कांठमाडौं- नेमकिपाका नेता प्रेम सुवाल भक्तपुर–१ का प्रतिनिधिसभाका उम्मेदवार हुन्। नेमकिपाका अध्यक्ष नारायणमान बिजुक्छेले सधैं चुनाव जित्ने उक्त क्षेत्रमा अहिले त्रिपक्षीय भिडन्त छ। वाम गठबन्धनबाट माओवादीका मिलन सुवाल र लोकतान्त्रिक गठबन्धनबाट कांग्रेसका बाबुराजा जोशी पनि चुनावी प्रतिस्पर्धामा छन्। प्रेम सुवालसँग निर्वाचनको सेरोफेरोमा रहेर नेपाल लाइभका किशोर दहालले गरेको कुराकानीः
‘नारायणमान बिजुक्छेको क्षेत्र’ बाट चुनाव लड्दै हुनुहुन्छ। कस्तो महसुस भइरहेको छ?
पार्टीको जिल्ला कमिटीले प्रतिनिधिसभाको चुनावका लागि उहाँकै नाम सिफारिस गरेको थियो। तर, पार्टी अध्यक्षले नै अब युवा पुस्ता अगाडि बढ्नुपर्छ, म पार्टीको संगठन बिस्तारमा लाग्छु भन्नुभयो। मैले ५ पटक संसदमा रहेर देश र जनताका लागि निकै काम गरेको छु। अब त्यसका लागि नयाँ पुस्ता पनि तयार भएको छ भन्ने उहाँको मनशाय रह्यो। पार्टीले नै निर्णय गरेर मलाई उठाएको हो।
उहाँको निरन्तर जितको विगतलाई साकार पार्न कत्तिको चुनौती छ?
हामीले विगतमा संसदमा रहेर देश र जनताकै पक्षमा काम गरेका छौं। त्यहाँ हामीले पछुताउनुपर्ने कुनै काम गरेनौं। बरु, सरकारमा बसेकै पार्टीहरुले देश र जनताविरुद्ध काम गरेका छन्। उनीहरुले हामीले जित्यौं भने यति काम गर्छौं भनेर बाचा गर्छन्। अनेक आश्वासन राखेर घोषणापत्र सार्वजनिक गरेका छन्। तर, सरकारमा गएपछि बाचा अनुसार काम गर्दैनन्। बरु भारतीय विस्तारवाद र एकाधिकारवादको दलाली गर्छन्। भ्रष्टाचार गर्छन्। त्यस्ता पार्टीलाई मात्र जितका लागि चुनौती हुन्छ। देश र जनताको पक्षमा इमानदारिताका साथ काम गरिरहेका हामीलाई केही चुनौती छैन।
जुन मतदाताले बिजुक्छेलाई मत दिन्थे, तिनले तपाईंलाई पनि दिन्छन् भन्ने आधार के छ?
त्यो संगठनका कारणले पाएको मत थियो। त्यो मैले पनि पाउँछु। पार्टीप्रति सद्भाव राख्ने जनता पनि बढ्दै गएका छन्।
विजुक्छेले पनि ०६४ सालमा भन्दा ०७० सालमा मत बढाउनुभएको थियो। तपाईंले बढाउनुहुन्छ कि घटाउनुहुन्छ?
हामीले निकै काम गरेका छौं। त्यसलाई जनताले राम्रोसँग महसुस गरेका छन्। मतदाता पनि बढेका छन्। हाम्रो मत पनि बढ्ने नै छ।
वाम र लोकतान्त्रिक गठबन्धनका उम्मेदवारबाट कत्तिको चुनौती महसुस गर्नुभएको छ?
दुवै गठबन्धन भारतीय एकाधिकारका दलालहरुको गठबन्धन हो। भ्रष्टाचारीको गठबन्धन हो। यसलाई जनताले चिनिसकेका छन्। उनीहरुलाई मत दिँदैनन्। हामीलाई कुनै चुनौती महसुस भएको छैन।
बिजुक्छेले युवामा उम्मेदवारी हस्तान्तरण गरेको भन्नुभयो। अब तपाईं पार्टी अध्यक्ष बन्ने लाइनमा उभिनुभएको हो?
त्यो त पार्टीले भविष्यमा गर्ने निर्णय हो। अहिले भने हाम्रा श्रद्धेय अध्यक्षकै नेतृत्व निरन्तर रहन्छ। अहिले नै नेतृत्व फेर्ने कुरा हामीले सोच्न पनि मिल्दैन।
यसपटक पनि निर्वाचित भएर संसदमा पुग्नुभयो भने तपाईंले खेल्ने भूमिका के हुन्छ?
देश र जनतालाई हामीले जे आश्वासन दिएका छौं, त्यसकै लागि पहल गर्ने हो। आर्थिक समानता, सामाजिक न्याय र व्यक्तित्व विकासको समान अवसरका लागि हाम्रो भूमिका रहन्छ। शिक्षा, स्वास्थ्यलाई निःशुल्क बनाउने, स्वदेशमै रोजगारी, महिलाको श्रम शक्तिको उपयोग आदिका लागि संघर्ष गर्नेछौं। त्यसका लागि कानून बनाउन भूमिका खेल्नेछौं। हामीले जे घोषणा वा जनताका सामू बाचा गरेका छौं, त्यसप्रति सचेत हुनेछौं।
विगत संसद बैठकमा तपाईं निरन्तर निगरानी गरिरहनुहुन्थ्यो। यसलाई जोडेर हाम्रो संसदीय मूल्य मान्यताप्रति तपाईंको प्रतिक्रिया के छ?
संसदीय मूल्य मान्यता निकै कमजोर छ। सत्तापक्षले त आफ्नो स्वार्थ अनुकूल कानुन बनाउन खोज्छ नै। प्रतिपक्षीले पनि त्यसप्रति विपक्षमा मतदान गर्ने, बहस गर्ने काम गरेको पाइँदैन। कस्तो भयो भने, जुन पार्टी सत्तामा भए पनि वा प्रतिपक्षमा भए पनि खासै फरक महसुस हुँदैन। उनीहरु सबै सत्तापक्ष नै भएको प्रतीत हुन्छ। नाम फरक भएका एउटै पार्टीहरु पालैपालो गरेर सरकारमा जाने र भागवण्डा गरेर खाने प्रवृत्ति देखिएको छ। यो संसदीय मूल्य मान्यता विपरित छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1779545841.jpg)
