काठमाडौं– गत वर्ष आजकै दिन नेपालले मलेसियामा आयोजना भएको एएफसी सोलिडारिटी कप जितेको थियो। फाइनलमा मकाउलाई १–० ले पराजित गरेर नेपालले एसियाली फुटबल महासंघ (एएफसी) ले आयोजना गरेको प्रतियोगिता पहिलो पटक जित्यो।
सोलिडारिटी कप जितेपछि नेपालले एएफसी एसिया कप २०१९ अन्तर्गत तस्रो चरणको छनोट खेल्ने मौका पायो। त्यसयता नेपालले खेलेका कुनै पनि औपचारिक खेल जितेको छैन।
सोलिडारिटी कपपछि नेपालले ५ खेल एसिया कप छनोटका र एक अन्तर्राष्ट्रिय मैत्रीपूर्ण खेल खेलेको छ। ६ मध्ये नेपालले ४ खेलमा हार र २ खेलमा बराबरी खेलेको छ।
सोलिडारिटी कपपछि नेपालले मार्चमा एसिया कप छनोटअन्तर्गत फिलिपिन्ससँगको पहिलो खेल ४–१ ले हारेको थियो। खेलमा नेपालका लागि विशाल राईले गोल गरेका थिए।
जुनमा नेपालले भारतसँग मैत्रीपूर्ण खेल खेल्यो। मुम्बईमा भएको खेलमा नेपाल २–० ले पराजित भयो।
जुनमै एसिया कप छनोटको खेलमा नेपालले यमनसँग गोलरहित बराबरी खेलेर समूह 'एफ' मा अंकको खाता खोलेको थियो।
एसिया कप छनोटमा नेपालले ताजकिस्तानसँग एक महिनाको अन्तरमा दुई खेल खेल्यो। सेप्टेम्बरमा एन्फा कम्प्लेक्स सातदोबाटोमा भएको खेलमा नेपाल २–१ ले पराजित भयो। खेलमा नेपालका तर्फबाट विमल घर्तीमगरले गोल गरेका थिए। एक महिनापछि अवे खेल खेल्न ताजकिस्तान पुगेको नेपाली टिम ३–० ले पराजित भयो। पराजयसँगै एसिया कप छनोटबाट नेपाल बाहिरिएको थियो।
सोमबार एन्फा कम्प्लेक्समा भएको फिलिपिन्सविरुद्धको खेलमा पनि गोलरहित बराबरीमा रोकिएपछि नेपाल एक वर्ष जितविहीन बन्न पुग्यो।
नेपालले पछिल्लो एक वर्षमा ६ खेल खेल्दा ११ गोल खायो भने केवल २ गोल मात्र गर्न सक्यो। नेपालले ६ मध्ये ४ खेलमा गोल गर्न सकेन। २ खेलमा ३ भन्दा बढी गोल खायो।
एक वर्षमा जित निकाल्न नसके पनि नेपाली टिमका प्रशिक्षक ग्योतोकु कोजी सन्तुष्ट छन्। 'नेपालको प्रदर्शनबाट सन्तुष्ट छु। हामीले एक वर्षमा राम्रो टिमसँग प्रतिस्पर्धा गर्यौंक,' कोजीले फिलिपिन्ससँगको खेलपछि भने, 'राम्रा टिमसँग खेल्दा हामीले धेरै सिकेका छौं। आगामी दिनमा यसबाट फाइदा हुनेछ।'
एक वर्ष जितविहीन बन्नुको कारण नेपालले 'अट्याकिङ थर्ड’ मा विपक्षीलाई दबाब दिन नसक्नु हो। मिडफिल्डमा राम्रो बल खेलाए पनि विपक्षीलाई दबाब हुने गरी डिबक्समा पास उपलब्ध गराउन नेपाली खेलाडी चुकिरहेका छन्।
अर्को समस्या भनेको स्ट्राइकर पोजिसनमा बसेर खेल्न सकिरहेका छैनन्। स्ट्राइकरले राम्रोसँग संवाद गर्न नसक्दा मिडफिल्डबाट अगाडि बढेको केही बल त्यतिकै खेर जाने समस्या देखिएको छ।
डिफेन्डरले पटक–पटक गल्ति दोहोर्याउने समस्या पनि नेपाली टिममा छ। ताजकिस्तानविरुद्धको पहिलो लेग नेपालले डिफेन्डरकै गल्तिका कारण गुमाएको थियो। नेपाली डिफेन्डरले गल्ति गरेका कारण खेल गुमाएपछि प्रशिक्षक सुनिल श्रेष्ठले भनेका थिए, 'डिफेन्डरले गरेको एक गल्तीको मूल्य भयंकर हुन्छ, दुबै गोल हाम्रो डिफेन्डरको गल्तीका कारण भयो।’
एक वर्ष जितबिहिन नेपालले एसिया कप छनोट अन्तर्गत मार्च २०१८ मा यमनसँग खेल्नेछ। त्यसपछि सेप्टेम्बर २०१८ मा बंगलादेशमा हुने साफ च्याम्पियनसिपमा नेपालले खेल्ने तय छ। यी दुई प्रतियोगिता बाहेक अन्य खेल अहिलसम्म तय छैन। यसर्थ अन्तर्राष्ट्रिय मैत्रीपूर्ण खेलबाहेक अन्य विकल्प नभएको नेपाल सन् २०१७ मा जितबिहिन हुने पक्का छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1771493761.png)
-1771492980.png)
-1764146706.png)
