कोलम्बो- श्रीलङ्कामा भएका शृंखलाबद्ध विष्फाेटमा मृत्यु हुनेकाे संख्या २ सय ९० नाघेकाे छ। राजधानी कोलम्बोका प्रतिष्ठित होटल एवं गिर्जाघर (चर्च) सहित देशका पूर्वी भेगमा आइतबार भएका ८ वटा शृङ्खलाबद्ध विस्फोटमा मृत्यु हुनेको संख्या साेमबार बिहानसम्म २ सय ९० नाघेकाे प्रहरी प्रवक्ता रूवान गुनशेकराले पुष्टि गरे।
घटनामा परी ३५ जना भन्दा बढी विदेशी नागरिककाे समेत मृत्यु भएकाे बताइएको छ। ५ सय जनाभन्दा बढी घाइते भएका काेलम्बाे प्रहरीले जनाएको छ। घटनामा घाइते भएकामध्ये धेरैकाे अवस्था गम्भीर रहेकाले मृत्यु हुनेको सङ्ख्या बढ्नसक्ने सम्भावना रहेको यहाँका अधिकारीहरूले बताएका छन्।
घटनामा संलग्न रहेकाे आशंकामा हालसम्म २४ जना पक्राउ परेका बताइएकाे छ। तर, उनीहरुकाे बारे थप केही प्रष्ट पारिएकाे छैन।
देशमा भएकाे सशस्त्र युद्ध सकिएकाे एक दशकपछि श्रीलंकामा यति धेरैकाे संख्यामा मानवीय क्षति हुने गरी घटना भएकाे हाे।
घटनाबारे भ्रम फैलाउने अवस्था सृजना भएपछि देशभर सामाजिक सञ्जाल फेसबुक र ह्वाट्स एपमा प्रतिबन्ध लगाइएकाे छ।
विष्फाेट गराइएका चर्चहरुमा राजधानी कोलम्बोस्थित सेन्ट एन्थोनी चर्च, नेगोम्बोस्थित सेन्ट सेबास्टियन चर्च लगायत छन्। राजधानीका तीनवटा पाँचतारे होटलहरु साङ्ग्रिला, सिनमन ग्रान्ड र किङ्सबरीमा पनि विस्फोट गराइएकाे हाे।
बौद्धमार्गी बहुल श्रीलङ्कामा करिब ६ प्रतिशत क्याथोलिक सम्प्रदायका मानिस बसाेबास गर्छन्। गिर्जाघरहरुमा विस्फोट हुँदा इसाई धर्मावलम्बीहरु इस्टर पर्वका अवसरमा आयोजित धार्मिक कार्यक्रममा सहभागी रहेको बताइएको छ।
बिहान ६ स्थानमा बम विस्फाेट गराइएकाेमा दिउँसाे पुनः २ स्थानमा बम विस्फाेट भएकाे थियाे।
यहाँको रक्षा मन्त्रालयले आक्रमणबारे अनुसन्धान भइरहेको तर अहिलेसम्म आक्रमणको कसैले जिम्मेवारी नलिएको बताएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1769064009.png)
-1764146706.png)
