डमा राखिएको ज २ प ६८०४ नम्बरको मोटरसाइकल गत चैत १९ गते राति अज्ञात समूहले आगजनी गरेको थियो।
वडा न ९ का दिलिप कुमार साहले चैत २० गते आफनो मोटरसाइकल आगजनी गरिएको विषय उल्लेख गरी दोषीलाई कारबाही गर्न मागसहितको उजुरी प्रहरीमा दिए।
इलाका प्रहरी कार्यालय मिर्चैयामा दिएको उजुरीमाथि हालसम्म कुनै सुनुवाइ नभएको उनको गुनासो छ।
‘घटनाको भोलिपल्टै मैले ठाडो उजुरी दिएको छु, तर प्रहरीले किटानी जाहेरी माग्छ,’ उनले भने, ‘मैले मान्छे चिनेको छैन। कसरी दिनु किटानी?’
२० दिन बितिसक्दा पनि प्रहरीले दोषीलाई पक्राउ गर्न नसकेको भन्दै उनले गुनासो गरे।
यसरी भयो घटना
एमभिएम पशुपक्षी कृषि फार्मका सञ्चालक साह दाजु नारायण साह सुडीको नाममा दर्ता रहेको ज २ प ६८०४ को मोटरसाइकल चढेर करिब १२ बजे बगाह चोकमा निस्किए।
निर्माण व्यवसायी संघको अधिवेशन तयारीका क्रममा लहान जानुपर्ने भएपछि बस स्टेण्डमा मोटरसाइकल पार्क गरी म्याजिक चढेर उनी लहान गए। त्यहाँबाट करिब साढे ९ बजे राति बगाह फर्कँदा उनको मोटरसाइल जलिरहेको थियो। उनले भने, ‘५ मिनेट अगाडि पुगेको भए आगो लगाउने मान्छे भेटिने सम्भावना पनि थियो।’
उनले तत्कालै कर्जन्हा प्रहरी चौकीको ९८६९२८१५१० नम्बरमा फोन गरे। प्रहरी आउँदा सबा १० बज्यो। प्रहरीले मोटरसाइकलमा लागिरहेको आगो निभायो र सबै कागजी प्रक्रिया पूरा गरेर फर्कियो। तर, प्रहरीकै आँखा अगाडि भएको घटनामा पनि कुनै कारबाही नभएको भन्दै दिलिपले आश्चर्य व्यक्त गरेका छन्।
दोषीलाई पक्राउ गर्न सक्ने संकेत नै फेला परेन– डिएसपी
इलाका प्रहरी कार्यालय मिर्चैयाका डिएसपी शुकदेव खनालले प्रहरीले आफनो स्तरबाट घटनाको अनुसन्धान गरिरहेको बताए। ‘घटनास्थल र पीडितका तर्फबाट दोषीलाई पक्राउ गर्न सक्ने कुनै संकेत फेला परेको छैन,’ उनले भने, ‘कुनै आधार र प्रमाण बिना घटनाको अनुसन्धान सुरु भएकाले ढिलो भएको हो, वास्ता नगरेको होइन।’
कहिलेकाहीँ तार सर्ट भएर आफैं पनि मोटरसाइकलमा आगो लाग्ने गरेको तथ्यलाई आधार बनाएर त्यस कोणबाट पनि प्रहरीले अनुसन्धान गरिरहेको डिएसपी खनालको भनाइ छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।