नेपाली कांग्रेसका वरिष्ठ नेता रामचन्द्र पौडेल छैटौं पटक संसदीय निर्वाचनको प्रतिस्पर्धामा छन्। प्रतिनिधिसभा निर्वाचनमा तनहुँ क्षेत्र नम्बर-१ बाट चुनावी मैदानमा उत्रिएका पौडेल भावी प्रधानमन्त्रीका रुपमा आफूलाई प्रचार गरिरहेका छन्। पार्टीलाई नै विजयी गराउनुपर्ने जिम्मेवारी रहे पनि नेता गोविन्दराज जोशीले असहयोग गर्ने बताएपछि उनी तनहुँबाहेक अन्यत्र केन्द्रित हुन सकेका छैनन्।
नेता पौडेल भावी प्रधानमन्त्री बन्लान्? तनहुँ छाडेर अन्यत्रका चुनावीसभामा उनी किन केन्द्रित हुन सकिरहेका छैनन् त? नेपाल लाइभका लागि शिशिर ढकालले गरेको कुराकानी:
चुनावी अभियान कसरी सञ्चालन भइरहेको छ?
उम्मेदवारी दर्ता भएदेखि नै म जनताको घरघरमा पुगिरहेको छु। उहाँहरुको गुनासो सुन्ने काम भइरहेको छ। जनतासँग मत माग्न बिहानदेखि बेलुकासम्म घरदैलो र चुनावीसभामा व्यस्त छु।
पार्टीलाई नै विजयी गराउनुपर्ने जिम्मेवारी भएको तपाईं आफ्नै निर्वाचन क्षेत्रमा मात्रै केन्द्रित हुनुहुन्छ, किन?
प्रत्यक्षतर्फ उम्मेदवार भएपछि जनताकै सुखदुःख बुझ्ने काम गर्नुपर्छ। सबै मतदाताकहाँ पुग्न समय पनि धेरै लाग्छ। निर्वाचन प्रचारप्रसारका लागि समय छोटो छ। जनताको समस्याबारे जानकार हुन र तनहुँको थप विकासका लागि केके गर्न बाँकी छ भन्ने कुरा बुझ्न म तनहुँमा बढी केन्द्रित हुनुपरेको हो। अन्त जिल्लामा पनि म गएकै छु।
२६ वर्षदेखि तनहुँको प्रतिनिधित्व गर्नुभएको तपाईंलाई जनताले फेरि किन विजयी गराउने?
२६ वर्षदेखि म तनहुँवासीको प्रतिनिधि भएर विकासका लागि सक्रिय छु। तनहुँलाई समृद्ध बनाउन जनताले मलाई विजयी गराउनुपर्छ। गाउँमै रोजगारी सिर्जना गर्न, पूर्वाधार विकास गर्न जनताले मलाई मत दिनुपर्छ। तनहुँमा पर्यटनको विकास ऊर्जा उत्पादन र कृषि क्रान्तिका लागि जनताले मलाई मत दिनुहुन्छ। मैले गरेका कामहरुबाट जनता पनि खुसी छन्। तनहुँको विकास र समृद्धिका लागि मेरो विकल्प छैन।
गोविन्दराज जोशीको उम्मेदवारी खारेजीपछि तपाईंलाई कत्तिको सहज भएको छ?
निर्वाचन आयोगले उम्मेदवारी खारेज गरेपछि जोशीजीले पार्टीलाई सहयोग गर्नुको विकल्प छैन। उहाँले पार्टीलाई सहयोग गर्नुहुन्छ भन्ने मेरो विश्वास छ।
जोशीले सार्वजनिक रुपममै तपाईंलाई असहयोग गर्ने बताइरहनुभएको छ। यसले त तपाईंलाई असर पर्ला नि…
लोकतन्त्र र प्रजातन्त्र रक्षाका लागि कांग्रेसलाई विजयी गराउनुपर्ने अवस्था छ। अहिलेको राष्ट्रिय आवश्यकता नै यही हो। यो परिस्थिति बुझ्नुभएको जोशीजीले अन्यथा गर्नुहुन्छ भन्ने मलाई लाग्दैन।
वाम गठबन्धनका कारण कांग्रेसको चुनावी परिणाम के होला? जितका लागि कतिको सहज छ तपाईंलाई?
कांग्रेस सधैं चुनावमा एक्लै लड्दै आएको पार्टी हो। वाम गठबन्धन हुनेबित्तिकै अतालिनु पर्दैन। यसले हामीलाई केही फरक पर्दैन। हाम्रो जित सुनिश्चित छ। तनहुँमा पनि कांग्रेस एक्लै चुनाव लड्दै आएको छ। तनहुँमा कांग्रेसले नै जित्छ। मलाई जित्न कुनै चुनौती छैन।
तपाईंले आफूलाई भावी प्रधानमन्त्रीका रुपमा प्रचार गरिरहनुभएको छ। कांग्रेसले तपाईंलाई प्रधानमन्त्री बनाउला त?
म प्रधानमन्त्री बन्ने कि नबन्ने भन्ने कुरा पार्टी सभापतिको इच्छामा भर पर्छ। पार्टी सभापति नै धेरैपटक प्रधानमन्त्री बन्नुभएकाले यसपटक उहाँले आकांक्षा नराखेको अवस्थामा अबको प्रधानमन्त्री मै हुँ। निर्वाचनबाट विजयी भएर आएपछि देशको नेतृत्व गर्ने चाहना सबैलाई हुन्छ। मेरो अबको सपना भनेको देशको नेतृत्व गरेर जनताको सेवामा लाग्नु हो। पार्टीभित्र पनि धेरै नेताहरुले मलाई प्रधानमन्त्री बनाउँदा राम्रो हुने बताइरहनुभएको छ। मलाई विश्वास छ, कांग्रेसबाट अबको प्रधानमन्त्री मै हुँ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
