बनेपा- जिल्लाको विकट क्षेत्र कोशीपारि जानका लागि अब वैकल्पिक सडक खुलेको छ। काभ्रेपलाञ्चोकको कोशीपारि भुम्लु गाउँपालिकाको सिलामेबाट बेखसिम्ले जोड्ने मोटरबाटो सोमबारदेखि सुरु भएको हो।
सो मोटर बाटो खुलाउन विगत ९ वर्ष अघिदेखि नै काम सुरु गरे पनि सम्पन्न हुनसकेको थिएन। डिभिजन सडक कार्यालयको करीब १ करोड रुपैयाँको लागतमा सडकको ट्र्याक खुला गरेपछि यात्रुबाहक बस सञ्चालनमा आएको भुम्लु गाउँपालिकाका अध्यक्ष गुमानध्वज कुँवरले बताए।
सडक खन्ने काम सम्पन्न भएपछि यात्रुबाहक बस सञ्चालनमा ल्याइएको उल्लेख गर्दै अध्यक्ष कुँवरले अब सो भेगका स्थानीय बासिन्दाका लागि आवतजावतमा सहज हुनुका साथै त्यहाँ उत्पादन गरिएका तरकारी बजारसम्म पुर्याएर आम्दानी गर्न सहज हुने बताए।
उनले भने, 'नौ वर्ष अगाडिदेखि सुरु भएको बाटो यसअघि सापिङ गाविसबाट १ लाख ७५ हजार रकम छुट्याएर सुरु गरेकामा माथिबाट र तलबाट गरी दोहोरो सुरु गरे पनि भट्टेटार भन्ने स्थानमा करिब ७ सय मिटर चट्टाने भीर परेका कारण खुल्न सकेको थिएन, ट्र्याक खोल्न डिभिजन सडक कार्यालयमार्फत काम गरेपछि अहिले यो काम सम्पन्न गरी बस सञ्चालनमा ल्याएका हौँ।'
सडकलाई थप विस्तार गर्न यसै वर्ष प्रदेश सरकारको ५० लाख रुपैयाँ योजना परिसकेको गाउँपालिका अध्यक्ष कुँवरले बताए। जिल्लाको कोशीपारिमा सञ्चालन हुँदै आएको पुरानो बाटो मर्मत सुधार गर्नुपर्ने भएका कारण बन्द भएपछि सो सडकलाई सोमबारदेखि नै खुला गरिएको छ। पहिलादेखि सञ्चालनमा आएको सडक हुँदै कोशीपारिको बेखसिम्ले पुग्नलाई ४ घण्टा लाग्ने गरेकामा अब भने सो नयाँ सडकबाट २ घण्टामा नै पुग्न सकिने स्थानीय उद्धवराज गिरीले बताए।
स्थानीय बासिन्दा देवीप्रसाद पन्तले धेरै पहिलादेखि खन्न सुरु गरेको भए पनि रकम अभावका कारण खोल्न नसकेको सडकमा अहिले यात्रुबाहक बस सञ्चालनमा आएपछि गाउँमा उत्पादन हुने नगदेबाली बजारीकरण गर्नका लागि निकै सहज हुने र भाडा पनि कम लाग्ने जिकिर गरे।
यसअघि जिल्लाको भुम्लु र चौँरीदेउराली गाउँपालिका जानका लागि दोलालघाट हुँदै सल्ले–चौबास–भएर जानुपर्थ्याे। सो सडकखण्ड हुँदै छिमेकी जिल्ला सिन्धुपाल्चोकको लिसङ्खुपाखर, बाफल र रामेछापको गुराँसेसम्म यात्रुबाहक बस चल्ने गरेको छ। त्यसका लागि दोलालघाट पारिबाट एउटैमात्र सडक भएका कारण समस्या भोग्दै आएकामा अब सहज भएको स्थानीय बासिन्दाको भनाइ छ।
अरनिको यातायात सेवा समितिले सो क्षेत्रका लागि दैनिक २८ यात्रुबाहक बस सञ्चालनमा ल्याइरहेको समितिका अध्यक्ष चित्रबहादुर कुँवरले बताए। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
