काठमाडौं– मंगलबार दिउँसो करिब १ बजे यातायात व्यवस्था विभागको कार्यालय नयाँ बानेश्वरमा १०/१५ जनाको समूह महानिर्देशक कुमारप्रसाद दहालको भेटको पर्खाइमा थिए। दहालले त्यो समूहलाई आफ्नो कार्यकक्ष बोलाए। करिब १ घण्टा छलफल चल्यो।
दहालसँगको छलफलपछि त्यही समूह फेरि भौतिक पूर्वाधार तथा यातायात मन्त्री रघुवीर महासेठको कार्यकक्षअघि देखियो। तिनै व्यक्तिहरु कहिले विभाग र कहिले मन्त्रालय धाइरहेको देखेपछि जान्न मन लाग्यो– आखिर उनीहरु के चाहन्छन्?
ती व्यक्तिहरुलाई चिन्न गाह्रो थिएन । किनकि केहीले ट्याक्सी चालकले लगाउने ज्याकेट समेत लगाएका थिए। उनीहरुले आपसमा गरिरहेको कुराकानीले पनि थाहा हुन्थ्यो, ट्याक्सीसँग उनीहरु कुनै न कुनै हिसाबले सम्बन्धित छन्।
विभाग स्रोत भन्छ, ‘मुख्यतयाः उनीहरुका तीन वटा स्वार्थ छन्। पहिलो, सरकारले खुलाउन लागेको नयाँ ट्याक्सी जुनसुकै हालतमा रोक्ने। रोक्नका लागि लबिङ गर्ने।
दोस्रो, आफ्नो लबिङका बाबजुद पनि सरकारले ट्याक्सी खुलाए ती ट्याक्सी आफ्नो हात पार्ने च्यानल मिलाउने।
तेस्रो, ट्याक्सीको भाडादर बढाउन दबाब दिने।
पछिल्लो समय सरकारले नयाँ मापदण्ड बनाएर ट्याक्सीको दर्ता खुला गर्न खोजिरहेको छ। नयाँ ट्याक्सी मापदण्ड तयार पारेर यातायात व्यवस्था विभागले मन्त्रालयलाई बुझाइसकेको छ। मापदण्ड भौतिक पूर्वाधार तथा यातायात मन्त्री रघुवीर महासेठको टेबुलसम्म पुगिसकेको छ।
सरकारले ट्याक्सी नम्बर बाँड्ने घोषणा गरेसँगै व्यवसायीहरुले त्यसलाई रोक्न लबिङ सुरु गरेका छन्। अहिले ट्याक्सी चलाइरहेका केही व्यवसायी नयाँ ट्याक्सी बजारमा नआउन् भन्ने चाहन्छन्।
नयाँ ट्याक्सी आइहाले पनि आफैंले मात्र पाउने गरी कसरी ‘सेटिङ’ मिलाउन सकिन्छ भनेर लागिपरेका छन् ती व्यवसायी। ‘उनीहरु कहिले विभाग त कहिले मन्त्रालय धाइरहनु पछाडिको मुख्य कारण नै त्यही हो,’ विभाग स्रोतले बतायो।
नयाँ ट्याक्सी हात पार्न पुरानै खेलाडीको चलखेल पनि सुरु भएको छ। त्यसका लागि व्यवसायीहरुले लबिङ सुरु गरेका छन्। उनीहरुले कहिले यातायात व्यवस्था विभाग त कहिले मन्त्रालय पुगेर आफ्ना कुरा सुनाइरहेका छन्। मंगलबार विभागमा र पछिल्लो दुई दिन मन्त्रालयमा भेटिएका तिनै व्यक्तिहरु थिए।
‘सीमित संख्यामा व्यवसायीहरुले ट्याक्सी व्यवसाय सञ्चालन गरी बजारमा एकलौटी जस्तै राज चलाइराखेको अवस्था छ अहिले। उनीहरुले भनेबमोजिम भाडादर निर्धारण भएको छ। सरकारले वर्षौंदेखि नयाँ ट्याक्सी दर्ता गर्न दिएको छैन। ट्याक्सी व्यवसायीहरु छाडा साँढे जस्ता भएका छन,’ विभागका एक उच्च अधिकारी भन्छन्।
जुनसुकै अवस्थामा सरकारमार्फत ट्याक्सीको भाडादर बढाउन लगाउनु पनि उनीहरुको ध्येय हो। गत असोज ७ गते ट्याक्सी व्यवसायी र यातायात व्यवस्था विभागबीच भएको सहमतिअनुसार हरेक महिना वैज्ञानिक तरिकाले भाडादर निर्धारण गर्नुपर्ने विषयलाई उनीहरुले भाडादर बढाउन भएको सहमतिका रुपमा बुझेका छन्।
यद्यपि हरेक महिना भएका वैज्ञानिक भाडादर निर्धारण गर्ने सम्झौता कार्यान्वयन गर्न नसक्नु भने विभागकै कमजोरी हो।
यो पनि पढौं
ट्याक्सी दर्तामा नयाँ मापदण्ड, मन्त्री महासेठलाई रिझाउन व्यापारीहरुको तँछाडमछाड
ट्याक्सी दर्ता तथा सञ्चालन मापदण्ड प्रभावित पार्न मन्त्री महासेठ रिझाउने खेलमा को-को?
ट्याक्सी दर्ता तथा सञ्चालन मापदण्ड : व्यापारीको स्वार्थमा मन्त्री महासेठ
ट्याक्सीमा सिन्डिकेट, नयाँ व्यवसायीलाई बाटो बन्द
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
