अर्थमन्त्री ज्ञानेन्द्रबहादुर कार्की नेपाली कांग्रेसका प्रभावशाली नेताहरुमा पर्छन्। उनी यसपालि सुनसरीको क्षेत्र नम्बर ४ बाट प्रतिनिधिसभाको निर्वाचन लड्दैछन्। यसअघि समानुपातिकतर्फबाट सभासद् भएका कार्की पहिलोपल्ट प्रत्यक्षतर्फ निर्वाचनमा उत्रिएका हुन्। उनको प्रतिद्वन्द्वी वाम गठबन्धनका तर्फबाट नेकपा एमालेका रमेश श्रेष्ठ उठेका छन्।
श्रेष्ठ पहिले राष्ट्रिय प्रजातन्त्र पार्टी (राप्रपा) बाट राजनीति गर्थे। उनी यही निर्वाचनभन्दा अगाडि नेकपा एमालेमा प्रवेश गरेका हुन्।
श्रेष्ठको तुलनामा कार्की केन्द्रीय राजनीतिमा दख्खल राख्छन्। यसैले उनको उम्मेदवारीका कारण यो क्षेत्र तरंगित भएको छ। कार्की पहिलोपल्ट सुनसरीबाट उठेका हुन्। त्यसैले उनको क्षेत्रमा कस्तो परिणाम आउने हो, सबैको ध्यान केन्द्रित छ। मन्त्री कार्की भने शतप्रतिशत जित्ने आशा व्यक्त गर्छन्।
अशोक राईको संघीय समाजवादी फोरमसँग तालमेल गरेपछि कार्की अहिले निकै उत्साही देखिन्छन्। सुनसरी क्षेत्र नम्बर १ मा नेपाली कांग्रेसले राईलाई सघाउने र क्षेत्र नम्बर ४ मा फोरमले कार्कीलाई सघाउने सहमतिअनुरुप दुवै पार्टीले आफ्नो उम्मेदवारी फिर्ता लिइसकेको छ।
उनी आफूमात्र होइन, सुनसरीको ४ मध्ये ३ स्थानमा कांग्रेसले जित्ने दाबी गर्छन्। एक स्थान कांग्रेसले सहमति गरेको अशोक राईले जित्ने पनि उनको दाबी छ।
सुनसरी ४ जनसंख्याको हिसाबले सबैभन्दा ठूलो मतदान क्षेत्र मानिन्छ। यहाँ मतदाता मात्र १ लाख ११ हजारको हाराहारीमा छन्।
निर्वाचनको मुखमा नेपाल लाइभका नवीन अर्यालले अर्थमन्त्री कार्कीसँग गरेको कुराकानी:
पहिलोपल्ट निर्वाचन लड्दै हुनुहुन्छ, कस्तो अनुभव भइरहेको छ?
धेरै मेहनत गरिरहेको छु। जनताको बीचमा गएको छु। उहाँहरुको गुनासो र सुझाव सुनिरहेको छु। जनतामा उत्साह छ। उनीहरु नाराभन्दा विकास चाहिरहेका छन्। म राष्ट्रिय राजनीतिमा पनि भएको हुनाले स्थानीयवासीमा मबाट धेरै आशा छ। जुन ठाउँमा गएको छु, सबैले प्रेम र स्नेह देखाएका छन्।
जनताको यो प्रेम र स्नेह मतमा परिणत हुने आशा चाहिँ कत्तिको छ?
निश्चय नै छ। मलाई त अहिले उहाँहरुको आशा र प्रेमलाई विश्वासमा बदल्ने चुनौती छ। जुन ठाउँमा गएको छु, सबैले घरकै एउटा सदस्य आएझैँ खुसी व्यक्त गरिहनुभएको छ।
तपाईंको प्रतिस्पर्धा कोसँग रहन्छ?
प्रतिस्पर्धा नेकपा एमालेसँगै हुन्छ। वाम गठबन्धनका कारण उहाँहरु नै मेरो राजनीतिक प्रतिस्पर्धी हो। तर, यस क्षेत्रमा उपेन्द्र यादवजीहरुको संघीय समाजवादी फोरमले मलाई समर्थन गर्ने निर्णय गर्दै आफ्नो उम्मेदवारी फिर्ता गरिसक्नुभएको छ। नेपाल कांग्रेसले पनि अशोक राईलाई सघाउन क्षेत्र नम्बर १ बाट हाम्रो उम्मेदवार हटाउने निर्णय गरेका छौं। त्यसैले पकड राम्रो बन्दै गइरहेको छ।
जित्ने आशा कत्तिको गर्नुभएको छ?
एकदमै जित्छु। फराकिलो मतान्तरले जित्छु होला। अझ गाउँघर घुम्दै गर्दा मलाई सुनसरीको ४ वटा क्षेत्रमध्ये ३ मा कांग्रेसको विजय र एक निर्वाचन क्षेत्रमा संघीय समाजवादी फोरमका अशोक राईले निर्वाचन जित्ने आभास पाएको छु।
उसोभए तपाई ढुक्क हुनुहुन्छ?
शतप्रतिशत ढुक्क छु। मैले पहिले नै भनिहालेँ, यहाँका जनता विकास चाहन्छन्। र, त्यो विकास मबाट सम्भव छ भन्ने उहाँहरुको बुझाइ छ।
आफ्नो क्षेत्रको समस्या के देख्नुभयो?
समस्या सडक, शिक्षा, स्वास्थ्य नै हो। कोसी वन्यजन्तुको पनि छ। यसअघि विकासको कुरा मात्र भयो, काम भएन। यस कुरामा जनताको चित्त दुखाइ छ। यो स्वाभाविक पनि हो। यहाँ पर्यटन र कृषिको अपार सम्भावना छ। समग्रमा भन्नुपर्दा यहाँको जनताले आधारभूत विकासलाई नै प्राथमिकतामा राखेका छन्। उहाँहरुसँग मेरो प्रतिबद्धता पनि यही कुराको विकास गरेर लैजाने नै हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1766648928.png)
