आमाछोदिङ्गमो (रसुवा)- उपराष्ट्रपति नन्दबहादुर पुनले जलविद्युतको शेयर किन्न अपिल गरेका छन्।
जिल्ला समन्वय समिति रसुवाको समन्वय तथा सेम्पालिबो युवा क्लबद्वारा आयोजित ‘प्रथम आमाछोदिङ्गमो पुरुष तथा महिला खुला भलिबल कप २०७६ र बृहत् सांस्कृतिक कार्यक्रम’मा सोबबार सम्बोधन गर्दै उपराष्ट्रपति पुनले यस्तो बताएका हुन्।
सरकारले जलविद्युत् आयोजना निर्माणलाई उच्च प्राथमिकता दिएको उल्लेख गर्दै पुनले हरेक नेपालीलाई विद्युतको सेयरधनी बनाउने र त्यसमार्फत समृद्धि ल्याउनका लागि सरकारले जनताको जलविद्युत् कार्यक्रम सुरु गरिसकेको उल्लेख गरे।
'जनताको जलविद्युत् कार्यक्रमअन्तर्गत आफूसँग भएका स–साना पूँजीबाट सेयर किन्न आम नेपालीलाई अपिल गर्दछु,' उनले भने, 'यो कार्यक्रमबाट जलविद्युत् उत्पादनका लागि आवश्यक पूँजी सङ्कलन त हुन्छ नै हरेक नेपाली जनतालाई लाभ दिएर समृद्ध बन्न मद्दत पुर्याउँछ।'
रसुवा नेपालकै प्राकृतिक सुन्दरता, धार्मिक केन्द्र, प्राकृतिक स्रोत साधनले सम्पन्न अपार सम्भावनायुक्त जिल्ला भएको बताएका छन्।
दर्जनभन्दा बढी जलविद्युत् आयोजना, अन्तर्राष्ट्रिय नाका, लाङ्टाङ गोसाइँकुण्ड, रसुवागढीजस्ता पर्यटकीय केन्द्र र यहाँका मौलिक कला, संस्कृति रसुवाको मात्र नभई देशकै समृद्धिको आधार भएको बताए।
रसुवागढी नाकाको पूर्वाधार विकास, यहाँ निर्माण हुन लागेको सुक्खा बन्दरगाहलाई तीव्रता दिन सरकारको ध्यानाकर्षण गराउँदै उहाँले निर्माणाधीन जलविद्युत् आयोजना समयमा निर्माण सम्पन्न गर्न, पर्यटनको विकासमा ध्यान दिन र यहाँको खेल, कला संस्कृतिको विकासमा प्राथमिकता दिन आग्रह गरे।
मुलुकको विकास र समृद्धिका लागि प्रशस्त आधार रहेको उल्लेख गर्दै उपराष्ट्रपति पुनले उपलब्ध प्राकृतिक स्रोत, हाम्रो मेहनत, परिश्रम, लगनशीलता र उच्च प्रविधिको प्रयोगबाट नै छोटो समयमा समृद्धि हासिल गर्न सकिने बताए।
जलविद्युत् उत्पादन वृद्धि, कृषिको व्यावसायीकरण आधुनिकीकरण, पर्यटनको विकास, खनिज उत्खनन, जडीबुटी प्रशोधन, उद्योग कलकारखाना निर्माण, भौतिक पूर्वाधारको विकास र प्रविधिको विकासका आधार भएको उनको भनाइ थियो। -रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1772936740.png)
-1772936454.png)
-1764146706.png)
