काठमाडौं- दिल्ली उडान गर्दै आएका ३ एयरलाइन्स कम्पनीले जेट एयरवेजको उडान बन्द भएसँगै केही सीमित टिकटको मूल्य बढेको बताएका छन्।
जेट एयरवेजको उडान बन्द भएसँगै काठमाडौं-दिल्ली उडानमा टिकट पाउनै समस्या भएको थियो। टिकट अभावसँगै काठमाडौं-दिल्ली र दिल्ली–काठमाडौंको भाडा एक्कासी बढेको थियो।
दैनिक ३ वटासम्म उडान गर्दै आएको जेट एयरवेज आर्थिक संकटको कारण देखाउँदै उडान बन्द गरेसँगै टिकटको समस्या भएपछि हवाई भाडा बढेको थियो।
हवाई भाडा बढेसँगै नियामक निकाय नेपाल नागरिक उड्डयन प्राधिकरणले नेपाल एयरलाइन्स, इन्डिगो र एयर इन्डियासँग आइतबार छलफल गरेको थियो। छलफलमा प्राधिकरणले किन एउटा एयरलान्सले उडान बन्द गर्ने बित्तिकै भाडा बढेको भने उनीहरूलाई प्रश्न गरेको छ।
छलफलमा एयरलाइन्स कम्पनीका प्रतिनिधिले सबै टिकटको भाडा नबढेर ३५ प्रतिशत जति मंहगा टिकटको भाडा बढेको बताएको प्राधिकरण उपमहानिर्देशक राजन पोखरेलले जानकारी दिए।
प्राधिकरणसँगको छलफलमा उनीहरूले जेट एयरवेजको उडान बन्द भएसँगै टिकटको माग बढेको र महंगा टिकट स्वतः भाडा बढेको स्वीकार गरेका पोखरेल बताउँछन्।
जेटको उडान बन्द भएपछि पहिलेभन्दा यो रूटमा भाडा तीन गुणाले बढेको छ। पहिले ८ हजारबाट सुरू हुने एकतर्फी भाडादर बढेर अहिले न्यूनतम २० हजार पुगेको छ।
ट्राभल एजेन्सीहरूका अनुसार यो रूटमा तीन वटा एयरलाइन्सले उडान गरिरहेका छन्।
एयरलाइन्स कम्पनीहरूले भाडा घटाउने भन्दा पनि फ्लाइट संख्या बढाउनु पर्ने तर्क अगाडि बढाएको पोखरलले बताए।
प्राधिकरणले भने कुनै एक एयरलाइन्स कम्पनीले उडान बन्द गरेको मौका छोपेर यात्रुसँग बढी भाडा नलिन आग्रह गरेको छ।
‘त्यसै पनि नेपाल मंहगो हवाई भाडा भएको देश मानिन्छ,' पोखरेलले भने, ‘संकटको समयमा भाडा बढाउँदा पुनः नकारात्मक असर पर्न सक्छ।’
छलफलकै क्रमका उठेका प्रश्नमा ३ वटै एयरलाइन्स कम्पनीले हेड अफिसमा जानकारी गराउने प्रतिबद्धता गरेको उनको भनाइ छ।
अहिले इन्डिगोले दैनिक एक नेपाल एयरलाइन्सले सातामा ११ र एयर इन्डियाले पनि दैनिक १ काठमाडौं-दिल्ली उडान गर्दै आएका छन्।
हवाई यात्रुको चाप बढेसँगै नेपाल एयरलाइन्सले पनि मे १ देखि सातामा ३ उडान थप गरी १४ पुर्याउने जानकारी दिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
