काठमाडौं- श्रीलंकामा भएको शृंखलाबद्ध विस्फोटमा मारिनेहरूको संख्या २ सय ९० पुगेको छ। आइतबार भएको विस्फोटमा दर्जनौं विदेशीहरू समेत मारिएको बताइएको छ। आक्रमणमा करिब ५ सय जना घाइते भएका छन्।
श्रीलंकाको प्रहरीले घटनामा संलग्न भएको भन्दै २४ जनालाई गिरफ्तार गरे पनि सरकारले आक्रमणकारीको अहिलेसम्म पहिचान हुन सकेको बताएकाे छैन। तर, सयौंको ज्यान जाने गरी गराइएको शृंखलाबद्ध आक्रमणअघि नै त्यसबारेको गोप्य सूचना श्रीलंकाली सुरक्षा निकायलाई थाहा भएको खुलेको छ।
आक्रमणको सूचना थाहा हुँदाहुँदै पनि त्यसलाई रोक्न नसकेको भन्दै अहिले त्यहाँको सुरक्षा निकायको चर्को आलोचना भइरहेको छ। समाचार संस्था एएफपीका अनुसार १० दिनअघि नै आक्रमणको गोप्य सूचना त्यहाँको सुक्षा निकायलाई प्राप्त भएको थियो।
राष्ट्रिय टूहिथ जमाथ (एनटिजे)ले मुख्य गिर्जाघरहरुमा विस्फोटको योजना बनाएको सूचना एक विदेशी गुप्तचर निकायले सुरक्षा निकायलाई उपलब्ध गराएको बताइएको छ।
एनटिजे श्रीलंकाको एउटा मुस्लिम समूह हो। गत वर्ष बुद्धका मूर्ति तोडफोड भएको घटनासँग एनटिजे जोडिएपछि चर्चामा आएको थियो। पछिल्लो आक्रमणमा त्यही समूहको संलग्नता भएको हो या होइन भन्ने बारे भने अहिलेसम्म केही खुलेको छैन।
समाचारअनुसार श्रीलंका प्रहरी प्रमुख पुजुथ जयसुन्दरालले आक्रमण हुनुभन्दा १० दिनअघि अप्रिल ११ मा नै आत्मघाती उक्त सूचना देशभरका सुरक्षा अधिकारीहरुमाझ जारी गरेका थिए।
‘एनटिजेले मुख्य गिर्जाघर र कोलोम्बोस्थित भारतीय हाई कमिसनमा आक्रमण गर्ने विवरण एउटा विदेशी गुप्तचर निकायले दिएको छ,’ उक्त चेतावनीपूर्ण सूचनामा भनिएको थियाे।
भारतीय अंग्रेजी अखबार इन्डियन एक्सप्रेसका अनुसार आक्रमण हुनसक्ने विशेष गोप्य सूचना भारतले श्रीलंकाका सुरक्षा अधिकारीलाई दिएको थियो।
पाकिस्तानकाे कराँचीमा श्रीलंकामा मृत्यु भएकाहरुकाे सम्झनामा आइतबार साँझ आयाेजित द्विप प्रज्ज्वलन अवलाेकन गर्दै एक बालक।
श्रीलंकाका प्रधानमन्त्री रनिल विक्रमासिङ्घेले आइतबारको आक्रमणका बारेमा प्राप्त पूर्व सूचनाका आधारमा सुरक्षा निकायले कारबाही अगाडि नबढाएको विषयमा छानबिन हुनुपर्ने बताएका छन्। आइतबार साँझ टेलिभिजन सम्बोधनमा उनले उक्त आक्रमणका बारेमा प्राप्त सूचनाबारे आफूलगायत अन्य मन्त्रीहरूलाई समेत जानकारी नदिइएको बताएका थिए।
‘किन प्रयाप्त सावधानी अपनाइएन भन्ने कुरामा हामीले हेर्नुपर्छ,’ उनले भने, ‘न त मलाई न त मन्त्रीहरुलाई नै यसबारे सूचित गरियो।’ तर, उनले अबको प्राथमिकता दोषीलाई कारबाही गर्ने रहेको उल्लेख गरेका छन्।
सन् २००९ मा २६ वर्ष लामो गृहयुद्ध सकिएयता भएको सबैभन्दा धेरै मानवीय क्षति भएकाे आइतबारको घटनाले श्रीलंका स्तब्ध भएको छ। श्रीलंका सरकारले विस्फोटकाे घटना भएसँगै तत्काल लागू हुने गरी आइतबार साँझ ६ बजेदेखि साेमबार बिहान ६ बजेसम्मका लागि निशेधआज्ञा जारी गरेकाे थियाे।
घटनाबारे भ्रामक सूचना सम्प्रेषण भएकाे भन्दै फेसबुक, ह्वाट्स एपलगायतका सामाजिक सञ्जाल प्रयाेगमा समेत प्रतिबन्ध लगाएकाे छ।
प्रधानमन्त्री विक्रमासिङ्घेले सुरक्षा परिषद्का उच्च सैन्य अधिकारीसहितकाे आकस्मिक बैठक गरेका छन। उद्धारका लागि २ सय भन्दा बढी सेना परिचालन गरिएको छ। त्यस्तै उनले आजका लागि आकस्मिक संसद् बैठक समेत बोलाएका छन्।
(एजेन्सीहरुको सहयोगमा)
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।