कपिलवस्तु- प्रदेश ५ को राजधानी कपिलवस्तु तोक्नु पर्ने भन्दै कपिलवस्तुकाका सांसद तथा जनप्रतिनिधिले माग गरेका छन्। कपिलपस्तुलाई राजधानी बनाउन दबाब दिने उद्देश्यले उनीहरुले छलफल तथा अन्तर्क्रियालाई तीव्रता दिएका हुन्।
प्रदेशसभाले राजधानी र नामाकरण तोक्न नसकिरहेका बेला कपिलवस्तुका सांसद, जनप्रतिनिधि तथा स्थानीयले कपिलवस्तुलाई नै राजधानी तोक्नु पर्ने भन्दै दबाब दिएका हुन्।
प्रदेशसभाले बनाएको विशेष समितिले जिल्ला जिल्लाबाट सुझाव संकलन गरी प्रतिवेदन तयार गरीरहेको बेला दबाब दिइएको हो।
कपिलबस्तुको गोरुसिंगेमा बुधबार अन्तर्सम्वाद कार्यक्रम गरी भौगोलिक तथा प्रशासंनिक दृष्टिले प्रदेशको राजधानी कपिलवस्तु उचित हुने धारणा व्यक्त गरेका हुन्।
प्रदेश सरकारका लागि आवश्यक संरचना निर्माणका लागि जग्गा कपिलवस्तुमा उपलब्ध गराउन सकिने त्यहाँबाट निर्वाचित प्रदेशसभा सदस्यले बताएका छन्।
कार्यक्रममा सहभागीले कपिलवस्तु जति उपयुक्त स्थान राजधानीका लागि अन्यत्र नरहेको जिकिर गर्दै त्यसका लागि आन्दोलन वा सहयोग जे पनि गर्न कपिलवस्तुबासी तयार रहेको बताए।
कार्यक्रममा उपस्थित प्रदेश सभा सदस्यहरु दीर्घनारायण पाण्डे, अर्जुन केसी, धर्मबहादुरलाल श्रीवास्तव, सहसराम यादव र रिना नेपालले आफुहरुले प्रदेश सभाका बैठकहरुमा कपिलवस्तुलाई राजधानी बनाउन आवाज उठाइरहेको बताए।
प्रतिनिधि सभाका सदस्य बृजेश कुमार गुप्ताले कपिलवस्तु राजधानीका लागि उपयुक्त भएको बताए।
बुद्धभूमि नगरपालिकाका प्रमुख केशवकुमार श्रेष्ठले कपिलवस्तुमा प्रदेश राजधानी बनाउनका लागि प्रदेशसभा सदस्यहरु र राजनीतिक दललाई आग्रह गरे।
स्थानीय तहका जनप्रतिनिधिहरुले प्रदेश राजधानीका लागि आवश्यक पर्ने जग्गा उपलब्ध गराउने घोषणा गरेका छन्।
केही समयअघि स्थानिय तहका प्रमुख तथा उपप्रमुख सहितको छलफलले राजधानीका लागि आबश्यक पर्ने सम्पुर्ण जग्गा व्यवस्थापन गर्न आफुहरु तयार रहेको निष्कर्ष निकालेको बाणगंगा नगरपालिकाका प्रमुख मंगल प्रसाद थारुले उल्लेख गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1772777462.png)
