काठमाडौं– युवा तथा खेलकुद मन्त्री राजन केसी मंसिर २१ गते हुने प्रतिनिधिसभा निर्वाचनमा काठमाडौं क्षेत्र नम्बर १० बाट नेपाली कांग्रेसका बलिया उम्मेदवार हुन्। २०७० को दोस्रो संविधानसभा निर्वाचनमा माओवादी केन्द्रका अध्यक्ष पुष्पकमल दाहाल ‘प्रचण्ड’ लाई तेस्रो स्थानमा सीमित राख्दै ७ हजार ५ सय ४० मतले जितेर राजन एकाएक नेपाली राजनीतिमा उदाएका थिए।
यसपालिको निर्वाचनमा दाहाल उनको प्रतिस्पर्धी होइनन्। दाहाल यो क्षेत्र परित्याग गर्दै चितवनबाट निर्वाचन लड्न गएका छन्। त्यसैले यो क्षेत्रमा आफ्नो प्रतिस्पर्धी कोही नभएको राजनको भनाइ छ।
राजनको क्षेत्रमा यसपालि प्रतिस्पर्धा गर्न वाम–गठबन्धनका तर्फबाट माओवादीकै हितमान शाक्य उठेका छन्। निर्वाचनकै सेरोफेरोमा केसीसँग नेपाल लाइभका लागि नवीन अर्यालले गरेको कुराकानीः
प्रचारप्रसारमा व्यस्त हुनुहुन्छ, कस्तो प्रतिक्रिया पाइरहनुभएको छ?
सबै ठीक छ। कांग्रेसको पक्षमा हावा चलेको छ। वाम–गठबन्धनको हौवा चले पनि स्थानीयबासीले रुचाएका छैनन्। नतिजा मेरै पक्षमा आउनेमा ढुक्क छु।
पहिले माओवादी केन्द्रका अध्यक्ष नै प्रतिस्पर्धी हुनुहुन्थ्यो, अहिले छोडेर जानुभयो?
प्रचण्डले यो क्षेत्र छोड्नुमा केही विश्लेषण गर्नु भएकै होला। प्रचण्डजीलाई लागेको हुनुपर्छ यो क्षेत्रमा मेरो पकड बलियो छ। ‘हार’को पूर्वाभास पाएर छोडेको हुनुपर्छ।
अध्यक्ष दाहालले छोडेपछि तपाईंको आधा तनाव घट्यो होला नि?
त्यसो पनि होइन। निर्वाचन हो। प्रोपागान्डा चल्छ। मतदातालाई द्विग्भ्रमित पार्न खोजिन्छ। तर, काठमाडौंको जनता शिक्षित छन्। नतिजा सकारात्मक नै आउँछ।
यहाँका जनताले तपाईंलाई मतदान गर्नुपर्ने कारण के नि?
पहिले पनि यहाँ कम्युनिस्टले जितेर गए। यो ठाउँले प्रधानमन्त्री पनि दियो। तर, खोई विकास भएको? म आएपछि विकासका काम प्रारम्भ भएका छन्। कीर्तिपुरमा मात्र लोप भएको दुईवटा बाटो बनाएको छु। मठमन्दिर संरक्षणमा काम भइरहेको छ। दक्षिणकाली–फर्पिङमा काम सुरु भएको छ। दुई वर्षअघि म संविधान बनाउने मुख्य एजेन्डाका लागि गएको थिएँ। यो अभिभारा पूरा भइसकेको छ। अब विकास योजना मेरो पहिलो प्राथमिकता हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
