परेवाडाँडा- लमजुङबाट प्रतिनिधिसभाको उम्मेदवार बनेका नेपाली कांग्रेसका नेता दिलबहादुर घर्तीले आर्थिक स्वतन्त्रता सहित मौलिक र वैयक्तिक स्वतन्त्रताको उपभोग गरिरहेका नेपालीले यो निर्वाचनमा कांग्रेसलाई जिताउनै पर्ने अवस्था आएको बताएका छन्।
नेता घर्तीले चुनावी प्रचारप्रसारका क्रममा परेवाडाँडाको आमसभालाई सम्बोधन गर्दै प्रजातान्त्रिक परिपाटीलाई बलियो बनाउन कांग्रेसलाई भोट दिनुपर्ने बताए।
उनले स्थानीय निर्वाचन र यो निर्वाचनको परिणामले पार्ने असरबारे भिन्नता प्रस्तुत गर्दै भन्नुभयो, 'स्थानीय तहका पदाधिकारीहरु स्थानीय विकास निर्माण र जनताको सेवामा प्रत्यक्ष संलग्न हुन्छन्, हाम्रा स्थानीय जनप्रतिनिधिहरुबाट राजनीतिक व्यवस्था परिवर्तन हुँदैन, तर प्रतिनिधिसभाको दायरा फरक छ, यसले संविधानसमेत संशोधन गर्न सक्छ र वामपन्थीहरु संविधानलाई दुई तिहाईले फेरेर कार्यकारी राष्ट्रपतिको व्यवस्था गर्नेदेखि व्यवस्था नै फेर्ने कुरा गरिरहेका छन्। यसले मुलुक कम्युनिस्ट शासनतिर जाने खतरा पनि उत्पन्न गराएको छ।'
लमजुङ जिल्ला २००७ सालको क्रान्तिदेखि नै लोकतन्त्रको पक्षमा रहेको बताउँदै घर्तीले भने, '२०४८ सालमा पनि वाम एकता भएको थियो, त्यतिखेर कांग्रेसले लमजुङका दुवै क्षेत्र जितेको थियो। अहिले पनि वाम एकता भएको छ, अहिले पनि कांग्रेसले जित्नुपर्छ र हामी जितेर देखाइदिनेछौं।'
कार्यक्रममा लमजुङ प्रदेशसभा (ख) का कांग्रेस उम्मेद्वार कृष्णप्रसाद कोइरालाले कांग्रेसको नेतृत्वमा संविधान आएको र कांग्रेसले आर्थिक विकासतर्फ मुलुकलाई लैजान लागेकाले त्यसलाई बिथोल्नका लागि वाम एकता भएको आरोप लगाए।
'प्रचण्ड र केपी ओलीले वाम गठबन्धनलाई जिताएर संविधान बदल्ने कुरा गरिरहनुभएको छ, संविधान बदल्ने कुरालाई रोक्नका लागि भए पनि रुख चिन्हमा मतदान गर्नु आवश्यक छ,' उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
