काठमाडौं– राजधानीमा सञ्चालित चिकेन स्टेशन (खाजा पसल)मा अखाद्य तेलको प्रयोग भएको पाइएको छ।
खाद्य प्रविधि तथा गुण नियन्त्रण विभागले शनिबार गरेको बजार अनुगमनका क्रममा काठमाडौं महानगरपालिकाको सितापाइलास्थित चिकेन स्टेशनमा अखाद्य तेल प्रयोग भएको पाइएको हो।
चिकेन फ्राइका लागि राखिएको तेल हाइ पोलारिटी (अत्याधिक डढेको) पाइएपछि अनुगमन टोलीले सबै तेल नष्ट गरी ३ दिनभित्र विभागमा उपस्थित हुनका लागि पत्र काटेको छ।
त्यसैगरी सँगै सञ्चालित सेल्सबेरी डिपार्टमेण्ट स्टोरका खाद्य सामाग्रीहरू पनि गुणस्तरहीन पाइएको छ। फापरको पीठो, पिउने पानी, तेल, जाम लगायत सामग्री गुणस्तरयुक्त नपाइएपछि विभागले सेल्सबेरी डिपार्टमेण्ट स्टोरको उत्पादन तथा बिक्री वितरणमा रोक लगाएको छ।
त्यसैगरी बालाजु माछापोखरीस्थित सूर्यदेव मिठाइ पसललाई भने अनुगमन टोलीले सिल्ड गरेको छ। कानुनी प्रक्रिया पूरा नगरी सञ्चालन गरिएको सो मिठाइ पसलमा अत्यधिक मिसावट, सरसफाइको कमी तथा व्यक्तिगत सरसफाइ पनि सन्तोषजनक नदेखिएपछि अर्को सूचना जारी नभएसम्मका लागि पसल सिल्ड गरिएको विभागका खाद्य अनुसन्धान अधिकृत ईश्वरराज सुवेदीले जानकारी दिए।
उपभोत्ता अधिकार अनुसन्धान मञ्चका अध्यक्ष माधव तिमिल्सिनाले अनुगमनका क्रममा गुणस्तरहीन खाद्य सामाग्री फेला पर्नुको साथै सरसफाइमा कमी र कानुनी प्रक्रिया पनि पुरा नगरेको पाइएकाले नियमक निकायले अनुगमन तीव्र पार्नुपर्ने बताए।
खाद्य प्रविधि तथा गुण नियन्त्रण विभागले उपभोक्ता अधिकार अनुसन्धान मञ्चका प्रतिनिधि, पत्रकार सहित राजधानीको बालाजु, सितापाइला लगायत क्षेत्रको अनुगमन गरेको हो।
अनुगमनका क्रममा स्थलगत रुपमा नै खाद्य परीक्षणका लागि मोबाइल प्रयोगशाला भ्यान प्रयोग गरिएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
