कञ्चनपुर- कञ्चनपुरको भीमदत्तनगरपालिकास्थित मुक्त हलिया बस्तीमा पहिलोपटक संघीय मन्त्रीले निरीक्षण गरेकी छिन्। आइतबार भूमि व्यवस्था, सहकारी तथा गरिबी निवारण मन्त्री पद्माकुमारी अर्याल भिमदत्त नगरपालिका-१९ स्थित बागफाटा र वडा नम्बर १ स्थित बाह्रकुण्डाको हलिया बस्तीमा पहिलो पटक पुगेकी हुन्।
आफ्नो बस्तीमा पहिलोपटक मन्त्री उपस्थित भएर आफ्नो समस्याका बारेमा जानकारी लिएपछि स्थानीय हलियाहरुले आफ्नो समस्या समाधान हुने अपेक्षा गरेका छन्। हलियामुक्त भएको लामो समय भइसक्दा पनि हालसम्म पुनर्स्थापना हुन नसक्दा आफूहरु समस्यामा परिरहेको गुनासाे गरेका थिए।
विगतमा स्थानीय राजनैतिक दलका प्रतिनिधिहरुले आफूहरुको मुद्दा उठाएपनि पुनर्स्थापनामा पहल नगरेको उनीहरुको गुनासो छ। आफ्नो बस्तीमा पहिलोपटक मन्त्री पुगेपछि हर्षित भएका स्थानीयले मन्त्री समक्ष शिक्षा स्वास्थ्य लगायतका आधारभूत आवश्यकता पूर्तिको माग गरेका थिए।
सरकारले आवास निर्माणका लागि उपलब्ध गराउँदै आएको रकम भवन निर्माण गर्न अपुग हुने भन्दै मुक्त हलिया समाजका अगुवा सिबी लोहारले रकम थप गर्न माग गरे। ‘हामीलाई त्यो रकम पुग्दैन’, लाेहारले भने, ‘मन्त्रीज्यूले पहिलो पटक बस्तीको अवलोकन गरेपछि रकम बढ्ने अपेक्षा गरेका छौं।’
विगतमा बँधुवा मजदुरसरह जिविकोपार्जन गरेका उनीहरु लामो समयदेखि पुनर्स्थापनाको पर्खाइमा छन्। राष्ट्रिय मुक्त हलिया महासंघका अध्यक्ष इश्वर सुनारले समाजको तर्फबाट मन्त्री अर्याललाई ज्ञापनपत्र बुझाएका थिए।
ज्ञापनपत्र बुझेपछि मन्त्री अर्यालले यसै वर्ष पुनर्स्थापनाको काम सम्पन्न हुने आश्वासन दिइन्। यसै वर्ष मुक्त हलैयाको पुनर्स्थापनाको सम्पूर्ण काम सम्पन्न गर्नेगरी सरकार अगाडि बढेको मन्त्री अर्यालले बताइन्। ‘अहिलेसम्म सबै काम सम्पन्न हुनुपर्ने थियो। तर भएन, अब त्यस्तो हुँदैन’, मन्त्री अर्यालले भनिन्, ‘यसै वर्ष सबै काम सम्पन्न हुन्छ।’
संघीय सरकारले याे वर्षको बजेटमा मुक्त हलियाको रोजगारीका लागि विभिन्न कार्याक्रमहरु समावेश गर्ने तयारी भइरहेको मन्त्री अर्यालले जानकारी दिइन्।
यसैगरी सरकारले एकिकृत बस्ती निर्माण कार्य गरिरहेको बागफाटा र बाह्रकुण्डाको एकिकृत बस्ती निर्माण सम्पन्न गर्न मन्त्री अर्यालले निर्देशन दिइन्। हलिया पुनर्स्थापनाका निम्ति भइरहेको एकिकृत बस्ती छिटो निर्माण कार्य सम्पन्न गर्न निर्देशन दिँदै उनले जेठ महिनामै निर्माण सम्पन्न गरेर उद्घाटन गरी सबै घरहरुको चाबी हस्तान्तरण गर्ने प्रतिबद्धतासमेत मन्त्री अर्यालले व्यक्त गरेकी थिइन्।
कञ्चनपुरको बागफाँटा मुक्त हलिया बस्तीमा ३६ घर र बाह्रकुण्डामा ३७ घरकाे निर्माण कार्य चलिरहेकाे छ। भूमि व्यवस्था, सहकारी तथा गरिबी निवारण मन्त्रालयले पुनर्स्थापनाको काम गरिरहेको छ। जसमा 'ह्याविट्याट फर ह्युमानिटी नेपाल'ले प्राविधिक तथा सामाजिक परिचालनमा सहयोग गर्दै आएको छ।
गत आर्थिक वर्षको सरकारी तथ्यांकअनुसार देशभर १६ हजार ९ सय ५३ घरधुरी मुक्त हलिया रहेका छन्। जसमध्ये गत असारसम्म १२ हजार ५ सय ५६ वडा कार्ड प्रमाणित भएर ११ हजार ६ सय ६८ घरधुरीलाई कार्ड वितरण गरिएको भूमि व्यवस्था, सहकारी तथा गरिबी निवारण मन्त्रालयका सूचना अधिकारी उपसचिव गोपाल गिरीले जानकारी दिए। गिरीका अनुसार हालसम्म ७ हजार २ सय २८ परिवारकाे पुनर्स्थापना भइसकेको छ।
सरकारले यसै आर्थिक वर्षमा पुनर्स्थापनाको काम सम्पन्न गरिसक्नेगरी काम अगाडि बढाएको उनले बताए। सुदुरपश्चिमका ९ जिल्ला र कर्णाली प्रदेशका हुम्ला, जाजरकोट र सुर्खेत जिल्लामा मुक्त हलिया रहेका छन्। हलियामुक्त गरेको १४ वर्ष बितिसक्दा पनि पुनर्स्थापनाको काम नसकिएपछि सरकारले यस वर्ष सम्पूर्ण पुनर्स्थापनाको काम सम्पन्न गर्ने योजना बनाएर काम अगाडि बढाएको उनकाे भनाइ छ।
यसैबिच मन्त्री अर्यालले महेन्द्रनगरस्थित भूमिसुधार कार्यालय र नापी कार्यालयको अनुगमन, निरीक्षण गरेकी छिन्। कार्यालयको निरीक्षण गर्दै मन्त्री अर्यालले मन्त्रालय मालपोत र नापी कार्यालयलाई नमूना बनाउनेगरी अगाडि बढेको भन्दै उनले त्यही 'स्प्रिट'का साथ काम गर्न कर्मचारीहरुलाई आग्रह गरिन्।
केही कार्यालयमा अनालाइन सेवा सुरु गरेको भन्दै उनले अनलाइनका कारण सेवा ढिलो भयो भन्ने महसुस जनतालाई हुन नदिन कर्मचारीलाई निर्देशन दिइन्। त्यस अवसरमा भूमिसुधार कार्यालय महेन्द्रनगरका प्रमुख धर्मानन्द भट्टले कार्यालयका समस्याहरुको बारेमा जानकारी गराएका थिए।
यसैबीच मन्त्री अर्यालले जिल्ला समन्वय समिति कञ्चनपुरमा समेत जिल्लाका कार्यालय प्रमुख, स्थानीय पालिकाका प्रमुख एवं उपप्रमुखहरुसँग छलफल गरेकी थिइन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
